50
1 Ojejoje sụru:
“?Nanụ ẹkwo, ya deru nụ
nne unu gude chịfu iya?
Ndu ya nji ụgwo;
?bụ onye ole bẹ ya woru unu ree?
Ọ kwa iphe dụ ẹji unu;
kparu iphe mu gude woru unu ree.
Ọ bụ iphe dụ ẹji,
unu eme meru iphe a chịfuru nne unu.
2 Lẹ ya byaru; ?bụ ngụnu
meru iphe ẹ to nwedu onye nọ l'ẹke ono?
Teke ya kuru oku;
?bụ ngụnu meru iphe
ẹ tọ dụdu onye zarụ nụ?
?Bụ ẹka iya hanụka
mkpụrukpu k'ọ gbata unu tọo?
?Tọ l'ọo ike ta nọdu iya k'ọdzo unu tọo?
Ọ kwa m̀bà mmanu bẹ ya a-ba;
mini atahụ l'eze ẹnyimu.
Ya ewojeru ẹnyimu mee;
yọ bụru echi-ẹgu.
Ẹgu mini eworu ẹma,
nọ iya nụ gbushia;
yo reshihu; kẹle mini ta nọhedu iya.
3 Ọ bụ mu meru tẹ
akpamigwe gbakọta ọchi;
jihu kpalungu.
Mu abya emee t'uwe-aphụ
bụru iphe o kpuchije onwiya.”
Onye ozi Ojejoje erube ishi
4 Nnajiufu, bụ Ojejoje nụwaru
mu ire ndu maru ẹkwo
tẹ mu maru okfu,
mu e-gudeje agboli onye ike gvụru.
Ooteje mu l'ụtsu mbọku-mbọku;
bya akpalia nchị mu;
yọ nụlahaa iphe abya ememe.
5 Nnajiufu, bụ Ojejoje mewaru
nchị agụ-phohu mu;
ọphu mu ekwefujeduru iya íkè;
ọphu mu aladu azụ azụ.
6 Mu woru okpurukpu-azụ mu
doberu ndu ọphu chiru mu iphe;
bya eworu agba doberu
ndu feshiru mu ẹji-agba;
ọphu mu ewohadu ifu mu
t'ẹ b'a aja mu ewena;
ta gbụ mu ọnu-mini.
7 Keshinu Nnajiufu,
bụ Ojejoje agbajẹru mu
mkpu; bẹ iphere ta byadụ bya eme mu.
Yọ bụru iya kparu iphe mu
shihuru ike l'ọ bụ mkpuma;
yo dokwa mu phu ẹnya
l'iphere te emedu mu.
8 Onye aharu mu enge nọ mu ntse.
?Bụ onye e-kobeghe mu okfu?
T'ayi kpọgba nụ iya!
?Nanụ onye ọbu, ekfu l'o
nweru iphe mu meru?
T'onye ọbu lụfutanu alụfuta!
9 K'ọphu ọ bụ Nnajiufu,
bụ Ojejoje bụ onye
agbajẹru mu mkpu;
?Bụ onye e-kpegbughe mu?
Ndu ọbu a-chịko kashịhu
l'ọ bụ uwe; yọ bụru nra e-rikota ẹphe.
10 ?Bụ onye l'unu ha atsụ Ojejoje egvu;
l'eme iphe nwozi iya kfuru?
Mbụ onye eje ije ọchi;
tọo phụje iphoro;
t'onye ono tukobe ẹpha Ojejoje ishi;
dakobe Nchileke iya!
11 Obenu lẹ nta-a;
iphe bụ ẹge unu ha aphụ-nwu ọku;
mbụ unubẹ ndu mụtatsuaru
ọku l'itsu-ọku unu paru;
unu jenu; unu gude iphoro ọku unu je ije!
Unu gude itsu-ọku,
unu mụtaru ọku; yo nwu enwunwu je!
Ọwaa iphe unu a-nata l'ẹka mu ndọ-ọ:
Ọ bụlephu ntakwuru; bẹ unu a-nọdu eje!