4
Apômtau kêsôm lau Israel
Amac lau Israel, aŋô Apômtaunê biŋ. Gebe Apômtau kêsôm lau tonecŋa toŋamgeŋ. “Biŋ ŋaŋêŋ to têntac êwiŋ gêc gamêŋ tau atom ma êsêac sêjala Anôtô atom amboac tonaŋgeŋ. Mago êsêac sêpuc boa lau to sêsau biŋdansaŋ ma sêjac ŋamalac êndu. Êsêac sêjam geŋgeŋ to sêgôm gêŋ mockaiŋo to mockaiŋŋa. Gêŋ ŋaclai sec gêjam sêga ma sêjac ŋamalac sêjac ŋawae. Amboac tonaŋ gamêŋ tau gêjam taŋi sa ma lau samob, taŋ sêŋgôŋ gamêŋ tau naŋ, têtu palê e sênaŋa. Bôc tokaiŋ-tokaiŋ samob to moc, taŋ sêmoa umboŋ ŋalabu naŋ, ma i, taŋ sêmoa gwêc ŋalêlôm naŋ, samob oc sênaŋa.”
Apomtau kêsôm dabuŋwaga
Apômtau kêsôm gebe “Teŋ êsôm to êmêtôc lau atom, aêŋoc biŋ gêdêŋ amac dabuŋwaga tec gêc. Amboac tonaŋ aôm ônac taôm êndu êndêŋ oc ma propete oc ênac tau êndu êndêŋ êmbêc êwiŋ aôm. Ma aê oc janseŋ aôm tênam su amboac tonaŋgeŋ. Aêŋoc lau sêjaŋa gebe sêjam kauc aê. Aôm kôbaliŋ mêtê tokauc siŋ, tec aê oc jambaliŋ aôm siŋ amboac tonaŋgeŋ. Aê jatiŋ aôm su aŋga kôm dabuŋwagaŋa. Aôm kôliŋ nêm Anôtô nê biŋsu siŋ, tec aê oc jaliŋ aômnêm gôlôac siŋ amboac tonaŋgeŋ.
“Êsêac têtu taêsam, ma nêŋ sec, taŋ sêgôm gêdêŋ aê naŋ, kêtu sêga. Amboac tonaŋ aê oc janam êsêac waeŋ ôkwi atu biŋ majeŋŋa êndêŋ êsêac naaŋ-naaŋ. Aêŋoc lau nêŋ sec kêtu êsêacnêŋ mo ma êsêac mateŋ katu ŋoc lau nêŋ keso. Amboac tonaŋ gêŋ, taŋ êtap lau tau sa naŋ, oc etap lau dabuŋwaga sa amboac tonaŋgeŋ. Aê oc jamêtôc êsêac êtôm nêŋ lêŋ ma jakêŋ ŋagêjô êtôm gêŋ, taŋ sêgôm naŋ. 10 Êsêac oc sêniŋ gêŋ, mago êôc êsêac tôŋ atom. Sêŋgôm gêŋ mockaiŋŋa to mockaiŋo, mago sêka gôlôac lasê têtu taêsam atom gebe sêwi aê Apômtau siŋ ma sêjam sakiŋ gêŋ mockaiŋoŋa.”
4:11–5:3 Apômtau kêpuc boa anôtôi jaba ŋasakiŋ.