43
Ụkwa; l'aa-dzọ ndu Ízurẹlu
1 Obenu lẹ nta-a;
ọwaa iphe Ojejoje ekfu;
mbụ onye ono,
bụ iya meru nggụbe Jékọpu;
bụru iya moru
nggụbe Ízurẹlu.
Ọ sụru:
“Ba atsụshi egvu;
kẹle mu gbafụtawaru ngu.
Mu kuru ngu oku;
kukpoo ngu ẹpha ngu;
mbụ l'ị bụ nke mu.
2 Teke iisweta lẹ mini;
bẹ mu nọ-ọ swiru ngu.
Teke ọ bụ ẹnyimu;
bẹ iime t'i rusweta;
b'ẹ t'o rikpudu ngu.
I -je ije l'eli ọku;
b'ẹ t'ọ hụdu ngu;
ọphu ire ọku 'ekedu ngu;
3 kẹ l'ọ bụ mbẹdua bụ Ojejoje, bụ Nchileke ngu;
bya abụru Onye nsọ kẹ ndu Ízurẹlu;
bya abụru onye ndzọfuta ngu.
Ọ bụ ndu Íjiputu;
bẹ mu gude achị ngu ẹja.
Mu gude ndu Kúshi;
mẹ ndu Seba gbata ngu.
4 Keshinu ị dụ mu mkpa;
bya abụru onye aakwabẹ ugvu l'ẹnya mu;
mbụ lẹ keshinu mu yeru ngu obu
bẹ mu e-gude ndiphe gbanweta ngu;
bya eworu mbakeshi nụ l'ụgwo ndzụ ngu.
5 Ba atsụkwa egvu;
kẹle mu nọkwa-a swiru ngu eswiru.
Mu e-shi l'ụzo
ẹnyanwu-ahata dulataru ngu ụnwu ngu;
bya ejekwaphu l'ụzo
ẹnyanwu-arịba je
edulataru ngu ndibe ngu.
6 Mu a-sụ ishi-eli: ‘T'ọ haa ẹphe!’
Mu asụ ọhuda: ‘T'ẹ b'ọ
lọ-dekwa ẹphe!’
T'e shi l'ẹke, teru ẹnya
dulataru mu ụnwegirima mu;
ndu kẹ unwoke!
E shi l'ẹke mgboko jeberu
dulataru mu ndu k'ụnwanyi!
7 Iphe bụ ndu zaru ẹpha laaru mu;
ndu mu keru t'e gude kwabẹ mu ugvu;
ndu mu gude ẹka mu moo;
mee ẹphe dobe: t'e dulata ẹphe.”
8 T'e dufutanu ndu ono,
nweru ẹnya; l'atsụ ìshì ono;
mbụ ndu ono, nweru nchị;
l'ada nkịchi ono.
9 T'e kua iphe bụ mbakeshi t'ẹphe bya edzua;
ndiphe edzukwaaphu.
?Bụ onye ole l'ẹphe kfuru
iphe ono, eme nụ ono.
?Bụ onye kfuru ọphu
mehawaru nụ?
T'ẹphe jenu je ekua ndu ekebe;
t'ẹphe bya ekoshi lẹ nk'ẹphe bụ ire-lanụ;
k'ọphu ndu ọdo a-nụkwanu iya;
bya agbaaru ẹphe ekebe.
10 Ọwaa iphe Ojejoje ekfu.
Ọ sụru:
“L'ọ kwa unu bụ ndu ekebe mu;
bụru unu bụ ndu mu fọtaru
t'unu bụru ndu ozi mu;
k'ọphu unu a-maru mu;
bya ekwetakwaphu nke mu.
Yo dokwaaphu unu ẹnya
l'ọ bụ mu bụ onye ọbu.
Ẹ to nwehekwa Nchileke ọdo, nọnu;
a gụfu mbẹdua;
ọphu ọ dụkwa Nchileke
ọdo, a-nọnu; gbahaa mbẹdua.
11 Mbẹdua; mbụ mbẹdua
gẹdegede bụ Ojejoje;
a gụfu mbẹdua;
b'ẹ tọ dụhedu onye ndzọta ọdo, nọnu.
12 Mu koshiwaru iya ekoshi;
bya adzọta iya dobe;
bya ara iya arara l'ọ bụ
mbẹdua bụ Nchileke;
l'ẹ tọ bụdu agwa ndu ọhodo ono,
unu dobetsuaru ono.
Mbụ ọ bụ unu bụ ndu ekebe mu.”
Ono iphe Ojejoje ekfu ndono.
13 “Keshinu ndiche;
bẹ mu shikpooru bụtaru Nchileke;
ọphu ọ dụdu onye adụ ike
anata mu iphe mu gude.
