13
Sêjam mec Bamaba agêc Saulu
1 Propete to biŋsu, taŋ sêmoa gôlôac dabuŋ Antiokiaŋa ŋalêlôm naŋ tonec, Barnaba agêc Simeon, taŋ sêsam eŋ sebe Niger naŋ, ma Luki aŋga Kurene ma Manaen, taŋ agêc kiŋ Herodo ŋapalêgeŋ sêmoa sêwiŋ tauŋ naŋ, ma Saulu.
2 Ŋasawa teŋ êsêac sêjêm sakiŋ Apômtau to sêjam dabuŋ mo sêmoa, ma Ŋalau Dabuŋ kêsôm gebe “Awaka Bamaba agêc Saulu sa êtu kôm, taŋ kakalem êsêagêc naŋŋa.”
3 Tec sêjam dabuŋ mo ma teteŋ mec, go sêu lemeŋ gêsac êsêagêc ma sêkêŋ êsêagêc sêja.
Aposolo sêjam mêtê aŋga Kupro
4 Ŋalau Dabuŋ kêsakiŋ êsêagêc e sêsêp Selaikia sêja. Aŋga tonaŋ sêlac jasêsô nuc Kupro.
5 Sêmoa Salami ma sêsôm Anôtônê biŋ lasê aŋga Judanêŋ lôm. Ma Joaŋ gêjam sakiŋ gêmoa gêwiŋ êsêagêc.
6 Go ac sêsêlêŋ têdaguc nuc samuc tonaŋ e jasêô lasê Papo. A ŋga Papo têtap ŋac Judaŋa teŋ sa. Eŋ mecwaga teŋ to propete dansaŋ, nê ŋaê Barjesu.
7 Ŋac tau gêmoa gêwiŋ gôliŋwaga Sergi Paulus, eŋ ŋac tokauc teŋ. Ŋac tonaŋ kêkalem Barnaba agêc Saulu dêdêŋ eŋ sêja, ŋam eŋ gebe êŋô Anôtônê biŋ.
8 Mago mecwaga Eluma (lau Helen sêjam ênê ŋaê ôkwi amboac tonaŋ) gêlêc biŋ sa êsêagêc ma gêgôm gêŋlêlôm gebe ênam gôliŋwaga ôkwi êkêŋ êwiŋ mêtê atom.
9 Tec Saulu, taŋ sêsam eŋ teŋ gebe Paulu naŋ, Ŋalau Dabuŋ gêjam eŋ auc ma kêpuc mata tôŋ eŋ
10 ma kêsôm gebe “Aôm Sadaŋ latu. Biŋdansaŋ to alôb-alôb gêjam aôm auc samucgeŋ, tec kôkêŋ kisa gêdêŋ biŋ gêdêŋ samob. Aôm gôjam Apômtaunê intêna solop ôkwi ŋapaŋ. Êndêŋ ondoc, go ôwi siŋ.
11 Ôlic acgom, galoc Apômtaunê lêma oc ênac aôm gebe matampec êsa ôlic oc êtiam atom e ŋasawa teŋ acgom.” Ma sep tageŋ ŋakanuc to ŋakesec kêkôm eŋ auc ma gesom lau kêlêsageŋ gebe sêkam eŋŋa.
12 Gôliŋwaga gêlic gêŋ tonaŋ tec kêtakê kêtu Apômtaunê mêtêŋa e kêkêŋ gêwiŋ.
Paulu agêc Barnaba sêmoa Antiokia Pisidiaŋa
13 Paulu to nê lau sêpi waŋ aŋga Papo ma sêlac e jasêsô Perge, taŋ gêc Pampulia naŋ. Go Joaŋ kêtaiŋ tau su aŋga êsêagêcnêŋ ma gêmu gêja Jerusalem.
14 Sêwi Perge siŋ ma sêsêlêŋ e sêô lasê Antiokia Pisidiaŋa. Gêdêŋ sabat sêsô Judanêŋ lôm jasêŋgôŋ.
15 Lômmôkê sêsam Mosenê biŋsu to propetenêŋ biŋ lasê su acgom, go sêsakiŋ biŋ gêdêŋ êsêagêc gêja gebe “O lasitêwaagêc, biŋ êpuc lau tôŋŋa embe ênêc amagêcŋa, go asômmaŋ.”
