5
Chin impatikhaw Apo Jos ay John an nalolo-ot an tulaꞌ ja hini Pfoꞌtot an Karnero
1 Ja tinnig u khu an chin inu-umpfun ay chuy nuntotonga an trono ja inu-ugnan chin agwana han nalolo-ot an tulaꞌ. Natula-an chin numpfinahher ja numpapeto an nalo-ot ja nun-asilyuwan ta achi mapfilag.
2 Ja tinnig u khu han mapfi-ah an angher Apo Jos an khuna iꞌgwap an mangali hi, “Ngay gway apfalinana an mangaan hay hachi silyo ta pfilakhona hichuy tulaꞌ?”
3 Muti ma-id chi hay oha hi gway apfalinana an mamilag chin tulaꞌ ta pfahaona, anong un hichi ad langit ja heto lota ja ad chalom.
4 Amat hichi ja eneꞌkhab u an kumila, ti ma-id oh-ohha hi machakngan hi gway apfalinana an mamilag chin tulaꞌ.
5 Muti inalin chin oha ay cha chuy an pangulu ay ha-in hi, “Achi a kumila, ti tayya hini Mangab-apfak an hija hini nunchongor an holag Ari David an nangadnan hi layon ni tribon Judah. Hijay nangapfak an amin hi napukhit hotti hijay gway apfalinana an mangaan ay chuy silyo ta pfilakhona hichuy tulaꞌ.”
6 Un u agkhu emmohgwat ta tikhaꞌ chin impatikhaw na ja tinnig u han pfoꞌtot an karnero an timmataꞌchug chin negpongan chuy nuntotonga an trono, an linili-ub hachi apat an he-od-odmay ja hachi chugwam polo ta apat an pangulu. Ja hay tikhaw chuy pfoꞌtot ja napfilatan chin hukhat na an amat hi un cha pinarti. Ja gwa han peto an haꞌkhud na, ja peto khu han mata na. Hay hato an mata ja talaton ni Espiritu Santo, an khun honakhon Apo Jos ta magwacha hija ay tay nunleneꞌgwoh ta lota.
7 Ja hitay an pfoꞌtot ja i na enala chin nalolo-ot an tulaꞌ an inu-ugnan chuy inu-umpfun ay chuy nuntotonga an trono.
8 Enala na chin tulaꞌ an nalolo-ot, ja numpunheppe cha ay hija chin apat an he-od-odmay ja chin chugwam polo ta apat an pangulu. Ja gwahchinonon ay chicha hon gway inugnana hi tadcheng, ja han pfalituꞌ an malokong an napnu hi insenso an hijah tay hay hana kalalag hana tatakhun Apo Jos.
9 Ja nabnab-on han chengngor u an kantan hachi papangulu an khun cha allon hi,
“He-a ja angkhay chi gway apfalinana an mangala ay chuy tulaꞌ
ja an mangaan hay hachi silyo na ta pfilakhom.
Ti penatoy chi-a ja nun-ajuh chin chalam
ta napfajachan hana pfahor chi tatakhu,
ta gway mumpfalin hi empfapfalay Apo Jos
an amin hana numpfino-ob-on an holag ja tribo hichi lota an numpfino-ob-on chi hapit cha.
10 Inidchum mu chicha ay ni Pun-ap-apugwam
ta miꞌ-ap-apo cha ay he-a hichi lota,
ja numpfalinom chicha hi papachi an munserbi ay Apo Jos.”
11 Emmohchong u khu, ja chengngor u chin hapit hachi linipfulipfu an angher an achi mapfilang. Ja lini-ub cha chin nuntotonga an trono ja hachi apat an he-od-odmay ja chin chugwam polo ta apat an pangulu.
12 Ja maꞌgwap chin hapit hachi angher an allon cha hi,
“Hini Pfoꞌtot an Karnero an penatoy cha, ja hijay medaydayaw, mipapfagpfagto ja ma-ar-ali,
ti gway apfalinana, ja gway enachangjana, ja manomnom, ja hijay mapfiꞌpfi-ahan.”
13 Ja chengngor u khu chin hapit an amin hachi mun-od-odmay hichi ad langit, ja heto lota, ja ad chalom ja hichi baybay an khun cha allon hi,
“Ma-ar-ali hichuy inu-umpfun ay chuy trono
ja hichuy Pfoꞌtot an Karnero,
ja mipapfagpfagto ja medaydayaw cha hi ma-id chi pogpogna,
ti otong hini apfalinan cha.”
14 Hon inalin hachi apat an he-od-odmay hi, “Amen.” Hon nunjongot chin chugwam polo ta apat an pangulu ta dayawon cha hichuy Pfoꞌtot an Karnero ja hichuy inu-umpfun ay chuy nuntotonga an trono.