14
Sêkic Jesunê biŋ
(Mat 26:1-5; Luk 22:1-2; Joaŋ 11:45-53)
1 Om Pasa to Polom Ŋalucŋa ŋabêc luagêcgeŋ gêc ma lau dabuŋsêga to biŋsutau sêsôm intêna sebe sêkôc Jesu tôŋ kelecgeŋ ma sênac eŋ ênduŋa.
2 Ma sêsôm gebe “Daŋgôm êndêŋ om atom, moae tali launêŋ ŋalêlôm sa.”
Awê teŋ geŋ oso Jesu aŋga Betania
(Mat 26:6-13; Joaŋ 12:1-8)
3 Jesu geŋ gêŋ gêŋgôŋ ŋac tokamocbôm Simon nê andu aŋga Betania tec awê teŋ gêmêŋ kêkôc ŋop kwalam-kwalam togêŋmalu ŋajamanô, taŋ ŋaôli kapôêŋ kêlêlêc naŋ, mêŋkêtuc ŋop tau popoc ma kêkêc kêpi Jesu môkêapac.
4 Lau ŋagêdô sêmoa, taŋ têtu môsi ma sêsôm gêdêŋ tauŋ gebe “Amboac ondoc sêjaiŋ gêŋmalu tonaŋ.
5 Sêkêŋ gêŋmalu tau êndêŋ lau sênam ôlimaŋ ma sêkôc êlêlêc denari 300 su ma sêkêŋ êndêŋ lau ŋalêlôm sawa acgom.” Ma êsêac sêsac awê tau.
6 Tec Jesu kêsôm gebe “Andec eŋmaŋ, amboac ondoc agôm ênê ŋalêlôm ŋawapac kêsa. Eŋ kêmoasiŋ aê ŋanôgoc.
7 Lau ŋalêlôm sawa oc sêŋgôŋ sêwiŋ amac ŋapaŋ. Embe têmtac êwiŋ, oc atôm gebe amoasiŋ êsêac. Mago aê oc jaŋgôŋ jawiŋ amac ŋapaŋ atom.
8 Gêŋ taŋ eŋ kêtôm gebe êŋgômŋa naŋ, tec gêgômgac. Eŋ geŋ oso aê ôlic kwanaŋgeŋ kêtu sênsuŋ aêŋa.
9 Biŋŋanô, aê jasôm êndêŋ amac gebe Aŋga nom samucgeŋ ŋagamêŋ embe sênam mêtê êpi ŋawae ŋajam, oc sênac miŋ gêŋ, taŋ eŋ gêgôm naŋ êwiŋ, gebe taêŋ ênam eŋ.”
Juda Isariot gêlôc gebe eoc Jesu lasê
(Mat 26:14-16; Luk 22:3-6)
10 Go êsêac lau 12 nêŋ teŋ, Juda lsariot, gêdêŋ lau dabuŋsêga gêja gebe eoc Jesu lasê.
11 Êsêac sêŋô e têntac ŋajam kêsa ma sêjac mata gebe sêkêŋ mone êndêŋ eŋ. Tec eŋ gêdib gebe êtap ŋasawa ŋajam teŋ sa gebe eoc eŋ lasêŋa.
Jesu geŋ Pasa gêwiŋ nê ŋacseŋomi
(Mat 26:17-25; Luk 22:7-14, 21-23; Joaŋ 13:21-30)
12 Gêdêŋ Om Polom Ŋalucŋa ŋabêc ŋamataŋa, taŋ sêbuc-sêbuc domba Pasaŋa naŋ, ênê ŋacseŋomi sêsôm gêdêŋ Jesu gebe “Aôm gobe aêac naamansaŋ gamêŋ ôniŋ Pasa ômoaŋa ênêc ondoc.”
13 Tec Jesu kêkêŋ nê ŋacseŋomi luagêc ma kêsôm gêdêŋ êsêagêc gebe “Agêc ana malac, oc andac ŋac teŋ gegeŋ ku buŋa, naŋ andaŋguc eŋ
14 e naaô lasê andu, taŋ eŋ oc êsô êna naŋ, ma asôm êndêŋ andu ŋatau gebe ‘Mêtêmôkê kêtu kênac aôm gebe Ŋoc balêm, taŋ janiŋ Pasa jawiŋ ŋoc ŋacseŋomi naŋ, gêc ondoc.’
