3
Lauo to ŋac nêŋ biŋ
1 Amac lauo asô nêm ŋaci ŋalabu amboac tonaŋgeŋ. Ŋacwaga ŋagêdô embe sêkêŋ êwiŋ Anôtônê biŋ atom, go lauo sêsôm biŋ teŋ atom, nêŋ Iêŋgeŋ êŋgom ŋacwaga sênam tauŋ ôkwi,
2 gebe ŋacwaga sêlic amac asa nêm lêŋ gêdêŋ to atêc Anôtôgeŋ, ec sêndaŋguc.
3 Anam gêlôŋ taôm ŋa gêŋ dêmôêŋa amboac môkêmlauŋ ŋapoactalô tokaiŋtokaiŋ ma anôŋ gold ŋawasi to asô ŋakwê ŋajam-ŋajam nec atom.
4 Anam gêlôŋ taôm ŋa gêŋ ŋalêlômŋa, taŋ ê su atom naŋ. Gêŋ tau tonec gebe amoa tonêm ŋalêlôm malô to ŋaŋêŋ gebe gêŋ tonaŋ ŋai Anôtô gêlic amboac awamata ŋanô.
5 Andaŋgeŋ lauo dabuŋ, taŋ sêkêŋ mateŋ Anôtô naŋ, sêjam gêlôŋ tauŋ ŋa awamata tonaŋ, ma sêsô nêŋ ŋaci ŋalabu ŋapep.
6 Sara kêtôm tonaŋ. Eŋ taŋa wamu Abraham ma kêsam eŋ gebe Ŋoc apômtau. Amac embe aŋgôm gêŋ ŋajam to atêc gêŋ teŋ atom, go atu Sara latuio.
7 Amac ŋacwaga amboac tonaŋ. Awiŋ nêm lauo tokaucgeŋ, gebe êsêac ôliŋwalô kêtôm amac atom. Atoc êsêac sageŋ gebe êsêac sêwê kaiŋ moasiŋ daŋgôŋ mateŋ jaliŋa amboac tonaŋ. Aŋgôm geŋ tau gebe gêŋ teŋ êkô amacnêm mec auc atom.
Daôc ŋandaŋ êtu biŋgêdeŋŋa
8 Aê jakatoŋ ŋoc biŋ sa amboac tonec gebe Amac samob nêm biŋ elom tau ŋajam. Aôc gêŋwapac awiŋ taôm, têmtac êwiŋ lasitêwai to atoc taôm sa atom, êkôniŋ taômgeŋ.
9 Akêŋ sec êjô sec atom ma biŋ alôb-alôb êjô biŋ alôb-alôb atom, akêŋ mecgeŋ êjô. Taêm ênam gebe Anôtô kêkalem amac gebe awê kaiŋ mec êtu nêm gêŋlênsêm.
Gebe teto gêc gebe
10 “Ŋac taŋ têtac gêwiŋ gebe êmoa mata jali
ma gebe êmoa ŋajamgeŋ naŋ,
ejop imbêla êndêŋ biŋ sec
to gêdôôlic êndêŋ biŋdansaŋ.
11 Eŋ ênac jaê sec to êŋgôm gêŋ ŋajam.
Eŋ ensom biŋmalô ma êndaŋguc e naê tôŋ,
12 gebe Apômtau mata kêsap lau gêdêŋ
ma kêkêŋ taŋa nêŋ mec.
Mago Apômtau laŋô gelo lau, taŋ sêgôm sec naŋ.”
13 Embe aŋgôm ŋajam atu dôbgeŋ, ma asa oc êŋgôm amac atu sec.
14 Embe aôc gêŋwapac êtu adaguc biŋ gêdêŋŋa, go aê aoc êôc amac. Ŋamalacnêŋ biŋ êtakê to êlênsôŋ amac atom.
15 Atôc Kilisi sa aŋga nêm ŋalêlôm ma akêŋ eŋ êtu nêm Apômtau. Amansaŋ taôm ŋapaŋ e lau teŋ embe teteŋ amac gebe awa biŋ, taŋ akêŋ matem gêc nêm ŋalêlôm naŋ sa, naŋgo gaôgeŋ asôm lasê êndêŋ êsêac.
16 Aŋgôm totêmtac malô ma ajop taômgeŋ, gebe nêm ŋalêlôm ŋajam, ec êŋgôm êsêac, taŋ sêgôliŋ biŋ kêpi amac to sêbu amac, taŋ asa Kilisinê lêŋ ŋajam naŋ majeŋ.
17 Anôtô embe taê ênam gebe aôc ŋandaŋ êtu agôm ŋajamŋa naŋ, oc ŋajam êlêlêc aôc ŋandaŋ êtu agôm secŋa su.
18 Kilisi amboac tonaŋ. Eŋ gêmac êndu kêtu dim tageŋ kêtu aêacnêŋ secŋa. Ŋac gêdêŋ gêjô aêac lau gêdêŋmê su, gebe êwê aêac dandêŋ Anôtô tana. Êsêac sêjac eŋ ôligeŋ êndu, mago Ŋalau kêkêŋ eŋ mata jali kêsa.
19 Ma toŊalaugeŋ gêja gêjam mêtê ŋalau, taŋ sêŋgôŋ kapoacwalô naŋ.
20 Gêdêŋ andaŋgeŋ êsêac sêkêŋ gêwiŋ Anôtônê biŋ atom. Anôtô kêsaê êsêac to gê êsêacnêŋ biŋ tôŋ gêdêŋ taŋ Noa gêsô waŋ gêmoa naŋ. Waŋ tonaŋ gêjam lau 8geŋ sa selom bu kêsuŋ ŋatêna.
21 Bu tonaŋ kêtu busaŋgu, taŋ galoc gêjam amac kêsi naŋ ŋadôŋdôŋ. Busaŋgu tau êkwasiŋ ŋatêmui ôliŋŋa su atom, mago êtu môêc endeŋ Anôtô gebe êmansaŋ ŋalêlôm ŋawa êsa êtu Jesu Kilisi gêdi saŋa.
22 Eŋ kêpi undambê gêja jagêŋgôŋ Anôtônê anôŋa, ma aŋela to ŋaclai ma ŋactêkwa sêsô eŋ ŋalabu.