26
Paulu gêjac kolec tau
1 Go Agripa kêsôm gêdêŋ Paulu gebe “Aê galôcgac gebe ôwaka taôm sa.” Kêsôm su, go Paulu kêmêtôc lêma ma gêjam talaŋ tau gebe
2 “O kiŋ Agripa, Judawaga sêgôliŋ biŋ kêpi aê elêmê e galoc têtac ŋajam gebe jawaka tauc sa jakô aôm laŋômnêm.
3 Aê têtac ŋajam kêlêlêc ŋam gebe aôm kôjala Judawaganêŋ mêtê to nêŋ biŋ sêpê tauŋŋa samob tomalageŋ. Amboac tonaŋ tec jateŋ aôm gebe ôpuc taôm tôŋgeŋ ma ôkêŋ taŋam ŋoc biŋ acgom.
4 “Judawaga samob sêlic aêŋoc lêŋ ŋapalêgeŋŋa, taŋ gamoa gawiŋ ŋoc lau to gêŋgôŋ Jerusalem naŋgac.
5 Êsêac sêjala wanêcgeŋ su gebe aê Parisai. Embe taêŋ ênam, go tauŋ sêwa biŋ tonec sa gebe gajam sakiŋ Anôtô kasa êôc lêŋ kêdaguc Parisainêŋ gôliŋ ŋajaŋa kaiŋ teŋ.
6 Anôtô gêjac mata biŋ gêdêŋ aêac tameŋi gebe ŋanô êsa, tec kakêŋ matoc gamoa ma galoc katap mêtôc sa kêtu biŋ tauŋa.
7 Aê kakêŋ matoc biŋ, taŋ aêacnêŋ gôlôac sêkêŋ mateŋ gebe têtap saŋa naŋ, ma sêjam sakiŋ Anôtô kêtôm bêc to geleŋgeŋ kêtu biŋ tonaŋŋa. O kiŋ, kêtu biŋ, taŋ takêŋ mateŋ tamoa naŋŋa, tec Judawaga sêgôliŋ biŋ kêpi aê.
8 Amboac ondoc tec akêŋ gêwiŋ biŋ, naŋ Anôtô êŋu ŋacmatê sêndi saŋa naŋ atom.
9 “Gêmuŋgeŋ ŋoc ŋalelôm taêc gêjam elêmê gebe janseŋ Jesu Nasaretŋa nê ŋaê su ŋa kisa tokaiŋ-tokaiŋ.
10 Geŋ amboac tonaŋ tec gagôm aŋga Jerusalem. Aê kakôc ŋaclai aŋga lau dabuŋsêga nêŋ ma kakeŋ Anôtônê lau gwalekiŋ sêsêp kapoacwalô sêja, ma gêdêŋ taŋ sêkic êsêacnêŋ biŋ naŋ, aê kasôm gawiŋ.
11 Aê kalêsu êsêac todim-todim kêtôm Judanêŋ lôm samobgeŋ ma kakac êsêac gebe sêsêm biŋ alôb-alôb. Ŋoc ŋalêlôm kêpuc aê melocŋa ma kêjanda êsêac e gagôm aŋga malac gameŋbômŋa gêwiŋ.
Paulu gêjac tau nê miŋ Apômtau Jesu gêjam eŋ ôkwiŋa
12 “Amboac tonaŋ kakôc ŋaclai aŋga lau dabuŋsêga nêŋ ma sêsakiŋ aê gaja Damaskus.
13 O kiŋ, kasêlêŋ gamoa intêna e gêdêŋ oc kêkô ŋaluŋ ma galic ŋawê aŋga undambê ŋawasi kêlêlêc oc su mêŋkêpô aê to lau, taŋ sêwiŋ aê naŋ, e gêjam aucgeŋ.
14 Aêac samob au tauŋ jaaêc nom, ma gaŋô awa teŋ kêsôm ŋa Ebolai aweŋ gêdêŋ aê gebe ‘Saulu, Saulu, asageŋ kôjanda aê. Kêm taŋ gêjam aôm naŋ, ôwê sa ôtôm atom.’
15 Ma aê kasôm gebe ‘Apômtau, aôm asa.’ Tec Apômtau kêsôm gebe ‘Aê Jesu tec kôjanda aê.
16 Amboac tonaŋ ôndi sa ôkô ŋajaŋa. Aê gaoc tauc lasê gadêŋ aôm, gabe jamansaŋ aôm ôtu ŋoc sakiŋwaga ma ôwa biŋ, taŋ gôlic su to biŋ, naŋ jatôc êndêŋ aôm naŋ sa.
