33
Apômtau oc ênam Jerusalem kêsi
1 Ojae aôm ŋac-goseŋ-gêŋ-suwaga-ma, taŋ seseŋ aôm taôm su atom naŋ,
ma aôm ŋac-kôjaŋgo-gêŋwagama, taŋ ŋac teŋ kêjaŋgo nêm gêŋ su atom naŋ.
Êndêŋ taŋ onseŋ geŋ êmbacnê naŋ, oc senseŋ aôm taôm su,
ma êndêŋ taŋ ôjaŋgo gêŋ e êmbacnê naŋ, êsêac oc sêjaŋgo nêm gêŋ.
2 O Apômtau, taêm walô aêac,
aêac aôŋ aôm amoa.
Ôtu aêacma lemeŋ êtôm bêbêcgeŋ
ma aêacma kêsiwaga êndêŋ têm gêŋwapacŋa.
3 Êndêŋ taŋ lau oc sêŋô aôm awam amboac wapap gêjac naŋ, oc sêc.
Êndêŋ taŋ aôm ôndi sa naŋ,
tenteŋlatu samob sêc êliŋ-êliŋ.
4 Ma lau oc sejoŋ ŋawaba amboac lêsêc sejoŋ gwada
ma waba tau ê êsêac amboac têapa gê lêsêc.
5 Tatoc Apômtau sa gebe eŋ gêŋgôŋ lôlôc.
Eŋ oc êkêŋ mêtôc gêdêŋ to biŋ gêdêŋ ênam Sion auc.
6 Eŋ oc ênam gôliŋ aômnêm têm samob êsêlêŋ ŋaŋêŋgeŋ
ma êkêŋ moasiŋ ênam aôm kêsiŋa to kauc mêtêŋa
ma kauc tajala gêŋŋa ênam sêga.
Tatêc Apômtau kêtu ênê awamata.
7 Alic acgom, siŋsêlêc têtaŋ sêmoa intêna
ma wama ŋasêliŋwaga têtaŋ secanô.
8 Intênasêga kêtu gasaŋ ma lau teŋ sêsêlêŋ sêsa kêtiam atom.
Êsêac sêjac poac popoc ma sêpêlê lau-sêwa-biŋ-sawaga
ma tetoc ŋamalac teŋ sa kêtiam atom.
9 Nom kêtaŋ toŋalêlôm ŋawapacgeŋ.
Lôc Lebanon kêmêliŋ tomajageŋ.
Gaboaŋ Saronŋa kêtôm gamêŋ sawa.
Ma lôc Basan to Karmel kêtu kwalam.
10 Apômtau kêsôm gebe
“Galoc aê kamasaŋ tauc gebe jandi,
galoc aê oc jandi jakô.
11 Amac taêm, mago akêkam gêŋ ŋapa
ma akôc ŋalauŋ ŋamasêgeŋ.
Nêm awemjaô kêtôm ja ŋawaô, taŋ oc êniŋ amac su naŋ.
12 Ma tenteŋlatu samob oc têtôm usu ŋapa, taŋ sêpac kêtu ŋop naŋ,
têtôm waŋganic, taŋ sêsap su ma sêkêŋ ja geŋ naŋ.
13 Amac lau, taŋ amoa jaêcsêga naŋ, aŋô gêŋ, taŋ gagôm naŋ ŋawae.
Ma amac lau, taŋ amoa ŋagala naŋ, ajala ŋoc ŋaclai.”
14 Secwaga Sionŋa têtêc tauŋ ŋasec,
ma lau alôb-alôb têtakê ŋanô ma sêsôm gebe
“Aêacnêŋ asa oc êtôm gebe êŋgôŋ êwiŋ ja, taŋ êsa endeŋ tôŋgeŋ naŋ.”
15 Ŋac taŋ kêsa nê lêŋ gêdêŋgeŋ ma kêsôm biŋŋanô naŋ,
ŋac taŋ gedec gêŋ, taŋ lau sêjaŋgo naŋ,
ma gêôc lêma tôŋ gêdêŋ awa êtim eŋŋa
ma kêkêŋ taŋa biŋ sêkêc dec siŋŋa atom,
ma gêsaŋ mataanô auc gebe êlic gêŋ sec atom
16 ŋac tonaŋ tec êŋgôŋ lôlôc.
lôc to poc sagiŋ oc êtu ênê lamu
ma aŋga tonaŋ oc sêkêŋ mo êndêŋ eŋ ma êpô lêna bu atom.
17 Matamanô oc êpi nêm kiŋ tonê ŋawasi,
matamanô oc êu laiŋ su êna.
18 Nêm ŋalêlôm oc taêm ênam ŋawapac laŋgwa, taŋ katakê aôm naŋ,
gebe “Ŋac kêsa gêŋ saŋa gêmoa ondoc.
Ŋac gêjam dôŋ gêŋŋa gêmoa ondoc.
Ŋac kêsa andu jaliŋa samob saŋa gêmoa ondoc.”
19 Matamanô oc êpi lau-tetoc-tauŋ-sawaga êtiam atom.
Êsêac sêsôm aweŋ teŋ, taŋ gôjam kauc ŋam,
ma imbeleŋ kêpêlê biŋ, taŋ kôjala atom.
20 Matamanô êpi Sion, taŋ kêtu aêacnêŋ omsêga ŋamala.
Matamanô oc êpi malac ŋaŋêŋ Jerusalem tau,
taŋ kêtôm becobo, taŋ kêkô gedeŋ tôŋgeŋ naŋ.
Lau teŋ oc sêmbuc ŋaalê sa atom.
21 Ma Apômtau oc êmoa êwiŋ aêac tonê ŋawasi kiŋŋa.
Eŋ oc êtu aêacnêŋ bu kapôêŋ to ŋaweŋweŋ,
taŋ manowa ma waŋ tolac têtôm atom gebe sêsô sêna naŋ.
22 Gebe Apômtau kêtu aêacnêŋ mêtôcwaga ma kêtu nêŋ gôliŋwaga.
Apômtau kêtu nêŋ kiŋ ma oc ênam aêac kêsi.
23 Nêm lêpoa kêm kêtu goloŋ ma gê jamoa tôŋ atom,
tec ageŋ lac sa kêtôm atom.
Go sênac sam awa, taŋ sêjaŋgo naŋ,
ma lau puliŋ oc sêkôc sêwiŋ amboac tonaŋgeŋ.
24 Ŋac malac tonaŋŋa teŋ oc êsôm gebe “Gêmac gêgôm aê,” nec atom.
Apômtau oc êsuc lau, taŋ sêŋgôŋ malac tau naŋ, nêŋ sec ôkwi.
34:1-17 Môkêlatu tonec geoc Anôtônê ŋacjo nêŋ ŋandaŋ, taŋ enseŋ êsêac su sênaŋa naŋ lasê. sa. Lau jaba sêsôm tauŋ aweŋ katu sejop to sêkôniŋ êsêacŋa. waŋ gebe sênac siŋ êndêŋ Israel naŋ, nêŋ biŋ sa.