34
Lau Israel nêŋ gejobwaga
1 Apômtau kêsôm biŋ tonec gêdêŋ aê gebe
2 “O ŋamalac latu, oc biŋ lasê êkanôŋ lau Israel nêŋ gejobwaga. Oc biŋ lasê ma ôsôm êndêŋ êsêac gebe Apômtau Anôtô kêsôm biŋ tonec gebe Ojae, amac gejobwaga Israelŋa, amac ajop taômgeŋ. Gejobwaganêŋ kôm gebe sejop domba nec atom me.
3 Amac aeŋ ŋalêsi to asô ŋakwê, taŋ awa ŋa domba ŋaôlilu ma abuc domba ŋajam to aeŋ ŋamêsôm tau, mago amac alôm domba tau atom.
4 Amac apuc gêŋ palê-palê tôŋ atom to agôm êsêac, taŋ gêmac gêgôm êsêac naŋ, ôliŋ ŋajam kêsa atom. Amac asabaŋ êsêacnêŋ kamoc atom ma ajoŋ êsêac, taŋ seo sic naŋ, sa ma awê êsêac sêmu sêmêŋ atom to asom êsêac, taŋ sêjaŋa naŋ, atom amboac tonaŋgeŋ
5 Tec lau sêjac domba tau saliŋ-saliŋ e têtu bôcbôm samob nêŋ gwada gebe nêŋ gejobwaga masi.
6 Êsêac sêjac ŋoc domba saliŋ-saliŋ e seo sic sêmoa lôc to gamêŋ ŋabau samob. Êsêac sêjac ŋoc domba saliŋ-saliŋ e sêjam nom ŋagamêŋ samob auc. Ma ŋac teŋ gêjam jaom êsêac to gesom êsêac atom.
7 “Amac gejobwaga, galoc aŋô biŋ, taŋ aê Apômtau gabe jasôm êndêŋ amac naŋ acgom.
8 Aê gamoa matoc jali biŋŋanôgeŋ, tec jasôm êtu tôŋ gebe Aêŋoc domba têtu bôcbôm nêŋ gwada ma bôcbôm samob seŋ ŋoc domba kêtu êsêacnêŋ mo gebe domba nêŋ gejobwaga masi. Aêŋoc gejobwaga sesom ŋoc domba atom. Gejobwaga sêlôm tauŋgeŋ ma sêlôm ŋoc domba atom.
9 Kêtu biŋ tonaŋ ŋaiŋa amac gejobwaga akêŋ taŋem ŋoc biŋ acgom.
10 Aê Apômtau Anôtô jasôm lasê gebe aê oc jakalem gejobwaga gebe sêwa nêŋ biŋ sa. Aê oc jaka jaê ŋoc domba aŋga êsêacnêŋ ma janac jao gebe sejop ŋoc domba êtiam. Ma gejobwaga sejop tauŋ êtiam atom amboac tonaŋgeŋ. Ma aê gabe janam ŋoc domba kêsi aŋga êsêacnêŋ aweŋsuŋ e têtu êsêacnêŋ gwada atom.”
Ŋacgejob ŋajam
11 “Aê Apômtau Anôtô jasôm êndêŋ amac gebe aê taucgeŋ gabe jansom ŋoc domba ma jajop êsêac.
12 Aê gabe jajop êsêac êtôm ŋacgejob gêjam jaom nê domba, taŋ lau sêjac saliŋ-saliŋ sêmoa gamêŋ samob naŋ. Aê gabe janam ŋoc domba kêsi aŋga gamêŋ samob, taŋ lau sêjac êsêac saliŋ-saliŋ gêdêŋ ômbiŋ to ŋakesec kêkôm gamêŋ auc naŋ.
13 Aê gabe jakôc êsêac su aŋga gamêŋ jaba tau ma jajoŋ êsêac sa to jawê êsêac sêmu dêndêŋ tauŋ nêŋ gamêŋ sêmêŋ êtiam. Aê oc jalôm êsêac aŋga lôc to gaboaŋ Israelŋa ma aŋga gamêŋ tau ŋamala ŋajamanô.
14 Aê gabe jalôm êsêac ŋa gêgwaŋ ŋajam ma êsêac sêniŋ gêgwaŋ tau aŋga Israel ŋalôc. Aŋga tônê êsêac sêlêwaŋ tauŋ aŋga gamêŋ wale-wale ma sêniŋ gêgwaŋ ŋajamanô aŋga Israel ŋagamêŋ.
15 Aê taucgeŋ gabe jatu ŋoc domba nêŋ gejobwaga ma gabe jatap gamêŋ sêlêwaŋ tauŋŋa teŋ sa êtu êsêacŋa. Aê, Apômtau Anôtô tauc kasôm biŋ tonaŋ.