Mu -mewa iphe;
?bụ onye a-ghazighe iya?”
Ndu Ízurẹlu alaphu azụ l'ọnodu ẹphe
14 Ọwaa iphe Ojejoje ekfu;
mbụ onye ono, gbafụtaru
unu ono, bụ onye nsọ kẹ Ízurẹlu.
Ọ sụru:
“L'ọ bụ l'okfu ẹhu unu;
bẹ mu e-gude zia t'e je Bábyilọnu;
je anyakashịa obu-edukfu Bábyilọnu
l'ụgbo-mini ono,
ẹphe gudetsua eku onwẹphe ono.
15 Ọ kwa mbẹdua bụ Ojejoje ono;
mbụ onye nsọ nke unu ono.
Mbụ onye ono, bụ iya bụ
iphe metaru unubẹ ndu Ízurẹlu;
bya abụru iya bụ eze unu.”
16 Ọwaa, iphe Ojejoje ekfu;
mbụ onye ono, tọru ụzo l'eze ẹnyimu;
bya atọgbo gbororo;
yọ ghajaa eze mini ono.
17 Mbụ onye ono,
chịfutaru ụgbo-ịnya;
mẹ ịnya-ọgu;
bya achịta ndu sọja;
mẹ ndu, maru ẹnya ọgu; l'ẹkalanu.
Ẹphe azẹshia l'ẹke ẹphe
ta byadụ bya egbeshikwadu egbeshi ọdo;
ẹphe anyịshihu;
mbụ phụ-nyishia ẹphe l'ọ bụ iphe-ọku.
18 “Unu zahashịa akahụ iphe;
t'ẹ b'ọ bụshi iphe mehawaru nụ;
bẹ obu unu a-kwa!
19 ?Unu phụnu lẹ mu emewa iphe ọphungu!
Mbụ l'ọ fụshiwa. ?Unu te eledu iya tọo?
Mu a-tọokwa ụzo l'echi-ẹgu;
ẹnyimu a-nọkashia l'alị,
daburu swanmangu.
20 Anụ-ẹgu-ẹgbudu a-kwabẹ mu ugvu; nkụta-ọswa;
mẹ enyi-nwẹnu ajaa mu ajaja;
kẹle mu meru; mini anọdu l'echi-ẹgu;
ẹnyimu anọkashitsua l'alị,
daburu swanmangu;
k'ọphu ndibe mu;
mbụ ndu ono, mu fọtaru ono;
a-phụje mini; ngụa.
21 Ẹphe ajajẹ iya ajaja; raa ya arara
mbụ ndu ono, mu gude ẹka
mu kpụa doberu onwomu ono.”
Ẹjo iphe ndu Ízurẹlu
22 “Obenu lẹ nggụbe Jékọpu
te kwedu araku mu.
Nggụbe Ízurẹlu asụ l'ike mu;
bẹ gvụwaru ngu nụ.
23 Ẹ tị kpụtadu atụru gude
gwooru mu ngwẹja-ukfuru;
ọphu i gbadụru mu ẹja
gude kwabẹ mu ugvu;
ọphu ọ bụdu lẹ mu
bojeru ngu ivu ẹra k'ọgba ngwẹja-nri;
m'ọ bụ mu akpanụkawa
ngu ẹhu ínsẹnsu, asụje t'i nụ mu.
24 Ẹ ti zụtaduru mu kalamọsu, eshi mkpọ;
ọphu i gudedu ẹba iphe
gbaaru mu ẹja gude mee t'ẹhu tsọ mu ẹna.
Iphe i gbe mee bụ l'i meleru
mu phụ iphe dụ
ẹji jeye yọo nyịwa mu ẹra.
Mbụ l'i metawaru mu
iphe dụ ẹji; k'ọphu ike gvụwaru mu.
25 Ọ bụ mbẹdua gẹdegede;
mbụ l'ọo mbẹdua bụ
onye enwefuje ngu iphe dụ ẹji
ngu l'okfu ẹhu nke mu.
Ọphu mu anyatabụaru ngu iphe dụ ẹji.
26 Nyatanụru mu iphe mehawaru nụ;
t'ayi tụkahu okfu.
Doedu t'a maru:
?iswi; ọ dụ ngu mma?
27 Ochechoroche ngu phẹ
meru iphe dụ ẹji.
Ndu ishi ngu kwefuru mu íkè.
28 Ọ bụ iya woshiru ndu ishi ụlo-nsọ mu;
t'ẹphe ha abụhe iya;
bya emee Jékọpu;
yọ bụru kpurupyata;
ndu Ízurẹlu abụru
iphe-ọchi.”