46
Nom ŋaApômtau to lau Babilon nêŋ anôtôi jaba
1 “Babilonnêŋ anôtôi gêbacnê. Gêmuŋgeŋ lau Babilon sêjam sakiŋ Bel agêc Nebo, mago galoc sêkêŋ anôtôi tonaŋ gêsac doŋki ŋaô. Bôc tekweŋ gêbac ma sêbalaŋ gêŋ tau kêtu waba gêsac êsêac ŋaô.
2 Gwam kêtôm gebe ênam tau sa atom. Ŋacjo sêjaŋgo su ma sêbalaŋ sêja kapoacwalô.
3 “O gôlôac Jakob to gôlôac Israel nêŋ lau ŋapopoc, aŋô ŋoc biŋ. Aê kasip amac sa gêdêŋ taŋ tenemi sêkôc amac to amac asa amêŋ naŋ, e mêŋgêdêŋ galoc.
4 Amacnêm Anôtô aê. Aê janam jaom amac e atu lau ŋanô tomôdê. Aê kakêŋ amac ma jajop amac ma aê oc janam amac sa to janam amac kêsi.
5 “Oc anam dôŋ aê êpi ŋac ondoc gebe aêagêc atôm tauŋ. Ŋac ondoc kêtôm aê ma amac oc ansaê aê katôm asa.
6 Lau sêsêwa nêŋ gold sa aŋga nêŋ talu ma sêjam dôŋ nêŋ silber. Êsêac sêjam ôli kwalam laŋgwa teŋ gebe êmansaŋ nêŋ gold êtu gwam ma sêpôŋ aeŋduc to sêjam sakiŋ gêŋ tau.
7 Êsêac sêôc gêŋ tau sa ma sêbalaŋ jagêsac magiŋm jatetoc geŋ tau kêkô ŋamala ma gacgeŋ kêkô tônê. Gêŋ tau katôm gebe êwi ŋamala tau siŋ atom. Ŋac teŋ awa embe ênac oc êjô eŋ awa atom to ênam eŋ sa aŋga gêŋwapac atom.
8 “Amac taŋ ajam dêmôêm aê naŋ, taêm ênam biŋ tonaŋ ma asala gêŋ, taŋ gagôm naŋ.
9 Taêm ênam gêŋ, taŋ gagôm gêdêŋ andaŋgeŋ, ajala gebe Anôtô aê taucgeŋ ma teŋ kêtôm aê gêmoa atomanô.
10 Gêdêŋ taŋ gajac m ŋoc kôm naŋ, kasôm kôm ŋatêpôê lasê kwanaŋgeŋ. Gêdêŋ andaŋgeŋ aê gaoc biŋ, taŋ oc mêŋêsa su naŋ lasê. Aê kasôm gebe ‘Biŋ taŋ taêc gêjam naŋ oc êkô ma gêŋ samob, taŋ gabe jaŋgôm ŋanô êsa naŋ, oc jaŋgôm ŋanô êsa.’
11 Aê gamôêc ŋac teŋ gebe êmêŋ aŋga oc kêpiŋa. Eŋ oc êpôp êsêp amboac kikic gebe êŋgôm biŋ, taŋ aê taêc gêjam naŋ, êtu anô. Aê kasôm tec oc ŋanô êsa.
12 “Amac gêsumtêkwa ŋatoŋwaga, taŋ ajam kauc gebe bêc jaku ŋacjo tuluŋa gêc jaêc naŋ, aŋô ŋoc biŋmaŋ.
13 Aê kakêŋ bêc jaku ŋacjo tuluŋa kêdabiŋ. Bêc tau gêc jaec atom. Noc janam amac kêsiŋa ênam tau tôŋ atom. Aê gabe janam Jerusalem sa ma jatoc Israel sa aŋga tônê.”
47:1–48:22 Sêku malac Babilon tulu ŋawê kêsêp môkêlatu 47. Môkêlatu 48 kêtôc Anôtônê lêŋ gêjam gôliŋ lau-mŋa to gêjam nê lau saŋa.