Tagara̱da u
Habaku
Ukukpa̱ u kadyanshi
Habaku matsumate korongu ta̱ tagara̱da u na vi kahu kakuma̱ ka ama ka Babila a wacinsa Urishelima a bidya kpam aza a Yahuda ubana a tsuwula̱. Akorongi a ushani a yawunsa ta̱ udani u ili I'ya ya tuwa̱ a yan ta̱ u ɗa kahu makorishi ma tsugono tsu Josaya a Yahuda.
A kapashi ka kagita̱ ka tagara̱da u na vi, matsumate mi ma dambula ta̱ an unamba u ucira u Yahuda wa̱ri a udoku kakuma̱, shegai kadambula ka ne ka yan ta̱ ushani n u'ya̱nga̱sa̱ka̱ u pige n uwacinsa u ɗa aza a Babila a yankai kakuma̱ ka ama ka ka kyawan le.Nala ɗa u zuwai u yain kadyanshi n Magono ma Zuba kpam n kamatsakundama a kaci ka afada a ɗa a'a̱ri dere, u wecikei, <<Ndya i zuwai vu paɗai bini, va wundya ama a cingi a ka wacinsa aza ɗa a la le ukuna u maci?>> (1:13). Uzapige wushuki u danai wa yan ta̱ afada a'ayin a ɗa u ɗanga̱sai. A kapashi ka ire ka tagara̱da vi, u wutukpa̱ ta̱ u ɗa karara an a ka gba̱ kakuma̱ ka ama mavura adama ukuna u cingi u le (2:5-20; kondo dem 1:6).
A makorishi ma tagara̱da u na vi u wenike ta̱ ya Kashila̱. Habaku yan ta̱ kavasu kpam u wenikei tsupige tsu ne tsa tsa tuwa̱ (3:3-15). Ko an u wokoi matsumate mi ma reve gba̱ ili I'ya Magono ma Zuba ma yan wa, u rotsongusu ta̱ tyoku ɗa wa pityanangu n kakiri n ukuna u ɗa wa̱ri dere u ne, kpam u yain maza̱nga̱ asuvu a ne.
Ili i'ya i'a̱ri a tagara̱da u na vi:
Kamatsakundama ka re ka Habaku n u wushuku kure u Magono ma Zuba (1:1—2.4)
Ter ɗe aza ɗa bawu ya yan dere (2:5-20)
Kavasu ka Habaku (3:1-19)
1
1 Akani a Kashila̱ a ɗa Habaku matsumate u wenei a asuvu a kuwene a ɗa na.
Kushen ku kagita̱ ku Habaku ubana ara Magono ma Zuba
2 Magono ma Zuba, hal ubana n were ɗa ma lya vu kapala n uꞌisa̱ adama a uɓa̱nga̱,
kpam vu pana̱ka mu wa?
N tuko kushen ku va̱ ara vunu,
adama a uꞌya̱nga̱sa̱ka̱, kpam vu wauwa mu wa?
3 Ndya i zuwai vu zuwa mu n wenei ukuna u cingi u na?
Ndya i zuwai vu a̱sa̱ka̱i aza a ukuna u cingi?
Mawunuka n uꞌya̱nga̱sa̱ka̱ u ɗa na a kapala ka va̱;
ama ɗa a kyawan mu aza a uciga kushulu n kananamgbani a ɗa.
4 Adama a nala a ka tono kpam mele wa,
afada a ɗa aꞌa̱ri dere a ka yan kpam manyan wa.
Tsicingi tsu kyawan ɗe ukuna u maci,
adama a nala ɗa a ka kpatala̱sa afada a maci.
Magono ma Zuba ma wushunki matsumate
5 Magono ma Zuba ma danai, <<Weɓele kakuma̱ ka ama vu wene,
va yan ta̱ majiyan cika,
kpaci ma yan ta̱ ili i roku aꞌayin a ɗe
iꞌya bawu ya wushuku n iꞌya,
ko a tonuko ɗa̱ baci.
6 Wundya, ma na̱ka̱ ta̱ aza a Babila ucira,
uyamba u ɗa wa̱ri n asuvu a shen n kushulu.
Aza a ɗa aꞌa̱ri a kutambu ko nte wa a likimba,
tsa̱ra̱ a wususa asu u ndishi ɗa bawu wa̱ri u le.
7 Aza ɗa aꞌa̱ri n u yanki u uwonvo n u giruwuka̱,
n a yanyi afada a le tyoku ɗa a ka ciga
a yanka kpam kaci ka le tyoku ɗa u gan le.
8 Adoki a le a la ta̱ anama ilyaɗi,
asuvu a shen a le a la ta̱ a nleweni n ɗa ma̱ri n kambulu.
Adoki a asoje a le a tsu tuwa̱ ta̱ n agoni,
asoje a le kpam mɓa̱ri n ɗa a tsu wuta̱.
A tsu imkpa ta̱ tyoku maguri
n maloko ma ufula̱.
9 Gba̱ le a tsu tuwa̱ ta̱ adama a uꞌya̱nga̱sa̱ka̱,
a tsu pana ta̱ uwonvo u le kahu a rawa.
A tsu ɓolomgbono ta̱ agbashi ushani yavu kayala.
10 A tsu yanka ta̱ ngono majari,
a dosuso kpam nkoshi.
A tsu goro ta̱ ilyuci iꞌya a kanzai n asaga,
aku a ɓolomgbono kayala a yuwa̱ a lyai iꞌya n kuvon.
11 A tsu wura ta̱ n maloko yavu uwule.
Ele aza a unyushi a ɗa,
aza ɗa a bidyai ucira u le u woko le kashila̱.>>
Habaku doki u bankai kushen ku ne ara Magono ma Zuba
12 Magono ma Zuba, a ɗa va̱ri hal a ubana!
Magono ma Zuba Kashila̱ ka va̱, ka Uwulukpi u va̱,
avu va kuwa̱ wa.
Magono ma Zuba, aɗa vu zuwai aza a Babila a yanka tsu afada.
Aɗa Katali ka va̱, aɗa vu ɗanga̱sa le a yan tsu mavura.
13 Aꞌeshi a vunu aꞌa̱ ta̱ uwulukpi,
vu tsu fuɗa vu weɓele ukuna u cingi wa,
kpaci vu tsu ciga ukuna u cingi wa.
Ndya i zuwai vu a̱sa̱ka̱i aza a ukuna u cingi n aza a mayinsa̱ka̱?
Ndya i zuwai vu paɗai bini,
va wundya ama a cingi a ka kaɗuwunsa aza ɗa a la le ukuna u maci?
14 Niɗa va yan n ama tyoku u adan a kushiva̱,
ko yavu ili iꞌya ya ka̱bura̱ iꞌya bawu aꞌa̱ri n uzapige?
15 Aza a Babila yi, a tsu ka̱na̱ ta̱ ama
tyoku ɗa uza u kuga̱ u tsu ka̱na̱ adan.
A rono le n ibilili
aku a yain isali i maza̱nga̱ an a ka̱na̱ le.
16 Adama a nala, a tsu lyaka ta̱ ibilili i le kayala hal a yain uɗara̱kpa,
kpaci ibilili i le i ka̱na̱ka̱ le ta̱ ili i shinga iꞌya a lakai uciga.
17 Nala va a̱sa̱ka̱ a lyai kapala n uka̱na̱sa̱ u ama n ibilili i le a ubana,
tsa̱ra̱ a lyai kapala n uwacinsa kakuma̱ ka ama bawu asuvayali?