Job
1
Sadaŋ kêsaê Jobnê kêkêŋ gêwiŋ
Ŋac teŋ gêmoa gamêŋ Usŋa, ênê ŋaê gebe Job. Ŋac tau kêsa nê lêŋ tolaŋônêm sawageŋ ma eŋ ŋac gêdêŋ. Eŋ ketoc Anôtô sa to gejob tau gêdêŋ sec. Ênê latui 7 to latuio têlêac. Ênê domba 7,000 to kamele 3,000 ma bulimakao 1,000 to doŋki 500 sêmoa. Ma sakiŋwaga taêsam sêmoa, tec eŋ kêtu ŋac tolêlôm kêlêlêc lau ŋagêdô, taŋ sêŋgôŋ gamêŋ oc kêpi ŋa naŋ, su ŋêŋgeŋ.
Eŋ latui seno moasiŋ gêjô tau-gêjô tau aŋga nêŋ andu kêtôm ŋanocgeŋ ma sêkalem luŋio têlêac mêŋseŋ moasiŋ sêwiŋ tauŋ. Ma gêdêŋ bêc samob, taŋ moasiŋ tonaŋ gêbacnê naŋ, Job gêdi sa gêdêŋ bêbêc kanucgeŋ ma kêkêŋ daja kêtôm êsêacnêŋ namba, kêtu nê gôlôac têtu selecŋa. Eŋ gêgôm gêŋ tonaŋ ŋapaŋ, gebe eŋ taê gêjam gebe “Moae latuci sêgôm sec ma sêsêm biŋ alôb-alôb kêpi Anôtô aŋga nêŋ ŋalêlôm.”
Gêdêŋ bêc teŋ lau undambêŋa jasêpi tageŋ gebe sêkô Apômtau laŋônêmŋa. Ma Sadaŋ gêô lasê gêwiŋ êsêac amboac tonaŋgeŋ. Apômtau kêtu kênac eŋ gebe “Ma aôm gômôêŋ aŋga ondoc.” Sadaŋ sêjô eŋ awa gebe “Aê gaja ônê ma gamêŋ onec to gajac laoc nom ŋagamêŋgeŋ.” Go Apômtau kêsôm gêdêŋ Sadaŋ gebe “Aôm gôlic ŋoc sakiŋwaga Job me masi. Ŋac teŋ kêtôm eŋ gêmoa nom atom. Eŋ kêsa nê lêŋ laŋônêm sawageŋ ma eŋ ŋac gêdêŋ. Eŋ ketoc aê sa ma gejob tau gêdêŋ sec.” Sadaŋ gêjô Apômtau awa gebe “Job tau ketoc aôm sa ŋaômageŋ me. 10 Aôm lêmam kôpiŋ eŋ to nê gôlôac ma nê gêŋ samob auc. Aôm gôjam mec kôm samob, taŋ eŋ gêjam naŋ, ma nê bulimakao to domba seola gamêŋ auc. 11 Mago galoc ômêtôc lêmam ma ômoasac ênê gêŋ samob acgom, go eŋ êpuc boa aôm êpi têmbêlamgeŋ.” 12 Tec Apômtau kêsôm gêdêŋ Sadaŋ gebe “Amboac tonaŋ ênê gêŋ samob kêsêp aôm lêmam, mago eŋ tau ôli tageŋ, tec ômoasac atom.” Tec Sadaŋ gêwi Apômtau laŋônêmŋa siŋ.
Jobnê latuŋio to ŋac ma awa samob gêjaŋa
13 Gêdêŋ bêc teŋ Job latuio to ŋac seŋ moasiŋ sêŋgôŋ ŋacsêganê andu, 14 ma ŋac teŋ kêlêti jagaô lasê gêdêŋ Job ma kêkêŋ ŋawae tonec gebe “Bulimakao sêkac nom ôkwi ma doŋki têna seŋ gêgwaŋ sêmoa êsêac ŋagala, 15 go lau Saba mêŋsêjaŋgo bôc samob su ma sêjac nêm sakiŋwaga samob ŋa siŋ êndu. Aê taucgeŋ, kasêp siŋ sawa, tec gamêŋ gebe jakêŋ ŋawae êndêŋ aôm.” 16 Eŋ kêsôm biŋ gêmoa ma ŋac teŋ mêŋgêô lasê ma kêsôm gebe “Ôsic kêkac e geŋ domba to ŋagejobwaga samob su. Aê taucgeŋ gawê sa, tec gamêŋ gebe jakêŋ ŋawae êndêŋ aôm.” 17 Eŋ kêsôm biŋ gêmoa ma ŋac teŋ mêŋgêô lasê ma kêsôm gebe “Lau Kaldea nêŋ sêjaŋgowaga toŋ têlêac sêjac siŋ gêdêŋ aêac ma sêkôc kamele samob su to sêjac nêm sakiŋwaga samob endu, aê taucgeŋ kasêp siŋ sawa, tec gamêŋ gebe jakêŋ ŋawae êndêŋ aôm.” 18 Eŋ kêsôm biŋ gêmoa ma ŋac teŋ mêŋgêô lasê ma kêsôm gebe “Aôm latômio to ŋac seŋ moasiŋ sêŋgôŋ ŋacsêganê andu, 19 go mu ilai kêsa aŋga gamêŋ sawa. Mu ilai jakêpi andu ŋakêclêsu aclê ma andu kêku sa jakêkôniŋ lau wakuc tau e samob sêmac êndu. Aê taucgeŋ gawê sa, tec gamêŋ gebe jakêŋ ŋawae êndêŋ aôm.”
20 Go Job gêdi e kakac nê ŋakwê gêŋgic to kêkaliŋ môkêlauŋ su ma gêu tau gêc nom ma keteŋ mec. 21 Eŋ kêsôm gebe “Tinoc kêkôc aê toôlic ŋaôma ma jawi nom siŋ toôlic ŋaômageŋ amboac tonaŋ. Apômtau kêkêŋ ma Apômtau kêkôc su. Aê jalambiŋ Apômtaunê ŋaê.”
22 Gêŋwapac samob tonaŋ ŋai kêtap Job sa, mago eŋ gêgôm sec teŋ atom me kêtiŋ biŋ kêpi Anôtô atom.