8
Jizọsi bụ nye risi
ọgba-njọ-ẹhni ikne
1 Ka bụ risi kpakara nhne a nookwu, a nwernu nye risi arịohna nụ kpa, nye dazị n'akarikwnunga ngadna eze Chiokike n'oligwe.
2 Nye arịohna nụ kpa zị nọornu ẹrnu nye arịohna nụ Hne Kakwo Nsọ n'oligwe, bụ ezi Ọro-Ẹka Nsọ ke Nyenwe aị wuru, ọ bụ́la badnụ.
3 Nye risi arịohna ọbula jaakwa arịohna nụ nkesi nụ ruwhnu Chiokike, ọ zị mkpa nụ nye ka jeenwerịri nhne o jeeji kwa arịohna.
4 Ọ bụru nụ ọ zị n'ọwa, ọ jọ́obu nye arịohna rịa rịa, kwnornu nụ agịda ele arịohna zị ele naakwa arịohna lele kpa Iwu Mozizi kwuru.
5 Be neezne izi n'Ọro Nsọ ke nhne atụ lele ke zị n'oligwe. Lele kpa Chiokike kannụ Mozizi nga o noowu Ọro-Ẹka Nsọ, “Whnụ nụ i mernu kpakara nhne lele kpa be gesiri ị be n'olu rugwu.”
6 Kọvu ẹrnu ọkwa arịohna ke Jizọsi kakpa ke ele rnụrnu ẹrnu nụ mkpururu iwu ọknani. Ọgba-njọ-ẹhni ke ọ gbarụ n'esilawụru Chiokike nụ ele badnụ kakwo mma, kwnornu nụ o gwuzogwu n'olu mkwna ke kakwo mma.
7 Ọ bụru nụ ọgba-njọ-ẹhni ke mbọm zuru ozu, mkpa ke ẹbo be znéne akpa aị.
8 Kọvu Chiokike whnụrnu nụ ele badnụ zúge ozu, ọ kaa,
“Ọbochi vawa, bụ nhne Jihova kwuru,
nga me nụ ọro Izirẹli nụ ọro Juda,
jaagba njọ-ẹhni ikne.
9 Ọ jọ́onu lele njọ-ẹhni,
me nụ ele nda be gbarụ,
n'ọbochi me jiri be n'aka m
dọhia be n'ẹli Ijipiti,
be kwnátala ovu nụ njọ-ẹhni wam me nụ be gbarụ,
m lemernu m be anya,
bụ nhne Jihova kwuru.
10 Kịtna, ka bụ njọ-ẹhni me nụ ele Izirẹli jaagba
nụ ọbochi ke jaava, bụ nhne Jihova kwuru.
M jeeyisi iwu m nụ rime echiche be,
m jaagbakwasị be n'olu mkpọma be,
m jọoburu Chiokike be,
be jọoburu ele ke m.
11 Ọ zá nye n'esilawụru be ke jeezni ibne a,
mọbu kanụ nwene a, ‘Mahịa Jihova,’
kwnornu nụ kpakara be jaamahịa m,
hite nụ nye zị matị dụ nye ezi.
12 M jaagbarụnu be ọgahie be,
m jéechenwanya mmehie be berere.”
13 Hne o nookwu ọka ọgba-njọ-ẹhni ikne, Chiokike mernu ma ke mbọm zịri ọknani, nhne ọbula mernu ọknani jọodoka ọdoka, whume masị.