16 Tec Paulu gêdi sa gêjab lêma êsêac ma kêsôm gebe
“O Israelwaga to amac, taŋ atêc Anôtô naŋ, akêŋ taŋem acgom.
17 Lau Israel tonec nêŋ Anôtô kêjaliŋ tameŋi sa ma ketoc lau tau sa gêdêŋ taŋ sêŋgôŋ nom jaba Aiguptu naŋ, go gêôc lêma sa ma gêwê êsêac aŋga tonaŋ sêsa sêja.
18 Ma gêlôm êsêac sêmoa gamêŋ sawa kêtôm jala 40.
19 Go geseŋ nom Kanaan ŋalaum 7 su ma gêjac sam ŋagamêŋ tau gêdêŋ êsêac sêwê kaiŋ,
20 kêtôm jala 450.
“Tonaŋ su, go kêkêŋ gôliŋwaga gêdêŋ êsêac e gêdêŋ propete Samuel nê têm.
21 Gêdêŋ ŋasawa tonaŋ teteŋ kiŋ e Anôtô kêkêŋ Kis latu Saulu aŋga Benjaminnê gôlôac kêtu nêŋ kiŋ kêtôm jala 40.
22 Go kêsap eŋ tulu ma ketoc Dawid sa kêtu nêŋ kiŋ. Anôtô gêwa ŋac tonaŋ sa amboac tonec gebe ‘Aê katap Isai latu Dawid sa, naŋ ŋoc ŋalêlôm galic eŋ ŋajam. Eŋ oc êŋgôm aêŋoc biŋ samob êtu tôŋ.’
23 Aŋga ênê wakuc Anôtô kêkêŋ kêsiwaga Jesu gêdêŋ lau Israel kêtôm gêjac mata.
24 Jesu kêtu awê atomgeŋ, ma Joaŋ kêsôm mêtê lasê gêdêŋ lau Israel samob kêpi busaŋgu sênam tauŋ ôkwiŋa.
25 Kêdabiŋ gebe Joaŋ ênac mata nê koleŋ ma kêsôm gebe ‘Amac abe aê asa. Aê ŋac tau, taŋ asaê amoa naŋ atom. Alic acgom, ŋac tau oc êndaŋguc aê ma aê katôm gebe janac pêla ênê atapa ŋalêkôŋ atom.’
26 “O lasitêwaac, Abraham latui amac ma amac lau, taŋ atêc Anôtô naŋ, Anôtô kêsakiŋ biŋ moasiŋŋa tonaŋ gêdêŋ aêac.
27 Lau taŋ sêŋgôŋ Jerusalem naŋ, to nêŋ laumata sêjala Jesu tônê to propetenêŋ biŋ, taŋ sêsam kêtôm sabatgeŋ naŋ atom. Mago sêkic ênê biŋ, tec sêgôm biŋ tau ŋanô kêsa.
28 Êsêac têtap ênê keso enseŋ eŋ suŋa teŋ sa atom, mago teteŋ Pilata gebe ênac eŋ êndu.
29 Êsêac sêgôm biŋ samob, taŋ teto kêpi eŋ naŋ, ŋanô kêsa su acgom, go sêkôc eŋ su aŋga ka jatetoc eŋ gêc sêô.
30 Go Anôtô gêŋu eŋ sa aŋga ŋacmatênêŋ.
31 Bêc taêsam eŋ geoc tau lasê gêdêŋ êsêac, taŋ sêwiŋ eŋ aŋga Galilaia sêpi Jerusalem sêja. Ma lau tau tec galoc sêwa eŋ ŋam sa gêdêŋ lau sêmoa.
32 Ma aêac asôm ŋawae ŋajam, taŋ Anôtô gêjac mata gêdêŋ tameŋi naŋ, lasê gêdêŋ amac.
33 Ma biŋ tau Anôtô gêgôm ŋanô kêsa kêpi êsêac latuŋi aêac, gedeŋ taŋ gêŋu Jesu sa, kêtôm biŋ, taŋ teto gec Pesalem kêtu luagêcŋa gebe
‘Aôm kôtu aêŋoc Latuc,
galoc katu aôm Tamam.’
34 Anôtô gêŋu eŋ sa aŋga ŋacmatênêŋ, gebe ôli êtu palê atomŋa. Eŋ geoc biŋ tonaŋ lasê kwanaŋgeŋ ma kêsôm gebe
‘Aê gabe jakêŋ Dawidnê gêŋ dabuŋ to ŋaŋêŋ tau êndêŋ amac.’
