6
1 Barà yi ri sa swàm ma Shìdun níng, yi ri vig ning kada aning zìg kàng àsàn Shìdun àràg í bu átai bàna.
2 Shìdun dang rag,
“N fig hing jírwú á sai-à ǹ sa ya sig wù bu sìsàn níng.
Ayúnn-à ǹ pinn zu wù áni níng, ǹ sa shang hing wù.”
Mì ri dinya ning, tàma-à níng í sai-à Shìdun má sa ya mpìr bu ǹsàn. Jàná-à níng í àyúnn-à Shìdun má pinn zu mpìr.
3 Yi zìm fig á mpìr zyun kà á gbìb ajànn á jir bu zyun-à yi ri sa bàna. Yi ri zìm mpìrká abig myàng swàmyí í swàm ǹsàn.
4 Bu-à ya sa bidìm pár yi ri tìya mpìrká rag yi í fàuká bu Shìdun. Yi ri tib wann pìkyinn sai-à yi ri wa shwìn, ma sai-à mpìrká ma sa yi bu-à bibai, ma sai-à ya bàna ma bu.
5 Mpìrká dab yi gbar, big kìg yi á tonn fi, big kwonn dab yi, yi sa swàm sa sa, yi na fig aná bàna, amor gban yi gban gban.
6 Yi ri tìya mpìrká rag yi í fàuká bu Shìdun á jir pìkyinn kyìkyàryí ni, ma yaryí, ma pìkyinn tibyí, ma kyinn ajunyí, ma barà Awun Shìdun ri kyann kwonn ma yi, kwonn ma barà yi ri zìm mpìrká,
7 ma jir àbyannyí yi ri dang, kwonn ma gbam Shìdun. Asànyí shi sig àràg í buká big ri nu kànn ma kàhi, wà zyun-à yá pànn vù pyànà má nu pinn zu shinnyí ma kàhi.
8 Su zyun mpìrká ri wib jíryí, su zyun big ri sa yi yawari. Su zyun big ri tìr ya yi jír, su zyun big ri swam yan yi. Big ri myàng yi àràg yi í agim ǹsáng big. Ama yi í mpìrká ri dang jír àbyann.
9 Big ri sìnn kàng yi shi rag big yì fig yi bàna, ama big yì hing yi. Big ri sìnn kàng yi àràg yi shi sig íri awain átai, ama yi shi sig ma yonki. Big dab yi dab dab, ama big gban sar fig yi bàna.
10 Big ri sa bai yi pìkyinn, ama yi ri fig àjwár. Big ri myàng yi àràg yi í mpìr ashi, ama yi ri sa mpìrká nìnànn nímá ri dìg bu. Big ri myàng yi àràg yi bàna ma bu, ama kó kai bidìm pár í buyí.
11 Mpìrká á Korinti, yi dinya kyàr rìghing ning bu bidìm pár. Yi tàm fig ning bu zyun á kyinnyí ni bàna.
12 Yi ri tàg rag yi ri zìm ning wàni. Ama ning í àsàinká ri tàg rag ning ri zìm fig yi bàna.
13 Mì ri dinya ning tàma-à níng àràg ning í yanká bumí. Aning zìm yi àràg barà yi ri zìm ning. Aning tìya yi rag ning ri zìm yi.
Kada Aning Kwonn Shinn Ma Mpìrká Ri Bàg Fig Yesu Bàna
14 Kada aning kwonn shinn ma mpìrká ri bàg fig Yesu bàna. Mpìr kyinn sìsàn má sa sar fig swàm ma mpìr kyinn bibai bàna. Ayar ma fi má sa kwonn sar fig swàm í byar ńzyun bàna.
15 Kristi ma Shaitan má kwonn sar fig nu bàna. Bu-à má kwonn mpìrká ri bàg Yesu ma ká ri bàg fig ku bàna níng, bàna.
16 Bu-à má kwonn lu Shìdun ma buki níng bàna. Yi í lu Shìdun, àràg barà ku ma shinnwá ku dang sig rag,
“Má shi kà áyau mpìrká bumí ni.
Má kyann kyonn ma big.
Bá wib mì Shìdunbá. Bá shi mpìrká bumí.”
17 Shìdun dang sig rag,
“Aning zu áyaubá ni. Aning gàb dìr ma big.
Kada aning sa bu-à má í bu jín bàna, àjirà ń pànn ning vù pyànà.
18 Má shi taná. Ná shi yanká bumí, wunù ma uwà bidìm pár.
Wàníng í bu-à Shìdun àsàin-à kab sig kó kai bidìm pár, dang sig.”