2
1 Ma yuwa̱ ta̱ kunukuzuba ku uza u uwundya n wene,
n pana kpam ili iꞌya Magono ma Zuba ma tonuko mu,
n tyoku ɗa ma wushuku a kaci ka kushen ku va̱ ki.
Magono ma Zuba ma wushunki Habaku
2 Aku Magono ma Zuba ma wushunku mu, u danai,
<<Korongu kuwene ki kpam ku wuta̱ mai a agbagala a atali,
kotsu uza ɗa wa yan ka̱neshi vi u yain u ɗa mai n u wali.
3 Korongu kuwene ki, kpaci aꞌayin a ɗa a ɗanga̱sa̱kai kuwene ki kotsu a yan wa.
Shegai aꞌayin a ka tuwa̱ ta̱ n maloko,
kpam ili iꞌya n wenike vu vi ya woko ta̱ mayun.
Ko aꞌayin yi a tuwa̱ baci n maloko wa, vu vana.
Mayun ɗa ukuna vi wa gita̱, kpam wa ɓa̱ra̱kpa̱ wa.
4 <<Akani a ɗa na: <Uza ɗa baci bawu katakasuvu ka ne ka̱ri dere, wa kuwa̱ ta̱,
shegai uza ɗa wa yan ukuna u maci wa yan ta̱ uma,
kpaci wa yan ta̱ ukuna u mayun n Kashila̱.> >>
Ter ɗe aza ɗa bawu ya yan dere
5 Mini ma cinwi ma tsu vurusa̱ ta̱ vuma,
aꞌa̱ ta̱ n ugbami u kaci n ara̱ɗi bawu a ka wunvuga,
wa̱ ta̱ yavu ukpa̱ bawu wa ciwa̱.
Adama a nala ɗa a tsu lya uyamba adama a kaci a le.
6 <<Gba̱ ama yi a ka yanka yi ta̱ majari n a dosusi yi n magori, n a dansi,
<<Ter vunu, avu uza ɗa va ɓolomgbonusuko kaci ka vunu ili iꞌya bawu iꞌa̱ri i vunu!
Hal nwere ɗa va ɓolomgbonusuko kaci ka vunu udukuyan a asu maryafuka?>>
7 Maken ma̱ la wa, aza ɗa a ka tono vu kutan a ka ꞌya̱nga̱sa̱ka̱ vu ta̱ bawu vu revei.
Aza ɗa a ka tono vu kutan a ka rikpa̱na̱ka̱ ta̱ a zuwa vu ujeke ikyamba,
kpam va woko le ta̱ ucanga u ɗa a pura̱i a asu u kuvon.
8 An u wokoi vu purusa̱i ucanga u ama a uyamba ushani,
gba̱ aza ɗa a lai a ka purusa̱ vu ta̱ dem ucanga.
Nala wa gita̱ ta̱ kpaci vu wotsongusu ta̱ mpasa ma ama,
n kunangasu ka vu yankai iyamba,
n ilyuci i pige i pige n aza ɗa aꞌa̱ri pini ndishi gba̱.
9 <<Ter vunu, avu uza ɗa va zamuka kuwa ku vunu utsa̱ri a asu u yan ukuna u cingi,
va maka kaci ka vunu kuwa a zuba u masasa,
tsa̱ra̱ vu wauwa kaci ka vunu a asu ukuna u cingi!
10 Afoɓi a cingi a vunu a ronuko ta̱ kuwa ku vunu uwono,
an u wokoi vu wunusai ama ushani,
kpam avu dem a ka wuna vu ta̱.
11 Hal n atali a kuma ku asaga a vunu a ka sa̱ a kaci ka vunu,
nɗanga n kusapu dem n wushuki.
12 <<Ter vunu, avu uza ɗa va ma ilyuci na̱ mpasa ma ama,
kpam va shigba̱ ilyuci i pige a asu u uyan ukuna u cingi.
13 Panai na, uciga u Magono ma Zuba Uza u Ucira Gba̱
u ɗa ama a yain manyan tsa̱ra̱ akina a lyai gbani wa?
Iyamba kpam i wowotongusu kaci ka le gbani wa?
14 Shegai likimba wa shaɗangu ta̱ n ureve u tsupige tsu Magono ma Zuba,
tyoku ɗa mini ma shaɗangi mala.
15 <<Ter vunu, avu uza ɗa va zuwa aza a karen a vunu a soi,
va tsungusuku le tsukonu a ncuwani n a soyi hal a gutukpa,
tsa̱ra̱ vu wundi le kataɓa.
16 A una̱ u karinga̱, va shaɗangu ta̱ n uwono.
Gogo-na aɗa va so hal vu gutukpa!
Kpaci macuwani ma ma̱ri a kukere ku lyaki ku
Magono ma Zuba ma gono ta̱ ara vunu,
aku uwono u kimba̱ tsupige tsu vunu.
17 Kunangasu ka vu yain a Lebanon, ka gono ta̱ a kaci ka vunu.
Vu wunai nnama n ɗa ma̱ri pini, gogo-na a ka ne vu ta̱ uwonvo.
Nala wa gita̱ ta̱ kpaci vu wotsongusu ta̱ mpasa ma ama,
n kunangasu ka vu yankai iyamba,
n ilyuci i pige i pige n aza ɗa aꞌa̱ri pini ndishi gba̱.
18 <<Nte kalen ka kameli ka vuma rumai,
ko kameli ka urim ka ka wenishike kaɓan maco?
Kpaci uza ɗa u rumai ka vi u pityanangu ta̱ n ili iꞌya u rumai,
u rumai kameli ka bawu ka dansa.
19 Ter vunu, avu uza ɗa wa tonuko kagbukulu, <Rikpa̱na̱ka̱!>
Ko kpam u tonuko katali ka bawu ka̱ri n uma, <ꞌYa̱nga̱!>
Kameli ka fuɗa ka wenike ili iꞌya iꞌa̱ri usokongi?
Wundya, a kumana ta̱ ka n azurufa n zinariya,
shegai ka̱ri n kuvi wa.
20 Magono ma Zuba tani ma̱ ta̱ a Kuwa ku ne ku uwulukpi.
A̱sa̱ka̱ likimba gba̱ u paɗa bini a kapala ka ne.>>