9
Jesu kêsakiŋ nê lau 12
(Mat 10:5-15; Mar 6:7-13)
1 Jesu gêmôêc êsêac 12 sêpi tageŋ ma kêkêŋ ŋajaŋa to ŋaclai gelom êsêac gebe têtiŋ ŋalau sec samob to sêŋgôm gêmac ôliŋ ŋajam êsa.
2 Go kêsakiŋ êsêac sêja gebe sênam mêtê êpi Anôtônê gamêŋ to sêŋgôm gêmac ŋajam êsa.
3 Ma eŋ kêsôm gêdêŋ êsêac gebe “Akôc gêŋ teŋ amoa intêna atom. Aôc tôc atom. Ambic atali atom. Akôc mo atom. Akôc mone atom. Akôc ŋakwê luagêc atom.
4 Embe api andu teŋ, naŋ aŋgôŋ tonaŋgeŋ e awi gamêŋ tau siŋ.
5 Ma lau embe sêkôc amac sa atom, naŋ awi malac tonaŋ siŋ ma êndôŋ ŋakekop aŋga emkaiŋ su êtu geo ŋabelo teŋ êndêŋ êsêac.”
6 Tec ŋacseŋomi têtôm malacgeŋ sêja ma sêsôm ŋawae ŋajam lasê to sêgôm gêmac ŋajam kêsa kêtôm malacgeŋ.
Jesunê biŋ kêlênsôŋ Herodo
(Mat 14:1-12; Mar 6:14-29)
7 Kasêga Herodo gêŋô biŋ samob tonaŋ ŋawae e kêpô lêna tau ŋanô, gebe lau ŋagêdô sêsôm sebe “Joaŋ gêdi sa aŋga ŋacmatênêŋ.”
8 Ŋagêdô sêsôm sebe “Elia tec geoc tau lasê.” Ma ŋagêdô sêsôm sebe “Propete laŋgwa nêŋ teŋ gêdi sa.”
9 Ma Herodo kêsôm gebe “Joaŋ tec gabuc eŋ gêsutêkwa gêŋgic su. Mago tonê asa, tê gaŋô ŋawae amboac tonec kêpi eŋ nê.” Ma gêgôm mocsac gebe êlic Jesu ŋanô.
Jesu gêlôm lau 5,000
(Mat 14:13-21; Mar 6:30-44; Joaŋ 6:1-14)
10 Aposolo sêmu sêmêŋ kêtiam ma sêjac miŋ gêŋ, taŋ sêgôm naŋ, gêdêŋ eŋ. Go kêkôc êsêac sa ma ac têtaiŋ tauŋgeŋ sêja malac teŋ, ŋaê Betsaida, gebe nasêmôa nêŋ tauŋŋa.
11 Mago lau sêlic ma têdaguc eŋ, tec kêkôc êsêac sa ma kêsôm Anôtônê gamêŋ ŋawae gêdêŋ êsêac, to gêgôm êsêac, taŋ sêpô lêna naŋ, ôliŋ ŋajam kêsa.
12 Kêdabiŋ gebe oc naêsêp, ma ŋacseŋomi 12 jasêsôm gêdêŋ eŋ gebe Aêac tamoa gamêŋ sawa nec, ôkêŋ lau sêc êliŋ-êliŋ gebe sêna malac to gamêŋ ŋakêtu gêdô nasêlêwaŋ tauŋ ma têtap nêŋ mo sa.”
13 Mago Jesu kêsôm gêdêŋ êsêac gebe “Amac taôm akêŋ gêŋ êsêac sêniŋ.” Tec êsêac sêsôm gebe “Aêacma polom lemeŋ teŋgeŋ ma i luagêcanô tec gêc. Aôm gobe aêac ana anam ôli mo êtu lau samob tonaŋŋa me.”
14 Êsêac ŋacwaga amboac 5,000. Tec Jesu kêsôm gêdêŋ nê ŋacseŋomi gebe Asôm êsêac sêŋgôŋ sic totoŋ-totoŋ êtôm 50-50 sêwiŋ tauŋ.”
