3
1 “Alic acgom, aê oc jasakiŋ ŋoc ŋacjaeŋ gebe êmansaŋ aêŋoc intêna. Ma Apômtau, taŋ amac asom amoa naŋ, gaôgeŋ mêŋêô lasê nê lôm dabuŋ. Ŋacjaeŋ taŋ amac akêŋ matem naŋ, oc êwac ma êsôm ŋoc poac, taŋ kamoatiŋ naŋ lasê.
2 Mago asa êtôm gebe êpuc tau tôŋ êndêŋ bêc eŋ êmêŋŋa. Asa oc êtôm gebe êmoa êndêŋ eŋ êô lasêŋa.
“Eŋ oc êtôm ŋac-kêpac-kiwaga nê ja to ŋac-kêkwasiŋ-obowaga nê sop.
3 Eŋ oc êmêŋ gebe êmêtôc biŋ amboac ŋac, taŋ gêgôm silber to gold ŋakêŋkêŋ kêsa naŋ, ma amboac ŋac-kêpac-kiwaga gêjam nê kôm, naŋ Apômtau oc êŋgôm Lewi latui têtu selec gebe sêkêŋ da gêdêŋ êndêŋ Apômtau.
4 Go da, taŋ lau Juda to lau Jerusalem sêkêŋ gêdêŋ Apômtau naŋ, ênac eŋ mataanô ŋajam êtôm andaŋgeŋ.”
5 Lausiŋ undambêŋa nêŋ Apômtau kêsôm gebe “Aê oc jawac gebe jawa amac sa ŋagaôgeŋ êndêŋ laubeŋ to lau mockaiŋo to mockaiŋŋa ma dansaŋwaga to êsêac, taŋ sêsau sêôc kômwaga nêŋ mone ma onaŋ sêgôm awêtuc to mosêbu sec to têtu kasec lau jaba ma têtêc aê atom naŋ.
Takêŋ geŋ lemelu-lemelu (10-10) ŋateŋ endeŋ Apômtau
6 “Aê Apômtau, gajam tauc ôkwi atom. Ma amac amboac tonaŋgeŋ Jakob latui ŋawakuc amoa ŋapaŋ amboac amoa amboac tonaŋgeŋ.
7 Amac akac taôm su aŋga aêŋoc biŋsu kêtôm nêm mimi ma agôm biŋsu tau ŋanô kêsa atom. Lausiŋ undambêŋa nêŋ Apômtau kêsôm gebe Amu andêŋ aê amêŋ êtiam, go aê jandêŋ amac jawac. Mago amac asôm gebe ‘Aêac amu awac amboac ondoc.’
8 Aê jatu kênac gebe Kêtôm gebe ŋac teŋ êmbuli Anôtô auc me masi. Ma amac tec abuli aê aucgoc.
9 Aê kapuc boa amacnêm lau samob gebe abuli aê auc.
10 Akôc nêm gêŋ lemelu-lemelu ŋateŋ samob amêŋ andu tajac gêŋ saŋa gebe gêŋ taniŋŋa ênêc ŋoc andu. Ansaê aê acgom, go amac oc alic gebe aê oc jalêc undambê ŋakatam su ma jansêwa moasiŋ ŋajamanô wacêpi amac.
11 Aê oc jatiŋ wagô su gebe senseŋ amacnêm gêŋ ŋanô su atom. Ma nêm kôm wainŋa oc ênam ŋanô. Lausiŋ undambêŋa nêŋ Apômtau kêsôm biŋ tonaŋ.
12 Go lau tenteŋlatu samob aweŋ oc êôc amac gebe amacnêm gamêŋ êtu gamêŋ têntac ŋajam ŋa teŋ. Lausiŋ undambêŋa nêŋ Apômtau kêsôm biŋ tonaŋ.”
Anôtô gêjac mata nê moasiŋ
13 Apômtau kêsôm gebe “Amac awem ola gêdêŋ aê. Ma asôm gebe ‘Aêac asôm biŋ ondoc kêpi aôm.’
14 Amac asôm gebe ‘Tanam sakiŋ Apômtau ŋaŋanô masi. Daŋgôm nê biŋ ŋanô êsa ma tasêlêŋ toŋalêlôm ŋawapacgeŋ tamoa lausiŋ undambêŋa nêŋ Apômtau laŋônêm oc ŋajam amboac ondoc.
15 Tec aêac talanem tetoc-tauŋ-sawaga gebe lau sec têtap kôm ŋanôgeŋ sa atom, êsêac embe sênsaê Anôtô ŋa nêŋ lêŋ sec, mago sêwê ŋagêjô sa amboac tonaŋgeŋ.’ ”
16 Go lau, taŋ têtêc Apômtau naŋ, sêjam biŋgalôm gêdêŋ tauŋ. Ma Apômtau kêkêŋ taŋa ma gêŋô biŋ, taŋ êsêac sêsôm naŋ. Ma teto lau, taŋ têtêc Apômtauŋa ma tetoc eŋ sa naŋ, nêŋ ŋaê kêsêp buku teŋ sêkô eŋ laŋônêmŋa.
17 Lausiŋ undambêŋa nêŋ Apômtau kêsôm gebe “Êsêac oc têtu ŋoc lau. Êndêŋ bêc, taŋ aê jakêŋ naŋ, êsêac oc têtu aê tauc ŋoc gêŋ. Ma aê taêc walô êsêac êtôm tama, taŋ taê walô nê latu, taŋ gêjam sakiŋ eŋ naŋ.
18 Êndêŋ tonaŋ amac oc alic êtiam gebe asageŋ gêwa ŋac gêdêŋ ma ŋac alôb-alôb to ŋac, taŋ gêjam sakiŋ aê ma teŋ, taŋ gêjam sakiŋ aê atom naŋ gêŋgic.”