40
Aisaia 40:1-11
Bänep pidämtak man
1 Anutujintä ŋode yäyak;
Ämawebenaye konäm butewaki terak itkaŋ u päŋku bänepi täŋpidäm taŋpäŋ yäniŋ käwat.
2 Jerusalem nanik kwini man ŋode yäwet; Komi piä nadäŋ yäpmäŋ äbuŋo u paotak. Momijin täŋo kowata nadäwä tärekaŋ. Ekänitä momijin peŋ tamitak yäŋ yäwet.
3 Täŋpäkaŋ äma kubätä gera ŋode yäyak; Kome ämani nämoken Yawe Anutunintä äbäkta kädet täwitpäŋ kaŋ yäpä-siwoŋtaŋ imut!
4 Ume kubat kudup yejämbut ba pom kudup äneŋpewä maŋpäpäŋ uterakgän pekot. Täŋpäŋ kome äpmoŋkaŋ-ärok täŋpewä uterakgän kaŋ irut.
5 Ude täŋirä Yawe täŋo kehäromi ba peŋyäŋektä kwawak ahäŋirän ämawebe kuduptagän api kaŋpäŋ nadäneŋ. Man ŋo Yawetä ini yäŋkuk.
6 Täŋpäkaŋ äma kubätä ŋode näwetkuk; Gera terak yäŋahä! Yäwänä ŋode iwet yabäŋkut; Man jidepäŋ yäŋahäwet?
Yäwawä ŋode yäŋahä yäŋ näwetkuk; Äma kuduptagän u mup ude yäk. U kadäni keräpigän mup irori ude it täkaŋ yäk.
7 Yawetä meni woŋ piäŋirän mup kubit tak täkaŋ ba irori täŋo kaŋgäripi u paot täkaŋ. U udegän ämatä kadäni käroŋi nämo it täkaŋ yäk.
8 Bureni-inik, mup kubit tak täkaŋ ba irori täŋo kaŋgäripi u paot täkaŋ upäŋ Anutunin täŋo manä tärek-täreki nämo api irek.
9 Unita Jerusalem, gäk pom käroŋi kubä terak äroŋpäŋ manbiŋam tägagämän u gera terak yäŋahä. Juda kome täpuri täpuri uken umunkät nämo kwawakinik ŋode yäŋahäŋpäŋ yäwet; Ŋo kawut; Anutujin äbätak!
10 Man u bureni-inik. Ekäni Ärowanitä kehäromi nikek äbätak. Äbäŋpäŋ intäjukun itkaŋ kehäromi u terak ämawebe kuduptagän yabäŋ yäwat piä täk täyak. Täŋkaŋ ŋo kawut! Äbäŋirän ämawebe waki keriken nanik yämaguranitä iwat yäpmäŋ äbäkaŋ.
11 Täŋpäkaŋ Ekäni unitä yawakiye watä säkgämän ŋode it yämik täyak; Sipsip nanaki ude bäyaŋ yämik täyak. Ba miŋiye kwini terak yabäŋ yäwarirän kuŋat täkaŋ.