15 Tec ŋacseŋomi sêgôm amboac tonaŋ ma samob sêŋgôŋ sic.
16 Go kêkôc polom lemeŋ teŋ to i luagêc tonaŋ sa mêŋmata gedec undambê ma gêjam daŋge, go kêpô kêkôc-kêkôc ma kêkêŋ gêdêŋ ŋacseŋomi, gebe sênac sam êndêŋ lau.
17 Seŋ e gêôc êsêac tôŋ samob, go sejoŋ ŋapopoc sa kêsêp gadob 12.
Petere kêsôm Kilisi ŋam
(Mat 16:13-19; Mar 8:27-29)
18 Ŋasawa teŋ Jesu keteŋ mec gêmoa tauŋa ma nê ŋacseŋomi sêwiŋ eŋ. Go kêtu kênac êsêac gebe “Lau sêsam aê sebe asa.”
19 Ma êsêac sêjô eŋ awa gebe “Ŋagêdô sêsôm gebe aôm ŋackêsagu Joaŋ, ma ŋagêdô sêsôm gebe aôm Elia, ma ŋagêdô sêsôm gebe Propete laŋgwa nêŋ teŋ, tec gêdi sa.”
20 Ma Jesu kêtu kênac êsêac gebe “Ma amac nec asam aê abe asa.” Tec Petere gêjô eŋ awa gebe “Aôm Anôtônê Kilisi tau.”
Jesu geoc êmac êndu to êndi saŋa lasê
(Mat 16:20-28; Mar 8:30–9:1)
21 Ma Jesu gêjam êsêac aweŋ auc to gêjac jao gebe sêsôm lasê êndêŋ lau teŋ atomanô.
22 Ma kêsôm gebe “Ŋamalacnê Latu oc êôc ŋandaŋ taêsam. Laumata to lau dabuŋsêga ma biŋsutau oc têtiŋ eŋ to sênac eŋ êndu e ŋabêc êtu têlêac, go êndi sa êtiam.”
23 Ma kêsôm gêdêŋ êsêac samob gebe “Ŋac teŋ embe taê ênam gebe êsap aê tôŋ, naŋ ênac kapoac tau ma êôc nê kakesotau êtôm bêcgeŋ, go êndaŋguc aê,
24 gebe ŋac teŋ embe êŋgôm mocsac gebe êmoa mata jali, naŋ oc êmac êndu, ma teŋ embe êmac êndu êtu aêŋa, naŋ oc êŋgôŋ mata jali.
25 Ŋac teŋ embe ênsôb gêŋ nomŋa samob sa ma êjaiŋ tau to ênam tau sapu, oc ênam eŋ sa amboac ondoc.
26 Ŋac teŋ embe maja aê to ŋoc biŋ, Ŋamalacnê Latu oc maja eŋ amboac tonaŋ êndêŋ taŋ êmêŋ totau nê ŋawasi ma Tamanê ŋawasi ma aŋela dabuŋ nêŋ ŋawasi.
27 Biŋŋanô, aê jasôm êndêŋ amac gebe Êsêac tec sêkô-sêkô nec, nêŋ ŋagêdô oc sêmac êndu atomgeŋ e sêlic Anôtônê gôliŋ su acgom.”
Jesu ôli kaiŋ teŋ kêsa
(Mat 17:1-9; Mar 9:2-8)
28 Jesu kêsôm biŋ tonaŋ su ma ŋabêc 8 gêjaŋa acgom, go kêkôc Petere agêc Joaŋ ma Jakobo sêpi lôc teŋ sêja gebe eteŋ mec.
29 Tec keteŋ gêmoa e laŋôanô kaiŋ teŋ kêsa ma nê ŋakwê e ŋaeb ŋaôma.
30 Ma sêlic ŋac luagêc sêjam biŋgalôm sêwiŋ eŋ. Ŋaclagêc tau Mose agêc Elia.
31 Tec agêc seoc tauŋ lasê toŋawasigeŋ mêŋsêsôm ênê lêŋ, taŋ oc ênac dabiŋ aŋga Jerusalemŋa naŋ, lasê gêdêŋ eŋ.
32 Petere to nê ŋac luagêc, taŋ sêwiŋ eŋ naŋ, sêc bêc sêc e mateŋ gêlac, go sêlic Jesunê ŋawasi, ma ŋaclagêc tonaŋ sêkô sêwiŋ eŋ.