15 Ma eŋ oc êtôc balêm ŋalêlôm kapôêŋ teŋ êndêŋ amagêc, taŋ gêc ŋadeŋ ŋaôŋa ma sêpô adêŋ kwanaŋgeŋ naŋ. Tec amansaŋ aêacnêŋ gêŋ amoa balêm tonaŋ.”
16 Ŋacseŋomagêc sêsa jasêô lasê malac ma têtap sa kêtôm eŋ kêsôm gêdêŋ êsêagêc, go sêmasaŋ Pasa.
17 Kêtula acgom, go Jesu tonê lau 12 sêwiŋ tauŋ sêja.
18 Seŋ gêŋ sêŋgôŋ ma Jesu kêsôm gebe “Biŋŋanô, aê jasôm êndêŋ amac gebe Amacnêm ŋac teŋ, tec geŋ gê gêwiŋ aê gêmoa nec, oc eoc aê lasê.”
19 Êsêac sêŋô e nêŋ ŋalêlôm ŋawapac kêsa ma sêkêŋ tauŋ tageŋ-tageŋ jatêtu kênac eŋ gebe “Oc aê me.”
20 Ma Jesu gêjô êsêac aweŋ gebe “Amac 12 nêm teŋ, taŋ kêsac gêŋ tôŋ kêsêp laclu gêwiŋ aê.
21 Ŋamalacnê Latu tau oc êsa nê lêŋ êtôm teto gêc. Tageŋ ojae ŋac tauma, naŋ eoc Ŋamalacnê Latu lasê naŋ, têna êkôc eŋ atommaŋ.”
Apômtaunê moasiŋ dabuŋ
(Mat 26:26-30; Luk 22:15-20; 1Kor 11:23-25)
22 Seŋ sêmoa, go Jesu kêkôc polom mêŋgêjam daŋge su ma kêpô kêkôc jakêkêŋ gêdêŋ êsêac ma kêsôm gebe “Akôc êwac, aêŋoc ôlic tonec.”
23 Go kêkôc laclu mêŋgêjam daŋge su ma kêkêŋ gêdêŋ êsêac ma ac samob sênôm kêsêp tonaŋ.
24 Go Jesu kêsôm gêdêŋ êsêac gebe “Aêŋoc dec jamoatiŋ poacŋa tau tonec, taŋ kêkêc siŋ kêtu taêsamŋa.
25 Biŋŋanô, aê jasôm êndêŋ amac gebe oc janôm waiŋ ŋanô êtiam atom, e êndêŋ bêc ônê, go janôm wakuc aŋga Anôtônê gamêŋ.”
26 Sêsôm wê moasiŋŋa su acgom, go sêpi Lôckatêkwi sêja.
Jesu kêkêŋ puc Petere
(Mat 26:31-35; Luk 22:31-34; Joaŋ 13:36-38)
27 Ma Jesu kêsôm gêdêŋ êsêac gebe “Amac samob oc awi aê siŋ gebe teto gêc gebe ‘Aê janac ŋacgejob ma domba sêc êliŋ-êliŋ.’
28 Mago embe jandi sa su, oc jamuŋ amac jana Galilaia.”
29 Ma Petere kêsôm gêdêŋ eŋ gebe “Samob embe sêwi aôm siŋ, mago aê taucgeŋ oc masi.”
30 Ma Jesu kêsôm gêdêŋ eŋ gebe “Biŋŋanô, aê jasôm êndêŋ aôm gebe Êmbêc tonec talec oc êtaŋ êtu dim luagêc atomgeŋ, ma aôm oc ônsa aê auc êtu dim têlêac.”
31 Ma Petere gêôc lêŋ tau gêc-gêcgeŋ gebe “Sênac aê êndu jawiŋ aômmaŋ, aê gabe jansa aôm auc atomanô.” Ma êsêac samob sêsôm amboac tonaŋgeŋ.
Jesu keteŋ mec gêmoa kôm Getsemane
(Mat 26:36-46; Luk 22:39-46)
32 Go ac sêô lasê gamêŋ teŋ, ŋaê Getsemane, ma eŋ kêsôm gêdêŋ nê ŋacseŋomi gebe “Aŋgôŋ tonec, aê gabe jateŋ mec acgom.”
33 Ma kêkôc Petere agêc Jakobo ma Joaŋ sêwiŋ eŋ. Eŋ kelendec ma katu kêlênim tau gêmoa,
34 ma kêsôm gêdêŋ êsêac gebe “Ŋoc katuc ôluŋ-ôluŋgeŋ e gabe jamac. Amoa tonec ma anam jali.”