35 Ma kêsôm ŋagêdô gêc madiŋ teŋ gêwiŋ gebe
‘Aôm oc ôkêŋ nêm ŋac dabuŋ ôli êtu palê atom.’
36 Gebe Dawid tê gêjam sakiŋ kêtôm Anôtônê biŋ gêdêŋ tau nê launêŋ têm, go gêc nê bêc ma sêsuŋ eŋ gêwiŋ tamai ma ôli kêtu palê.
37 Ma ŋac, taŋ Anôtô gêŋu eŋ sa naŋ, ôli kêtu palê atom.
38-39 O Lasitêwaac, amboac tonaŋ ajala tonec êwiŋ acgom. Aêac asôm lasê êndêŋ amac gebe Anôtô kêsuc sec samob ôkwi kêtu ŋac tônêŋa. Samob taŋ sêkêŋ êwiŋ eŋ naŋ, têtu lau gêdêŋ. Mosenê biŋsu êtôm gebe enseŋ aêacnêŋ sec su e tatu lau gêdêŋ nec atom.
40 Amboac tonaŋ alic taôm gebe biŋ, tec propete sêsôm nec, êtap amac sa atom
41 gebe
‘Amac aseŋ-biŋwaga alic acgom,
oc aŋac lemem, mago anaŋa,
gebe êndêŋ amacnêm têm aê oc janam ŋoc kôm teŋ.
Embe sênac kôm tau ŋamiŋ, oc akêŋ êwiŋ atom.’ ”
42 Ŋac ulu sebe sêsa awê sêna ma lau teteŋ êsêagêc gebe êndêŋ sabat teŋ sêsôm biŋ tonaŋ ŋagêdô êndêŋ êsêac êtiam.
43 Lau sêsa aŋga Judanêŋ lôm ma Judawaga to nêŋ lau lêŋŋa taêsam, taŋ têtêc Anôtô naŋ, têdaguc Paulu agêc Barnaba. Agêc sêsôm biŋ to sêjac biŋsu êsêac gebe siŋ Anôtônê moasiŋ tôŋgeŋ.
44 Gêdêŋ sabat, taŋ kêdaguc naŋ, lau malacŋa ec jauc sêkac tau ŋ sa sebe sêŋô Apômtaunê mêtê.
45 Judawaga sêlic lau taêsam tonaŋ e têntac sec ma sêsôm biŋ alôb-alôb sêôc Paulunê biŋ aucgeŋ.
46 Tec Paulu agêc Barnaba sêsôm totêntac kêpa sugeŋ gebe “Aêagêc ajac ŋawae gebe asôm Anôtônê mêtê êndêŋ amac êtu ŋamata. Mago amac atiŋ mêtê to amac taôm asaê taôm atôm aŋgôŋ matem jali teŋgeŋŋa atom, tec aêagêc andêŋ lau samuc ana.
47 Gebe Apômtau kêjatu aêac amboac tonecgeŋ gebe
‘Aê kakêŋ aôm kôtu lau samuc nêŋ ja,
gebe ônam lau kêsi e naêndêŋ nom ŋamadiŋ naŋ.’ ”
48 Lau samuc sêŋô biŋ tonaŋ e têntac ŋajam kêsa ma sêlambiŋ Anôtônê mêtê. Ma êsêac samob, taŋ Anôtô kêjaliŋ êsêac sa gebe sêŋgôŋ mateŋ jali teŋgeŋ naŋ, tec sêkêŋ gêwiŋ.
49 Ma Apômtaunê mêtê kêtu tapa gêjam gamêŋ samob auc.
50 Tageŋ Judawaga sêkalom lauo towae, taŋ têtêc Anôtô naŋ, to malac tonaŋ ŋakasêga ŋanô-ŋanô e sêli launêŋ ŋalêlôm sa gebe sênac Paulu agêc Barnaba. Tec têtiŋ êsêagêc aŋga nêŋ gamêŋ sêsa sêja.
51 Agêc dedoŋ kekop aŋga eŋkaiŋ su, gebe lau tau nêŋ biŋ êpi êsêac tauŋ, ma sêja Ikonium.
52 Ŋacseŋomi têntac ŋajam kêsa to ŋalau Dêbu ŋ gêjam êsêac auc.