33 Agêc dêdi sêmoa gebe sêwi Jesu siŋ, go Petere kêsôm gêdêŋ Jesu gebe “Mêtêmôkê, ŋajam gebe tamoa tonec. Aêac anam bec têlêac acgom, aômnêm teŋ ma Mosenê teŋ ma Elianê teŋ.” Petere gêjam kauc biŋ, taŋ tau kêsôm naŋ.
34 Kêsôm biŋ tonaŋ gêmoa ma tao teŋ mêŋgêjam ajuŋ êsêac e kêkôm êsêac auc ma ŋacseŋomi têtêc tauŋ ŋanô.
35 Go awa teŋ kêsa aŋga tao tonaŋ gêmêŋ gebe “Aêŋoc Latuc tecenec, tec kajaliŋ eŋ sa naŋ akêŋ taŋem eŋ.”
36 Awa tonaŋ kêsa gêmêŋ ma sêlic Jesu taugeŋ kêkô. Sêlic gêŋ tonaŋ e sêjam tauŋ tôŋgeŋ, tec gêdêŋ ŋasawa tonaŋ sêjac miŋ biŋ, taŋ sêlic naŋ, ŋawae gêdêŋ lau teŋ atom.
Jesu gêgôm ŋapalê toŋalau sec ôli ŋajam kêsa
(Mat 17:14-18; Mar 9:14-27)
37 Ŋabêbêc sêsêp aŋga lôc sêmêŋ e dêdac lau taêsam.
38 Ma ŋac teŋ aŋga lau tonaŋ nêŋ gêmôêc gebe “Mêtêmôkê, aê jateŋ aôm gebe ôlic ŋoc latuc acgom, gebe ŋoc gêŋ tageŋanô.
39 Ŋalau sec teŋ kêkam eŋ e kêwakic sec ma kêjamuŋ eŋ e awaôpic kêsa, ma êwi eŋ siŋ atom e ŋasawa ec baliŋ.
40 Tec aê kateŋ nêm ŋacseŋomi gebe têtiŋ ŋalau tau e sêgôm jageo.”
41 Ma Jesu gêjô eŋ awa gebe “Ojae, amac akêŋ-gêwiŋ-atom ma amac lau-kesowaga, aê jamoa jawiŋ amac e êndêŋ ondoc ma jaôc amacnêm biŋ e êndêŋ ondocgeŋ. Ôkôc latôm êmêŋ tonec acgom.”
42 Ŋapalê kêsêlêŋ gêmoa ma ŋalau tau kêmônaŋ to kêjamuŋ eŋ. Tec Jesu gec biŋ ŋalau sec ma gêgôm ŋapalê ŋajam kêsa, go kêkêŋ eŋ gêdêŋ tama gêmu gêja.
43 Ma êsêac lau samob têtakê ŋanô kêtu Anôtônê ŋaclai kapôêŋŋa.
Jesu geoc êmac endu to êndi saŋa lasê kêtu luagêcŋa
(Mat 17:22-23; Mar 9:30-32)
Lau samob sêŋac lemeŋ kêtu ênê gêŋ samob, taŋ gêgôm naŋŋa, sêmoa ma Jesu kêsôm gêdêŋ nê ŋacseŋomi gebe
44 “Akêŋ taŋem biŋ tecenec ŋapep, gebe sêkêŋ Ŋamalacnê Latu êndêŋ ŋamalac lemeŋ êna.”
45 Mago êsêacnêŋ kauc kêsa kêpi biŋ tonaŋ atom, ma biŋ tau kêsiŋ tau gêdêŋ êsêac e sêjala ŋam atom. Ma têtêc tauŋ tec têtu kênac eŋ kêtu biŋ tauŋa atom.
Asa êtu ŋac kapôêŋ
(Mat 18:1-5; Mar 9:33-37)
46 Ŋasawa teŋ êsêac taêŋ gêjam jakêsa-jakêsa gebe nêŋ asa kêtu ŋac towae kêlêlêc êsêac ŋagêdô su.
