3
Jesu agec Nikodeme
1 Parisainêŋ ŋac teŋ gêmoa, nê ŋaê Nikodeme. Eŋ Judanêŋ kasêga teŋ.
2 Ŋac tonaŋ gêdêŋ gêbêc gêdêŋ Jesu gêja ma kêsôm gêdêŋ eŋ gebe “Mêtêmôkê, aêac alic aôm mêtêmôkê aŋga Anôtônê tec gômôêŋ, gebe gêŋtalô taŋ aôm gôgôm naŋ, ŋamalac teŋ oc êŋgôm êtôm atom, Anôtô êwiŋ eŋ acgom.”
3 Ma Jesu gêjô eŋ awa gebe “Biŋŋanô, aê jasôm tobiŋŋanôgeŋ êndêŋ aôm gebe Ŋamalac teŋ embe êtu wakuc atom, oc êtôm gebe êlic Anôtônê gamêŋ atom.”
4 Go Nikodeme kêsôm gêdêŋ eŋ gebe “Ŋamalacanô êtôm gebe êtu wakuc êtiam amboac ondocgeŋ. Oc êtôm gebe êsêp têna têtaclêlôm êtu dim luagêc ma êkôc eŋ êtiam me.”
5 Tec Jesu gêjô eŋ awa gebe “Biŋŋanô, aê jasôm tobiŋŋanôgeŋ êndêŋ aôm gebe Bu to Ŋalau embe êkôc ŋamalac êtu wakuc atom, oc êsô Anôtônê gamêŋ êna atom.
6 Gêŋ taŋ ôli kêkôc naŋ ôli, ma gêŋ taŋ Ŋalau kêkôc naŋ ŋalau.
7 Ôŋac lêmam atom gebe kasôm gêdêŋ aôm gebe ‘Amac atu wakuc êtiam.’
8 Mu kêsêlêŋ amboac kêsêlêŋ. Aôm gôŋô ŋakicsêa, mago mu-m to mutêpôê naŋ gôjam kauc. Lau taŋ Ŋalau kêkôc êsêac naŋ, nêŋ biŋ amboac tonaŋ.”
9 Ma Nikodeme gêjô eŋ awa gebe “Biŋ tonaŋ êtu anô amboac ondoc.”
10 Jesu gêjô eŋ awa gebe “Israelnêŋ mêtêmôkê aôm, mago gôjam kauc biŋ tonec me.
11 Biŋŋanô, aê jasôm tobiŋŋanôgeŋ êndêŋ aôm gebe Gêŋ taŋ aêac ajala naŋ, tec asôm lasê, ma gêŋ taŋ aêac alic naŋ, tec awa sa. Mago amac akôc aêacma biŋ, taŋ awa sa naŋ, sa atom.
12 Aê kasôm biŋ nomŋa gêdêŋ amac, mago akêŋ gêwiŋ atom. Ma embe jasôm biŋ undambêŋa êndêŋ amac, oc akêŋ êwiŋ amboac ondoc.
13 Ŋamalac teŋ kêpi undambê gêja atom, ŋac tageŋ, taŋ kêsêp aŋga undambê gêmêŋ naŋgeŋ. Eŋ Ŋamalacnê Latu tau.
14 Mose gêjac moac ŋakatu sa aŋga gamêŋ sawa ma oc sênac Ŋamalacnê Latu sa êtôm tônê,
15 gebe ŋamalac samob, taŋ sêkêŋ gêwiŋ eŋ naŋ, sêŋgôŋ mateŋ jali teŋgeŋ.”
16 Gebe Anôtô têtac gêwiŋ ŋamalac kaiŋ teŋ, tec kêkêŋ nê Latu tageŋ gêmêŋ gebe samob, taŋ sêkêŋ gêwiŋ eŋ naŋ, sênaŋa atom, sêŋgôŋ mateŋ jali teŋgeŋ.
17 Gebe Anôtô kêsakiŋ Latu tageŋ gêmêŋ nom, gebe êmêtôc ŋamalac atom, gêmêŋ gebe ênam ŋamalac kêsi.
18 Lau taŋ sêkêŋ gêwiŋ eŋ naŋ, oc êmêtôc êsêac atom. Ma lau taŋ sêkêŋ gêwiŋ eŋ atom naŋ, têtap mêtôc sagac, gebe sêkêŋ gêwiŋ Anôtônê Latu tageŋ nê ŋaê atom.
