3
Ŋac ŋatêkwa kêtu goloŋ ôli ŋajam kêsa
Ŋasawa teŋ Petere agêc Joaŋ sêpi lôm dabuŋ sêja sebe teteŋ mec êndêŋ ŋanoc ocmataŋa. Ma ŋac teŋ gêmoa tonaŋ. Têna kêkôc eŋ akaiŋ to lêma kêtu goloŋ. Kêtôm bêcgeŋ lau sêbalaŋ eŋ jatetoc eŋ gêŋgôŋ lôm dabuŋ ŋakatam, taŋ sêsam gebe Katamŋajam naŋ, gebe eteŋ gêŋ êndêŋ lau, taŋ sêsô lôm dabuŋ sêna naŋ. Ŋac tau gêlic Petere agêc Joaŋ sebe sêsô lôm dabuŋ sêna, tec keteŋ gêŋ gêdêŋ êsêagêc. Tec Petere agêc Joaŋ mateŋ gê eŋ e Petere kêsôm gebe “Matam ê aêagêc acgom.” Ma ŋac tau mata gê êsêagêc gêjam kauc gebe sêkêŋ gêŋ êndêŋ eŋ. Go Petere kêsôm gebe “Silber to gold gêc aêŋa atom, ma gêŋ, taŋ gêc aêŋa naŋ, tec gabe jakêŋ êndêŋ aôm. Gajam Jesu Kilisi Nasaretŋa laŋô gebe Ôsêlêŋ.” Go kêkam eŋ gêdêŋ lêma anôŋa ma gegeŋ eŋ sa. Ma gaôgeŋ ŋac tau atapa to agwam ŋajaŋa kêsa, ma gêboaŋ sa jakêkô ma kêsêlêŋ, go gêwiŋ êsêagêc kêsô lôm dabuŋ jakêlambiŋ Anôtô to kêsêlêŋ gêboaŋ kêpigeŋ. Lau samob sêlic eŋ kêlambiŋ Anôtô gegeŋ taugeŋ gêmoa, 10 ma sêjala gebe ŋac, taŋ gêŋgôŋ kêsi lôm dabuŋ ŋaKatamŋajam ma keteŋ-keteŋ gêŋ gêmoa naŋ, ŋac tau tonecgoc. Ma sê taêŋ to sêŋac lemeŋ kêtu gêŋ, taŋ kêtap eŋ sa naŋŋa.
Petere gêjam mêtê gêmoa Salomonê lôm seleb
11 Ŋac tau kêsap Petere agêc Joaŋ tôŋ ŋapaŋ, tec lau samob sê taêŋ ma sêkac sa dêdêŋ êsêac sêja jasêkô lôm sêlêb, taŋ sêsam gebe Salomonê naŋ. 12 Petere gêlic lau tonaŋ ma awa gêjac êsêac gebe “Amac lau Israelwaga, asageŋ asôm biŋ selec kêtu ŋac tonecŋa ma matemanô gêdêŋ aêagêc kêtu asageŋŋa. Abe aêagêc tauŋ ma ŋaclai to ŋajam tec agôm eŋ kêsêlêŋ nec me. 13 Abraham agêc Isak ma Jakob nêŋ Anôtô ma tameŋi samob nêŋ Anôtô kêkêŋ nê sakiŋwaga Jesu nê ŋawasi kêsa. Ŋac tonaŋ, taŋ amac akêŋ eŋ gêdêŋ ŋacjo ma asa eŋ auc akô Pilata laŋônêm. Pilata gebe êŋgamboac eŋ su, 14 mago amac asa ŋac dabuŋ to gêdêŋ tau auc ma ateŋ gebe sêŋgamboac ŋac, taŋ gêjac ŋamalac êndu naŋ, su êndêŋ amac. 15 Ŋac tau gebe êwê amac aŋgôŋ matem jali, mago ajac eŋ êndu, naŋ tec Anôtô gêŋu eŋ sa aŋga ŋacmatênêŋ, aêac alic gêŋ tau tec asôm lasê. 16 Ma ŋac tau, naŋ amac alic to ajala eŋ naŋ, kêkêŋ gêwiŋ Jesunê ŋaê, tec ŋaê tau gêjam eŋ sa. Jesu kêpuc ŋac tau tôŋ kêkêŋ gêwiŋ, tec gêgôm eŋ ôli samucgeŋ ŋajam kêsa tec alic eŋ kêkô amac samob laŋômnêmŋa.
17 “O lasitêwaac, aê galicgac gebe amac ajam kauc tê agôm, ma amacnêm kasêga sêjam kauc amboac tonaŋgeŋ. 18 Anôtô gêgôm nê biŋ, taŋ gêôc propete samob aweŋ sa ma sêsôm lasê gebe Kilisi êkôc ŋandaŋ naŋ, ŋanô kêsa. 19 Amboac tonaŋ ambu taôm ma anam taôm ôkwi gebe nêm sec ênaŋa, 20 ma têm moasiŋŋa aŋga Apômtaunê laŋôanô mêŋêsa wacêlau amac tekwem saki êsa, ec êkêŋ Kilisi Jesu, taŋ kêjaliŋ sa kêtu amacŋa kwanaŋgeŋ naŋ êmêŋ. 21 Ŋac tau êmoa undambê e êndêŋ têm Anôtô êmansaŋ gêŋ samob êtu wakuc êtiam, amboac kêsôm lasê gêôc propete dabuŋ aweŋ sa gêdêŋ andaŋgeŋ naŋ. 22 Mose kêsôm gebe ‘Apômtau, amacnêm Anôtô, oc êŋu amacnêm propete teŋ sa aŋga lasimi to tewemi nêŋ êtôm aê, ma biŋ samob, taŋ eŋ êsôm êndêŋ amac naŋ, akêŋ taŋem. 23 Lau embe sêkêŋ taŋeŋ propete tau tonaŋ nê biŋ atom, oc Anôtô enseŋ êsêac samob su aŋga nê launêŋ.’ 24 Propete samob, Samuel to êsêac, taŋ têdaguc naŋ, sêsôm to sêkêŋ têm tonaŋ ŋawae. 25 Propete latuŋi amac to poac, taŋ Anôtô kêmoatiŋ gêdêŋ tamemi naŋ, ŋalatui amac. Anôtô kêmoatiŋ poac tau gêdêŋ Abraham ma kêsôm gebe ‘Êtu nêm wakucŋa laum nomŋa samob têtap moasiŋ sa.’ 26 Anôtô kêtôc nê sakiŋwaga gêdêŋ amac kêtu ŋamata ma kêsakiŋ eŋ gebe êmoasiŋ amac e anam taôm ôkwi êndêŋ-êndêŋgeŋ ma awi nêm sec tokaiŋ-tokaiŋ siŋ.”