3
Sêmasaŋ sakiŋ ŋagôliŋ
1 Lau Israel sêŋgôŋ nêŋ malac gêdêŋ-gêdêŋgeŋ su acgom, go gêdêŋ ajôŋ kêtu 7 mêŋgêô lasê êsêac samob sêkac tauŋ sa aŋga Jerusalem.
2 Go Josadak latu Jesua to nê dabuŋwaga ma Sealtiel latu Serubabel to nê lasitêwai dêdi ma sêboa Israelnêŋ Anôtô nê altar sa gebe sêkêŋ daja ênsac ŋaô kêtôm teto gêc Anôtônê ŋac Mose nê biŋsu.
3 Êsêac sêboa altar tau kêkô ŋamala laŋgwa gebe têtêc tauŋ kêtu lau gamêŋ tonaŋŋa. Ma sêkêŋ daja gêsac altar gêdêŋ Apômtau tau kêtôm bêbêc to kêtulageŋ.
4 Êsêac sêlic Om Bec kêtôm teto gêc, go sêkêŋ daja kêtôm bêcgeŋ kêtôm jatu ŋadênaŋ.
5 Tonaŋ su, go êsêac sêkêŋ daja kêtôm bêcgeŋŋa sêmoa to sêkêŋ daja ajôŋ mêŋgêô lasêŋa ma gêdêŋ Apômtaunê om samob kêtôm ŋajatu gêc naŋ, ma da taŋ ŋac teŋ êkêŋ êndêŋ Apômtau êtôm nê ŋalêlôm êkac eŋ naŋ.
6 Gêdêŋ ajôŋ kêtu 7 ŋabêc ŋamataŋa êsêac sêjac m gebe sêkêŋ daja gêdêŋ Apômtau. Mago sêkêŋ nombaŋ kêtu Apômtaunê lôm dabuŋŋa su atom tageŋ.
7 Amboac tonaŋ êsêac sêkêŋ mone gêdêŋ sêpapocwaga to kamunda ma gêŋ sêniŋ to sênômŋa ma katêkwi gêdêŋ lau Sidon to Turu gebe semboŋ kaseda aŋga lôc Lebanon sêsêp gwêc sêna Jope êtôm taŋ kiŋ Persiaŋa Kirus gêlôc sa naŋ.
Sêjac m kôm sêkwê lômdabuŋŋa
8 Gêdêŋ jala kêtu luagêcŋa, taŋ êsêac sêô lasê Anôtônê andu ŋamala aŋga Jerusalem su naŋ, ŋaajôŋ kêtu luagêcŋa Sealtiel latu Serubabel agêc Josadak latu Jesua sêjac m kôm tau sêwiŋ nêŋ lasitêwai ŋagêdô ma dabuŋwaga to lau Lewi ma êsêac samob, taŋ aŋga kapoacwalô sêmu sêmêŋ Jerusalem naŋ. Êsêac sêkêŋ lau Lewi, taŋ nêŋ jala kêtu 20 ma kêlêlêc naŋ, gebe sejop kômwaga, taŋ sêkwê Apômtaunê andu naŋ.
9 Ma Jesua gêwiŋ latui to nê tawaŋi ma Juda latu Kadmiel to nê latui sejop Anôtônê andu ŋakômwaga sêwiŋ Henadad latui to lau Lewi nêŋ latuŋi to nêŋ tawaŋi.
10 Ma gêdêŋ taŋ sêkwêwaga sêu nombaŋ Apômtaunê lôm dabuŋŋa naŋ, dabuŋwaga sêsô nêŋ ŋakwê dabuŋ ma sêwê todauc ma Asap latui, lau Lewi, tooŋgeŋ gebe sêlambiŋ Apômtau kêtôm ŋagôliŋ, taŋ kiŋ Israelŋa Dawid kêkêŋ naŋ.
11 Ma êsêac sêjam wê sêjô tauŋ aweŋ, sêlambiŋ to sêjam daŋge gêdêŋ Apômtau
“Gebe eŋ ŋac gabêjam
ênê têtac gêwiŋ Israelŋa ênêc endeŋ tôŋgeŋ.”
Gêdêŋ taŋ êsêac sêlambiŋ Apômtau naŋ, lau samob sêjam lasê sêpuc aweŋ sageŋ gebe sêu Apômtaunê andu ŋanombaŋ sugac.
12 Mago dabuŋwaga to lau Lewi ma laumata gôlôacmôkêŋa nêŋ lau ŋanô taêsam, taŋ sêlic lôm dabuŋ ŋamataŋa su naŋ, sêlic andu wakuc tonec ŋanombaŋ ma têtaŋ taŋiboa kapôêŋanô. Mago nêŋ ŋagêdô taêsam sêjam lasê kapôêŋ kêtu têtu samucŋa.
13 Amboac tonaŋ lau têtôm atom gebe sêwa sêjam lasê ŋabêlêc to launêŋ taŋiboa êkôc gebe lau sêjam lasê ŋa aweŋ kapôêŋ ma sêŋô ŋaôndu gêja ŋêŋgeŋ.
4:1–5:17 Lau Juda sêkôc kôm sêkwê lôm dabuŋŋa sa, mago nêŋ ŋacjo sebe senseŋ êsêac. Tageŋ propete Hagai agêc Sakaria sêpuc êsêac tôŋ. Gêdêŋ taŋ ŋacjo sêlênsôŋ êsêac ŋapaŋ naŋ, lau Persia nêŋ gôliŋwaga, taŋ sejop gamêŋ Judaŋa naŋ, teto papia gêdêŋ nêŋ kiŋ Darius, taŋ gêjô Kirus su naŋ ma teteŋ eŋ gebe êmbêlêm kiŋ Kirus nê miŋkatoŋ, oc êtap Kirusnê jatu sa gebe lau Juda sêkwê nêŋ lôm dabuŋ sa êtiam me masi.