17 Aê gabe janam aôm sa aŋga Judawaganêŋ to aŋga lau samuc, taŋ gabe jasakiŋ aôm ôndêŋ êsêac ôna naŋ nêŋ amboac tonaŋ.
18 Ôŋgôm êsêac mateŋ êlêc e sênam tauŋ ôkwi aŋga ŋakesecŋa dêndêŋ ŋawê to aŋga Sadaŋnê ŋaclai dêndêŋ Anôtô sêna. Go jasuc êsêacnêŋ sec ôkwi kêtu sêkêŋ gêwiŋ aêŋa ma sêwê kaiŋ gêŋlênsêm sêwiŋ Anôtônê lau.’
Paulu gêwa mêtê sa gêdêŋ Judawaga to lau samuc
19 “O kiŋ Agripa, amboac tonaŋ tec taŋocpêc gêdêŋ biŋ undambêŋa, taŋ galic naŋ atom.
20 Aê gawa sa gêdêŋ êsêac, taŋ sêŋgôŋ Damaskus kêtu ŋamata to gêdêŋ Jerusalem ma Judaia ŋagamêŋ samob ma gêdêŋ lau samuc, gebe sênam tauŋ ôkwi dêndêŋ Anôtô sêna to sênam nêŋ koleŋ ŋasakiŋ êwaka êsêac sa, gebe sêjam tauŋ ôkwi su.
21 Kêtu biŋ tonaŋŋa tec Judawaga sêkôc aê tôŋ aŋga lôm dabuŋ sebe sênac aê êndu.
22 Anôtô tec kêpuc aê tôŋ gêmoa e galoc kakô tonec ma gawa biŋ sa gêdeŋ lau sauŋ to kapôêŋ. Aê kasôm biŋ wakuc teŋ atom, kasôm biŋ tageŋ, taŋ propete to Mose sêsôm kêpi geŋ, taŋ oc ŋanô êsaŋa naŋgeŋ,
23 gebe Kilisi kêkôc ŋandaŋ ma gêdi sa aŋga ŋacmatênêŋ kêtu ŋamata to kêtu ŋawê kêpô Judawaga to lau samuc gawiŋ.”
Paulu keteŋ Agripa gebe ênam tau ôkwi
24 Paulu kêwaka tau sa amboac tonaŋ kêkô ma Peste gêmôêc kapôêŋ gebe “Paulu, aôm meloc. Kôpuc biŋ taesam ŋam e gêgôm nêm kauc kêlênsôŋ.”
25 Go Paulu gêjô eŋ awa gebe “O ŋac towae Peste, meloc gêgôm aê atom, aê kasôm biŋŋanô ma biŋ tokauc.
26 Kiŋ kêjala biŋ tonecgac, amboac tonaŋ tec aê kasôm ŋoc biŋ totêtac kêpa sugeŋ gêdêŋ eŋ, gebe aê kajalagac, eŋ keso biŋ samob tonec ŋai ŋateŋ atom, gebe gêŋ tau kêsa aŋga gamêŋ ŋakêsiŋ teŋ atom, ŋanô kêsa gêc awêgeŋ.
27 O kiŋ Agripa, aôm oc kôkêŋ gêwiŋ propetenêŋ biŋ me masi. Aê kajala gebe aôm kôkêŋ gêwiŋgac.”
28 Ma Agripa kêsôm gêdêŋ Paulu gebe “Ŋasawa dambê tecenecgeŋ aôm gobe ônam aê ôkwi jatu ŋac Kilisiŋa.”
29 Tec Paulu kêsôm gebe “Aê jateŋ Anôtô gebe ŋasawa dambê me baliŋ, go aôm taômgeŋ atom, amac lau samob, taŋ galoc aŋô ŋoc biŋ naŋ, atôm aêgeŋ, tageŋ kapoacwalô tec êŋgôm amac êwiŋ atommaŋ.”
30 Go kiŋ agêc gôliŋwaga ma Bernike to nêŋ lau dêdi
31 jasêsa ma sêsôm gêdêŋ tauŋ gebe “Ŋac tônê gêgôm sec teŋ amboac êmac êndu to êŋgôŋ kapoacwalôŋa atom.”
32 Ma Agripa kêsôm gêdêŋ Peste gebe “Ŋac tônê embe awa ênac kaisara atom, oc taŋgamboac eŋ su.”