Aisaia
Kadäni wakiken Profet kubätä Anutu täŋo manbiŋam yäŋahäŋkuk
2
Aisaia 2:1-5
Yawetä kome terak bänep kwini api pewän ahäneŋ
1 Aisaia, Emos täŋo nanakitä Juda kome ba Jerusalem yotpärareken api ahäwek yäŋ ŋode kaŋpäŋ nadäŋkuk;
2 Kämi-kämi imaka ŋode api ahäwek;
Yawe täŋo pomtä pom ätu bämopiken intäjukuninik api irek. Täŋkaŋ pom uterak kudupi yottä api irek.
Ude irirän äma äbori äbori mäyaptä uken api äbäŋ itneŋ.
3 Äbäŋpäŋ ŋode api yäneŋ; Äbäkaŋ Yawe täŋo pom ŋo terak äroŋpäŋ Jekop täŋo Anutu unitäŋo kudupi yotken ärona.
Äroŋitna kudän ini gäripi nadäk täyak u niwetpäŋ niwoŋäreŋirän kädet nintä täkta iwoyäŋkuko u kaŋ iwatna.
U imata, Yawe täŋo mantä Jerusalem u ahäŋkaŋ api weŋ yäpmäŋ kweko unita.
4 Unitä äma äbori äbori täŋo duŋwewek man yäpän siwoŋ tawäpäŋ äbot kubägän irit api pewän ahäneŋ.
Ude täŋirän ämik täŋo tuŋum däpmäŋ kwäkwä yäŋpewä imaka epän täga tänaŋi nikek api ahäneŋ.
Ude täŋkaŋ äbot kubätä äbot kubäta iwan wari nämo api täneŋ. Ba ämik täkta yäŋpäŋ-nadäk täktäk kädet wari nämo api täneŋ.
5 Eruk, Jekop täŋo äboriye, in äbäkaŋ Yawe täŋo peŋyäŋek gänaŋ itpäŋ kuŋatna!