35 Go kêsa ŋasawa gêŋgic sauŋgeŋ gêja e gêu tau gêc nom ma keteŋ gebe embe êtôm, go têm wapacŋa êôc lêlêc eŋ.
36 Ma kêsôm gebe “O Tamoc, aôm kôtôm gêŋ samob, ôkôc laclu tonec su aŋga aêmaŋ. Mago aêŋoc biŋ êtu tôŋ atom, aômgeŋnêm biŋ êtu tôŋ.”
37 Go gêmu gêja e gêlic êsêac sêc bêc. Ma kêsôm gêdêŋ Petere gebe “Simon, aôm gôêc bêc me. Aôm oc ônam jali ockatu ŋasawa tageŋ ôtôm atom me.
38 Aŋam jali to ateŋ mecmaŋ gebe lêtôm êtap amac sa atom. Ŋalau ôli palê, mago ôlim tekwem gêbac.”
39 Go gêja kêtiam ma keteŋ mec kêsôm biŋ tonaŋgeŋ.
40 Ma gêmu gêja kêtiam e gêlic êsêac sêc bêc gebe mateŋanô ŋawapac kêsa su ma sêjam kauc biŋ sêjô eŋ awêŋa.
41 Go gêmu gêja kêtu dim têlêacŋa ma kêsôm gêdêŋ êsêac gebe “Aêc bêc to alêwaŋ taôm amoa me. Kêtômgac, ŋanoc tau kêdabiŋgac. Alicgac me, sêkêŋ Ŋamalacnê Latu êsêp lau sec lemeŋ.
42 Andi sa ma tawac. Alic acgom, ŋac-eoc-aê-lasêwaga mêŋkêdabiŋgac.”
Sêkôc Jesu tôŋ
(Mat 26:47-56; Luk 22:47-53; Joaŋ 18:2-12)
43 Kêsôm biŋ gêmoa ma gacgeŋ êsêac 12 nêŋ teŋ, Juda, kêkôc lau pom teŋ sêôc siŋ to olopoac aŋga lau dabuŋsêga to biŋsutau ma laumata nêŋ sêmêŋ.
44 Ŋac-eoc-eŋ-lasêwaga kêkêŋ ŋabelo teŋ gêdêŋ êsêac gebe “Ŋac taŋ jalêsôp eŋ alianô naŋ, ŋac tau tonaŋ. Akôc eŋ tôŋ ma ajop eŋ ŋapep ana.”
45 Jagêô lasê e gacgeŋ gêdêŋ Jesu gêja ma kêsôm gebe “Mêtêmôkê,” ma kêlêsôp eŋ alianô.
46 Ma êsêac sêjac lemeŋ kêsêp eŋ ma sêkôc eŋ tôŋ.
47 Go êsêac, taŋ sêkô sêwiŋ Jesu naŋ, nêŋ ŋac teŋ gêbuc nê siŋ sa ma gêjac dabuŋsêganê sakiŋwaga e kêpa taŋalauŋ su.
48 Ma Jesu awa gêjac êsêac ma kêsôm gebe “Amac amêŋ abe akôc aê tôŋ, mago agôm amboac adêŋ kêjaŋgowaga teŋ, tec aôc siŋ to olopoac gêwiŋ.
49 Kêtôm bêcgeŋ gajam mêtê gamoa lôm dabuŋ gawiŋ amac ma akôc aê tôŋ atom, mago galoc agôm gebe biŋ, taŋ teto gêc naŋ, êtu tôŋ.”
50 Ma ŋacseŋomi s, êwi eŋ siŋ ma sêc sêja.
51 Ma ŋapalê teŋ kêdaguc eŋ gêja. Eŋ gi tau auc ŋa obogeŋ. Ma êsêac sebe sêkôc eŋ tôŋ.
52 Tec kêpô obo siŋ gêcŋa ma gêc ôli ŋaômageŋ gêja.
Dabuŋwaga to laumata sêgôm Jesunê biŋ
(Mat 26:57-68; Luk 22:54-55, 63-71; Joaŋ 18:13-14, 19-24)
53 Êsêac sêkôc Jesu dêdêŋ ŋac dabuŋsêga sêja, ma lau dabuŋsêga to laumata ma biŋsutau samob sêkac tauŋ sa.
54 Ma Petere gêjac tau susu kêdaguc êŋ e jakêsô dabuŋsêganê andu ŋamalac-luŋ gêja jagêŋgôŋ gêwiŋ sakiŋwaga ma kêsêlu ja.
55 Lau dabuŋsêga to laumata samob, taŋ sêkac sa sêmoa naŋ, sêsôm biŋ sebe sêŋgôliŋ êpi Jesu gebe senac eŋ ênduŋa. Mago têtap teŋ sa atom.