19 Mêtôc tau ŋam amboac tonec gebe ŋawê gêmêŋ nom, mago ŋamalac têntac gêwiŋ ŋakesec kêlêlêc ŋawê su, gebe sêgôm nêŋ secgeŋ.
20 Lau samob, taŋ sêgôm sec naŋ, têntac gedec ŋawê ma oc nasêô lasê ŋawê tau atom, gebe ŋawê oc êmbu êsêacnêŋ koleŋ.
21 Ma lau taŋ sêgôm biŋŋanô ŋanô kêsa naŋ, tec oc nasêô lasê ŋawê gebe êpô nêŋ koleŋ e ênêc awê, gebe sêgôm toAnôtôgeŋ.
Jesu agêc ŋackêsagu Joaŋ
22 Biŋ tonaŋ su, go Jesu to nê ŋacseŋomi sêja gamêŋ Judaiaŋa. Eŋ gêmoa gêwiŋ êsêac gêmoa tonaŋ ma kêsagu lau.
23 Ma Joaŋ kêsagu lau gêmoa Ainon, taŋ gêc Salim ŋagala naŋ amboac tonaŋ gebe bu taêsam kêpoac tônê, tec lau sêja jakêsagu êsêac,
24 gebe gêdêŋ tonaŋ sêkêŋ Joaŋ gêŋgôŋ kapoacwalô atomgeŋ.
25 Joaŋnê ŋacseŋomi to ŋac Judaŋa teŋ ac sêpa tauŋ kêtu biŋ sêkwasiŋ tauŋ têtu selecŋa.
26 Go êsêac dêdêŋ Joaŋ sêja ma sêsôm gêdêŋ eŋ gebe “Mêtêmôkê, ôlic acgom, ŋac naŋ agêc amoa Jordan ŋamakeŋ ônêŋa awiŋ taôm ma gôwa eŋ ŋam sa naŋ, tec tau kêsagu lau ma samob dêdêŋ eŋ sêja.”
27 Tec Joaŋ gêjô êsêac aweŋ gebe “Ŋamalac teŋ tau êkôc gêŋ teŋ êtôm atom, Anôtô êkêŋ êndêŋ eŋ acgom.
28 Taôm aŋôgac gebe kasôm gebe ‘Aê Kilisi atom, mago Anôtô kêsakiŋ aê gamuŋ eŋ.’
29 Ŋac taŋ sêsi awê gêjac eŋ ŋawae naŋ, kêtu ŋac-ênam-awêwaga. Mago ŋac-ênamawêwaga nê ŋac, taŋ jakêkô ma gêŋô eŋ naŋ, kêtu samuc ŋac-ênam-awêwaga nê awa. Ma galoc aê amboac tonaŋ têtac ŋajam kêlêlêc samucgeŋ.
30 Eŋ êtôp ma aê jamêliŋ.”
31 Eŋ taŋ aŋga lôlôc naŋ, kêlêlêc samob su. Eŋ taŋ nê ŋam gêc nom naŋ, kêtu gêŋ nomŋa ma kêsôm biŋ nomŋa. Ma eŋ taŋ aŋga undambê naŋ, kêlêlêc samob su
32 Biŋ taŋ eŋ gêlic to gêŋô naŋ, tec gêwa sa, mago lau teŋ sêkôc ênê biŋ sa atom.
33 Ma lau taŋ sêkôc biŋ tonaŋ sa naŋ, sêlôc kêtu tôŋ gebe Anôtô eŋ Ŋac biŋŋanôŋa.
34 Ŋac taŋ Anôtô kêsakiŋ eŋ naŋ, kêsôm Anôtônê biŋ, gebe Anôtô kêkêŋ Ŋalau gêdêŋ eŋ kêtôm dôŋgeŋ atom, eŋ kêsêwageŋ.
35 Tama têtac gêwiŋ Latu, tec kêkêŋ gêŋ samob kêsêp eŋ lêma.
36 Eŋ taŋ kêkêŋ gêwiŋ Latu naŋ, êŋgôŋ mata jali teŋgeŋ. Ma eŋ taŋ taŋapêc gêdêŋ Latunê biŋ naŋ, êlic gamêŋ êŋgôŋ mata jaliŋa atom, gebe Anôtô têtac ŋandaŋ giŋ eŋ tôŋgac.