53
1 ?Bụ onye kwetaru ozi, ayi ziru.
?Bụ onye b'e meru t'ọ maru
l'ẹka Ojejoje dụ iya?
2 Kẹ l'ọ nọ iya l'ifu vua
l'ọ bụ oshi, ruru iru;
mbụ l'ọ bụ ọ́gbaragba oshi,
gbafụtaru l'alị ọkponku.
Ẹ tọo madu mma;
tọ dụ ugvu l'ẹnya.
Ụgbugba iya te egbe
agụdu madzụ ẹgu k'iche.
3 Ndiphe kpọru iya ẹbo-ẹbo-l'afụ; jịka iya.
Ọ bụ nwoke, aphụ tsọru;
iphe-ẹhuka akwọwaru iya ẹhu;
ọobuje; ndiphe -phụa ya;
ẹphe aghaa ifu l'ibyiya ọdo.
A kpọru iya ẹbo-ẹbo-l'afụ;
tọ dụ iphe ayi gụberu iya.
4 Obenu l'ọ bụ iya;
bẹ vutaru ẹhu-ọtsu-ụme ayi;
bya evuta aphụ ga atsọru ayi.
Ayi gbẹ rịa l'ọo Nchileke àhụ̀ iya àhụ̀hù;
l'ọo ya chitsuru iya;
l'anụ iya aphụ.
5 E yeru iya ọru l'ẹhu;
okfu l'ayi mesweru.
E chiru iya pyaapyaa;
k'iphe dụ ẹji, ayi meshiru.
Ọ bụ aphụ, a nụru iya;
mekochaaru mee t'ẹhu dụ ayi agu.
Yọ bụru ọnya ẹchachi,
e chiru iya b'e gude mee tẹ ayi ka mma.
6 Ayi l'ayi ha kpaphuhuru
akpaphuhu l'ọ bụ atụru, phuru ụzo.
Onyenọnu chebewaru ifu l'ẹke, dụ iya mma.
Ọ bụ lẹ Ojejoje wowaru ẹjo iphe,
ayi meru l'ọ ha tụ-kobe iya l'ishi.
7 “A kparu iya ẹhu;
mee ya kpakpawowo;
ọ bụ l'ẹ to kfudu okfu.
A kpụtaru iya l'ọ bụ
onye kpụ nwatụru eje egbugbu.
Yọ daa ashị l'ọ bụ atụru,
nọ l'ifu ndu akpụ iya ẹji;
to kfu m'ọo okfu lanụ.
8 A kparu iya ẹhu;
kpee ya nkfugbu;
kpụta iya t'e je egbua.
To nwe onye kparu ishi iya;
kẹ l'e meru iya;
yọ chịhu l'alị ndu nọ ndzụ?
Yọ bụru emeswe, ndu nke
mu mesweru b'e gude chia ya iphe.
9 E doberu iya l'ili ẹke,
eelije ndu meru ẹjo iphe.
Yọ nwụhu; e lia ya l'ili oke amadụ.
Ọ bụ l'ẹ to mebukwanua iphe-kpaa;
ọphu ọ dzụbua ẹjo-ire.”
10 “Obekwanu l'ọ bụ uche-obu
Ojejoje t'e merua ya ẹhu;
mee ya t'o jee iphe-ẹhuka ono.
Ojejoje abya eworu
ndzụ iya mee ngwẹja onye ikpe nmaru.
Ọo-ka nka; phụ ụnwu nwanwa iya.
Yọ bụru l'ẹka iya;
bẹ ee-shi l'eme uche-obu
Ojejoje l'emeshi iya ike.
11 Teke o jetsuaru iphe-ẹhuka ono;
bẹ ọo-phụ iphoro kẹ ndzụ;
yo ji iya ẹpho.
Onye ono, doberu ẹka ndoo,
l'ejeru mu ozi ono
e-gude k'iphe ono,
ọ maru ono mee ndu,
dụ l'igwe t'ẹphe bụru ndu
doberu ẹka ndoo;
Yẹbedua evutakwanụ
iphe dụ ẹji, ẹphe meshiru.
12 Ọo ya bụ lẹ mu e-kevu iya
l'oke, gbaru ndu oke amadụ.
Yọ bụru yẹle ndu
ike ka l'ọgu l'e-ke iphe
a kwaru l'ọkwata;
kẹ l'ọ tọgboru ndzụ iya jeye l'anwụhu.
A gụru iya yeru ndu ẹjo
madzụ; kẹ l'o vutaru
iphe dụ ẹji ndu dụ l'igwe;
rọchiaru ndu iphe dụ ẹji arọ.”