56 Lau taêsam sêgôliŋ biŋ kêpi eŋ, mago nêŋ biŋ keso tau samob.
57 Go lau ŋagêdô dêdi sa ma sêgôliŋ biŋ kêpi eŋ gebe
58 “Aêac aŋô gebe eŋ kêsôm gebe Lôm dabuŋ, taŋ sêkwê ŋa lemeŋ naŋ, aê oc janseŋ su ma jakwê teŋ êtiam atôm bêc têlêac, jaŋgôm ŋa lemoc atom.”
59 Sêsôm sêjac ŋawaegeŋ, mago nêŋ biŋ keso tau ŋapaŋ.
60 Ma dabuŋsêga gêdi jakêkô êsêac ŋaluŋ ma kêtu kênac Jesu gebe “Aôm gobe ôjô biŋ atom me. Biŋ amboac ondoc sêgôliŋ kêpi aôm.”
61 Mago Jesu gêjam tau tôŋgeŋ, gêjô êsêacnêŋ biŋ teŋ atom. Ma dabuŋsêga kêtu kênac eŋ kêtiam gebe “Aôm Kilisi, ŋac taŋ alanem eŋ naŋ, Latu aôm me.”
62 Ma Jesu gêjô eŋ awa gebe “Aec, aê tau tonec. Ma amac oc alic Ŋamalacnê Latu êŋgôŋ ŋaniniŋ Ŋatau nê anôŋa ma êwiŋ tao undambêŋa êmêŋ.”
63 Ma dabuŋsêga kêkac nê ŋakwê gêŋgic ma kêsôm gebe “Tapô lêna lau sêsôm biŋ lasêŋa ŋagêdô êtu asageŋŋa.
64 Biŋ alôb-alôb tau tec aŋôgac. Ma abe amboac ondoc.” Tec êsêac samob sêsôm kêtu toŋ gebe “Eŋ ŋac tobiŋ tec êmac êndugeŋ.”
65 Lau ŋagêdô sêkasôp kêpi eŋ ma sêkwa eŋ laŋôanô auc, go sêmêgôm lemeŋ ma têtuc eŋ ma sêsôm gêdêŋ eŋ gebe “Oc lasêmaŋ, asa kêtuc aôm.” Ma sakiŋwaga sêkôc eŋ su to têtap eŋgeŋ.
Petere gêsa Jesu auc
(Mat 26:69-75; Luk 22:56-62; Joaŋ 18:17, 25-27)
66 Ma Petere gêmoa bêbê gêmoa malacluŋ ma dabuŋsêganê sakiŋwagao teŋ gêmêŋ.
67 Eŋ gêlic Petere kêsêlu ja, ma mata gê eŋ e kêsôm gebe “Aôm tec gôwiŋ Jesu Nasaretŋa amboac tonaŋ.”
68 Mago eŋ kêpa tau gebe “Aê kajala ma ŋoc kauc kêsa kêpi biŋ, taŋ aôm kôsôm naŋ atom.” Go eŋ kêsa sacgêdô gêja ma talec kêtaŋ.
69 Sakiŋwagao tau gêlic eŋ ma kêsôm kêtiam gêdêŋ lau, taŋ sêkô-sêkô naŋ, gebe “Êsêacnêŋ ŋac teŋ tônê.”
70 Ma eŋ kêpa tau kêtiam. Sauŋgeŋ acgom, go lau, taŋ sêkô-sêkô naŋ, sêsôm gêdêŋ Petere kêtiam gebe “Biŋŋanôgoc, êsêacnêŋ ŋac teŋ aôm gebe aôm ŋac Galilaiaŋa teŋ.”
71 Mago eŋ gêôc awa sa kêpuc boa tau ma kêtôc lêma gebe “Aê kajala ŋac, taŋ amac asôm ênê biŋ naŋ atom.”
72 Kêsôm biŋ tonaŋ gêmoa e gacgeŋ talec kêtaŋ kêtu dim luagêcŋa. Tec Petere taê gêjam biŋ, taŋ Jesu kêsôm gêdêŋ eŋ naŋ, gebe “Talec oc êtaŋ êtu dim luagêc atomgeŋ ma aôm ônsa aê auc êtu dim têlêac.” Taê gêjam birl tonaŋ ma kêtaŋ ŋanô.