6
Niyolon u Pablo tiꞌ uvaꞌ yeꞌ la bꞌen ixoch tibꞌ unqꞌa niman tetz u Jesús vatz unqꞌa bꞌanol isuuchil u tenameꞌ
1 Asoj at umaj ex uvaꞌ neyaa etibꞌ tukꞌ umaꞌt etitzꞌin etatzik uvaꞌ niman tetz u Jesús, as yeꞌ la uchi uvaꞌ la bꞌen exochoꞌk etibꞌ vatz unqꞌa uxhchileꞌ uvaꞌ yeꞌ ni niman Aak. Pet aꞌ la bꞌen etalkat ok etibꞌ te unqꞌa qitzꞌin qatzikeꞌ uvaꞌ ni ilon esuuchil.
2 As ootzimal setaꞌn uvaꞌ oꞌ la bꞌanon isuuchil unqꞌa tenameꞌ skajayil, jankꞌal oꞌ uvaꞌ at veꞌt ok oꞌ niman tetz u Jesús. As ex la bꞌanon isuuchil unqꞌa tenameꞌ uveꞌ at vatz u txꞌavaꞌeꞌ. Estiꞌeꞌ uvaꞌ at veꞌt etxumbꞌal tiꞌ ebꞌanat isuuchil unqꞌa yaaibꞌeꞌ uveꞌ ni tuch sexoꞌl.
3 ¿As ma yeꞌ ootzimal setaꞌn uvaꞌ oꞌ la bꞌanon isuuchil unqꞌa ángel? ¿As aꞌ kol chit yeꞌ la kutxꞌol kubꞌanat isuuchil unqꞌa yoleꞌ qꞌa tiꞌ u qatineꞌ tzitzaꞌ vatz u txꞌavaꞌeꞌ?
4 Asoj at umaj yaaibꞌ sexoꞌl, ¿as kam stiꞌ qꞌi uvaꞌ nekꞌujbꞌaꞌ umaj uxhchil tiꞌ ibꞌanat esuuchil uvaꞌ yeꞌl tijleꞌm at sexoꞌl?
5 As ni val u yoleꞌ sete tiꞌ unchꞌixvisat ex, tan ¿yeꞌl kol umaj uxhchil qꞌa sexoꞌl uvaꞌ at itxumbꞌal tiꞌ ibꞌanat esuuchil?
6 ¡Pet jitꞌeꞌch nebꞌaneꞌ! Tan neyaa etibꞌ sevatzaj. As pal chit iviꞌ nebꞌaneꞌ, tan netex exoch etibꞌ vatz unqꞌa uxhchileꞌ uveꞌ yeꞌ ni niman u Jesús.
7 As la val sete, tan tul uvaꞌ at u yaaibꞌeꞌ sexoꞌl, as kꞌuchbꞌal tetzeꞌ uvaꞌ elnal veꞌt eqꞌii taꞌn u vaꞌlexheꞌ. As aal bꞌaꞌneꞌ kat koj kuxh ekuy u vaꞌlexheꞌ uveꞌ ni bꞌanax sete.
8 ¡Pet ech koj uveꞌ nebꞌaneꞌ, tan an kuxh ex ni bꞌanon u vaꞌlexheꞌ sevatzaj, tan antu veꞌt ex netelqꞌa veꞌt tibꞌ etetz! ¡As tul etitzꞌin etatzik etibꞌ sevatzaj!
9 ¿As ma yeꞌ etootza uvaꞌ jankꞌal unqꞌa uxhchileꞌ uveꞌ vaꞌlexh kuxh nibꞌaneꞌ, as yeꞌl tokebꞌal xoꞌl u tenameꞌ uvaꞌ at jaqꞌ u tijleꞌm u Tiixheꞌ? As yeꞌ la etaqꞌ etibꞌ subꞌloj, tan ootzimal sqaꞌn uvaꞌ jankꞌal unqꞌa uxhchileꞌ uvaꞌ niyansa tibꞌ tukꞌ umaꞌt uxhchil, tukꞌ unqꞌa uxhchileꞌ uvaꞌ nichuk tixoj, tukꞌ unqꞌa najeꞌ uveꞌ niyansa tibꞌ tukꞌ umaꞌt naj, tukꞌ unqꞌa nachol tzeꞌ tiixheꞌ,
10 as tukꞌ unqꞌa elqꞌomeꞌ, as yeꞌl tokebꞌal xoꞌl u tenameꞌ uvaꞌ at jaqꞌ u tijleꞌm u Tiixheꞌ. As mitaꞌn unqꞌa uxhchileꞌ uveꞌ atoꞌk chit taama tiꞌ u puajeꞌ, tukꞌ unqꞌa qꞌabꞌaꞌmileꞌ, tukꞌ unqꞌa uxhchileꞌ uveꞌ ni paatzin te vimooleꞌ, as tukꞌ unqꞌa uxhchileꞌ uveꞌ ni eesan puaj tiꞌ vimooleꞌ tukꞌ chuli yol.