47 Tec Jesu kêjala biŋ, taŋ êsêac taêŋ gêjam gec nêŋ ŋalêlôm naŋ, ma kêkôc ŋapalê teŋ ketoc eŋ kêkô kêsi eŋŋa
48 ma kêsôm gêdêŋ êsêac gebe “Ŋac teŋ embe êkôc ŋapalê tonec sa êtu aêŋoc ŋaêŋa, naŋ êkôc aê sa. Ma ŋac teŋ embe êkôc aê sa, naŋ êkôc ŋac, taŋ kêsakiŋ aê naŋ sa. Amacnêm ŋac, taŋ alic eŋ ŋac sauŋ ec teŋ naŋ, eŋ ŋac kapôêŋ.”
Ŋac taŋ kêkeŋ kisa amac atom naŋ, kêpuc amac tôŋ
(Mar 9:38-40)
49 Tec Joaŋ gêjô eŋ awa gebe “Mêtêmôkê, aêac alic ŋac teŋ kêtiŋ ŋalau sec su ŋa aôlmnêm ŋaê, tec ajac jao eŋ gebe eŋ kêdaguc aêac atom.”
50 Ma Jesu kêsôm gêdêŋ eŋ gebe “Anac jao eŋ atom, gebe ŋac, taŋ kêkêŋ kisa geseŋ amac atom naŋ, kêpuc amac tôŋ.”
Lau Samaria sêkôc Jesu sa atom
51 Ŋanoc taŋ Anôtô gebe êkôc Jesu saŋa naŋ kêdabiŋ, tec Jesu kêsêlêŋ kepeŋ Jerusalem gêja,
52 ma kêsakiŋ laujaeŋ sêmuŋ eŋ. Ma êsêac sêsô lau Samaria nêŋ malac teŋ sebe sêmansaŋ ênê gamêŋ kwanaŋgeŋ.
53 Mago lau tau sêkôc eŋ sa atom gebe eŋ kêsêlêŋ kepeŋ Jerusalemgeŋ.
54 Ŋacseŋomagêc Jakobo agêc Joaŋ sêlic ma sêsôm gebe “Apômtau, aôm gobe aêac asôm gebe ja êsêp aŋga undambê mêŋêniŋ êsêac su me masi.”
55 Tec Jesu kêkac tau ôkwi ma gec biŋ êsêagêc gebe “Asa ŋalau latu amagêc. Ŋamalacnê Latu gêmêŋ gebe enseŋ launêŋ katuŋ su atom, gêmêŋ gebe ênam sa.”
56 Ma ac sêc sêja malac teŋ.
Lau sebe sêndaŋguc Jesu
(Mat 8:19-22)
57 Êsêac sêsêlêŋ sêmoa intêna ma ŋac teŋ kêsôm gêdêŋ eŋ gebe “Gamêŋ taŋ aôm gobe ôna naŋ, aê oc jandaŋguc aôm.”
58 Tec Jesu kêsôm gêdêŋ eŋ gebe “Mojaŋ sê ic ma moc, taŋ sêmoa umboŋ ŋalabu naŋ, sêjam sac. Mago Ŋamalacnê Latu nê gamêŋ teŋ gebe endeŋ kwalim ênêcŋa gêc atom.”
59 Go kêsôm gêdêŋ ŋac teŋ gebe “Ôndaŋguc aê.” Ma ŋac tonaŋ kêsôm gebe “Apômtau, ôlôc acgom gebe jana jansuŋ tamoc acgom.”
60 Tec Jesu kêsôm gêdêŋ eŋ gebe “Andec ŋacmatê sênsuŋ tauŋ nêŋ ŋacmatê ma aôm ôna ôsôm Anôtônê gamêŋ ŋawae lasêmaŋ.”
61 Go ŋac teŋ kêsôm gebe “Apômtau, aê gabe jandaŋguc aôm. Tageŋ ôlôc êmuŋ êndêŋ aê gebe jana ma jakam ŋoc gôlôac lemeŋ acgom.”
62 Tec Jesu kêsôm gêdêŋ eŋ gebe “Ŋac taŋ lêma gêdêŋ waŋ ŋagôliŋ su ma mataanô geogeo naŋ, kêtôm Anôtônê gamêŋ atom.”