2
Apômtau ênam gôliŋ nom ŋagamêŋ samob towamageŋ
Biŋ taŋ Amosnê latu Jesaia gêlic kêkanôŋ lau Juda to Jesusalem naŋ tonec.
Êndêŋ têm ŋam u ŋa tau gêŋ tonec oc êsa
gebe Apômtaunê lôm ŋalôc oc êkô amboac lôc,
taŋ ŋatêpôê keleŋ gamêŋ su naŋ,
ma oc êpi kacgeŋ êlêlêc lôc samob su ŋêŋgeŋ.
Ma tenteŋlatui samob oc sêkac sa aŋga tônêgeŋ.
Ma lau taêsam sêpi sêna ma sêôc tauŋ gebe
“Ajôc, tapi Apômtaunê lôc tawac
ma tasô Jakobnê Anôtônê andu ŋalêlôm tana,
gebe êndôŋ nê mêtê êndêŋ aêac e tasa ênê lêŋ tônê.
Gebe ŋagôliŋ oc êsa aŋga Sion, ma Apômtaunê biŋ êsa aŋga Jerusalem.”
Eŋ oc êmêtôc tenteŋlatuinêŋ biŋ
ma êmansaŋ lau gwalêkiŋ nêŋ lêŋ.
Ma êsêac oc sênam nêŋ tubac ôkwi êtu sakweŋ
ma nêŋ kêm êtu lêŋgêc.
Lau toŋ teŋ oc sêôc siŋ sa êndêŋ lau toŋ teŋ êtiam atom
ma sêndôŋ mêtê siŋŋa êtiam atom.
 
O gôlôac Jakobŋa, amêŋ,
mêŋtasêlêŋ tamoa Apômtaunê ŋawê ŋalêlôm.
2:6–4:6 Anôtô oc êmêtôc lau-tetoc-tauŋ-sawaga to lau sec, mago gêjac mata gebe êmbuŋ lau ŋapopoc nêŋ sec su to êŋgôm êsêac têtu wakuc.