11 Tan at kaꞌl ex uvaꞌ echik vetxumbꞌaleꞌ tul yeꞌxnik enima viyol u Tiixheꞌ. Pet ech koj cheel, tan josqꞌimal veꞌt vetaanxelaleꞌ. As yeꞌl veꞌt epaav at vatz u Kubꞌaal Tiixheꞌ. As jikla aama veꞌt ex vatz Aak tukꞌ vibꞌii u Kubꞌaal Jesucristo as taꞌn u Tiixhla Espíritu uvaꞌ aqꞌel sqe taꞌn u Tiixheꞌ.
Niyolon u Pablo tiꞌ u yansaibꞌ vatz u Tiixheꞌ
12 As ni talpu umaꞌl u yol sukuxoꞌl uvaꞌ ech ni tal ileꞌ: «Kam uvaꞌ ni tal qaama uvaꞌ la kubꞌaneꞌ as la uch kubꞌanataꞌ,» tiꞌk u yoleꞌ. As an chiteꞌ uveꞌ ni taleꞌ. As ati uvaꞌ jit bꞌaꞌn la bꞌen ibꞌan sqe. As kꞌuxh ni talpeꞌ uvaꞌ: «Kam kuxh ni tal qaama uvaꞌ la kubꞌaneꞌ as la uch kubꞌanataꞌ,» tiꞌk u yoleꞌ, as yeꞌl in la vaqꞌ vibꞌ tiꞌ unbꞌanat u vaꞌlexheꞌ.
13 As at uxhchil ni alon uvaꞌ: «Tetz u quuleꞌ u echbꞌubꞌaleꞌ; as tetz u echbꞌubꞌaleꞌ u quuleꞌ,» uveꞌ ni tal unqꞌa uxhchileꞌ. As an chiteꞌ. As la ilej umaꞌl u qꞌii uvaꞌ mitaꞌn unqꞌa echbꞌubꞌaleꞌ as mitaꞌn u quuleꞌ la txakon veꞌt sqiꞌ taꞌn u Kubꞌaal Tiixheꞌ. As jit tiꞌ u yansaibꞌeꞌ tukꞌ umaꞌtoj uxhchil kat icheesakat u Kubꞌaal Tiixheꞌ u kuchiꞌoleꞌ. Pet aꞌeꞌ la oksan iqꞌii Aak. As Aakeꞌ la bꞌanon u nimla bꞌaꞌnileꞌ te u kuchiꞌoleꞌ,
14 tan echeꞌ uvaꞌ kat ibꞌan Aak te vichiꞌol u Kubꞌaal Jesús tul kat tulsa Aak taama tukꞌ viyakꞌil vibꞌaꞌnileꞌ, as echat tuk ibꞌan Aakeꞌ sqe tul la tulsa Aak qaama unpajte.
15 ¿As ma yeꞌ etootza bꞌa uvaꞌ tetz u Cristo u kuchiꞌoleꞌ? Estiꞌeꞌ yeꞌxhkam kuxh umaj vaꞌlexh la ebꞌan tukꞌ vechiꞌoleꞌ, tan jitꞌeꞌch kat ibꞌan u Cristo tukꞌ vichiꞌioleꞌ. As yeꞌ la uchi uvaꞌ la ok ex kꞌatz umaj ixoj uvaꞌ yanaꞌs.
16 ¿As ma yeꞌxhkam ootzimal setaꞌn uvaꞌ abꞌil uvaꞌ la ikꞌul tibꞌ tukꞌ umaj ixoj uvaꞌ yanaꞌs, as umaꞌl kuxh veꞌt vichiꞌol u najeꞌ tukꞌ u ixojeꞌ la ibꞌaneꞌ? Tan ech ni tal umaꞌl u yol uvaꞌ tzꞌibꞌamal kan uvaꞌ ech ni tal ileꞌ:
Umaꞌl kuxh veꞌt u najeꞌ tukꞌ u ixojeꞌ la ibꞌaneꞌ tukꞌ vichiꞌoleꞌ, tiꞌk u yoleꞌ.
17 Pet abꞌil uvaꞌ atoꞌk kꞌatz u Kubꞌaal Jesús as unvatzul veꞌt u taanxelaleꞌ tukꞌ Aak.
18 Estiꞌeꞌ ni val sete, eteesataj etibꞌ vatz u yansaibꞌeꞌ tukꞌ umaꞌtoj uxhchil, tan yeꞌl umaꞌtoj paav ati uveꞌ ni yansan veꞌt u kuchiꞌoleꞌ. As abꞌil uvaꞌ niyansa tibꞌ tukꞌ umaꞌtoj uxhchil, as aꞌ vichiꞌoleꞌ niyansa.
19 ¿As ma yeꞌ ootzimal setaꞌn uvaꞌ ikabꞌal u Tiixhla Espíritu vechiꞌoleꞌ? Tan aꞌ u Tiixheꞌ kat aqꞌon u Tiixhla Espíritu sete uvaꞌ jejleꞌl tu vetaanxelaleꞌ. Estiꞌeꞌ jit ex ibꞌaal vechiꞌoleꞌ,
20 tan loqꞌel veꞌt ex taꞌn u Jesús tul kat el vikajal Aakeꞌ setiꞌ. Estiꞌeꞌ ni val sete, etoksataj iqꞌii Aak tukꞌ vechiꞌoleꞌ.