16 “Aê gabe jansom êsêac, taŋ sêjaŋa naŋ, ma jajoŋ êsêac, taŋ seo sic naŋ, sa to jawê êsêac sêmu sêmêŋ ma jansambaŋ êsêacnêŋ kamoc to jaŋgôm êsêac, taŋ gêmac gêgôm êsêac naŋ, ôliŋ ŋajam êsa, mago onaŋ, taŋ toŋalêsi ma toôliŋwalô naŋ, aê oc janseŋ su. Aê oc jatu êsêacnêŋ ŋacgejob gêdêŋ tau.
17 “O ŋoc domba, amboac tonaŋ aê, Apômtau Anôtô jasôm êndêŋ amac gebe Aê gabe jamêtôc domba êndêŋ-êndêŋgeŋ ma jawa domba kapoac to noniŋ kapoac êkôc.
18 Amboac ondoc amac ŋagêdô aeŋ gêgwaŋ ŋajamanôgeŋ jakêtôm atom, tec amac aka gêŋ, taŋ amac aniŋ atom naŋ, popoc nec. Amac anôm bu ŋakêŋkêŋ, tec agôm onaŋ, taŋ amac anôm atom naŋ, ŋamôp kêsa.
19 Ma aêŋoc domba ŋagêdô oc sêniŋ gêgwaŋ, taŋ amac aka popoc naŋ, ma sênôm bu, taŋ amac agôm ŋamôp kêsa naŋ.
20 “Amboac tonaŋ aê, Apômtau Anôtô jasôm êndêŋ amac gebe Aê tauc jamêtôc amac domba, taŋ atôp e ŋatêku masi naŋ, to amac, taŋ ôliŋ ŋasaŋ naŋ.
21 Amac alêsuc domba palê-palê to asap êsêac ŋa nêm jabo e atiŋ êsêac su aŋga toŋ ŋalêlôm.
22 Mago aê oc janam ŋoc domba kêsi. Êsêac têtu nêm gwada êtiam atom. Aê oc jamêtôc domba samob êndêŋ-êndêŋgeŋ.
23 Aê oc jakêŋ ŋoc sakiŋwaga Dawid êtu êsêacnêŋ gejobwaga. Eŋ oc êlôm êsêac ma êtu nêŋ ŋacgejob ŋanô.
24 Aê Apômtau tauc gabe jatu êsêacnêŋ Anôtô ma ŋoc sakiŋwaga Dawid êtu êsêacnêŋ gôliŋwaga. Aê, Apômtau kasôm biŋ tonaŋ.
25 Aê gabe jamoatiŋ poac wamaŋa êndêŋ êsêac ma jansoc bôcbôm sêwi nêŋ gamêŋ siŋ, go ŋoc domba sêŋgôŋ ŋajamgeŋ aŋga oba ma sênêc bêc aŋga saleŋ.
26 “Aê gabe janam mec êsêac to gamêŋ, taŋ kêgi ŋoc lôc dabuŋ auc naŋ, ma jakêŋ kom ênac êndêŋ ŋanoc solop. Kom tau oc êmoasiŋ nom.
27 Ka kômŋa ênam ŋanô ma nom êkêŋ gêŋ êpi ŋajamgeŋ ma lau oc sêmoa ŋajam aŋga tauŋ nêŋ nom. Ma aê embe jamô ŋoc launêŋ kapoacwalô êŋgic ma jajaŋgo êsêac su aŋga lau, taŋ sêkôniŋ êsêac tôŋ lemeŋ e sêmoa nêŋ tauŋŋa naŋgo sêjala gebe aê Apômtaugoc.
28 Lau tenteŋlatu oc sêjaŋgo êsêac êtiam atom ma gamêŋ ŋabôcbôm oc sêndaŋgôŋ êsêac êtiam atom amboac tonaŋgeŋ. Êsêac oc sêmoa ŋajam ma teŋ êtakê êsêac atom.
29 Aê oc jasê êsêacnêŋ kôm moasiŋŋa gebe mo êjô êsêac êndu aŋga gamêŋ tau êtiam atom.
30 Ma êsêac samob oc sêjala gebe aê, Apômtau Anôtô jamoa jawiŋ êsêac ma lau Israel têtu aêŋoc lau. Aê Apômtau Anôtô, kasôm biŋ tau tonaŋ.
31 “Ŋoc domba amac, ŋoc domba ŋatoŋ, taŋ aê galôm naŋ, atu ŋoc lau. Ma amacnêm Anôtô aê. Apômtau Anôtô kêsôm biŋ tau tonaŋ.”
35:1–36:21 Propete geoc biŋ lasê kêkanôŋ gamêŋ Edomŋa ma kêsôm lasê gebe lau Israel sêmu sêna nêŋ malacmôkê êtiam.