7
Vanai Kashila̱ ka iwauwi
1 Ter va̱! Kpaci n woko ɗe
yavu uza ɗa wa pana kambulu,
uza ɗa bawu u tsa̱ra̱i ili an u ɓolomgbonoi ilimaci i kashina.
An a 'yarai kashina ka cinwi,
ilimaci i cinwi i'a̱ la i'ya ka kasa a lyai wa,
kpam bawu ilimaci i kapopi i gewi
i'ya ma ciga.
2 Ama a maci a kotsu ɗe a uyamba vi;
aza a ukuna u mayun a buwa wa.
Ya dem wa putsa̱ utoku u ne tsa̱ra̱ u wuna,
ya dem u wanda̱ga ta̱ utoku u ne utyangi.
3 Ya dem wa̱ ta̱ n ureve a asu u uyan ukuna u cingi n akere a ne,
azapige a ka ciga a na̱ka̱ le kune,
aza a afada kpam a ka wusha ukimba̱ u una̱,
uzapige u tsu zuwa ta̱ a yain ili i cingi i'ya katakasuvu ka ne ka ciga,
nala a tsu kpatala̱sa ukuna u mayun.
4 Vuma ɗa lai uyansa ili i shinga a asuvu a ɗe,
wa̱ ta̱ yavu maɗanga ma kaworo,
vuma ɗa lai u ukuna u maci asuvu a le
wa̱ ta̱ yavu maɗanga ma kawana.
Kain ka mavura ma ɗe ka tuwa̱ ɗe
kain ka a ka ɓara ɗa̱ a una̱ u ntsumate,
gogo-na ɗa ya dem wa la̱pa̱na̱.
5 Kotsu i pityanangu n aza a karen a ɗe wa,
kotsu i wushuku n aje a ɗe wa.
Ko aka a ɗe a ɗa ya ciga,
i kirana n kadyanshi ka una̱ u ɗe.
6 Kpaci maku ma vali u tsu goro ta̱ tata u ne,
maku ma uka kpam u tsu 'ya̱nga̱sa̱ka̱ ta̱ mma u ne,
kajene n anuku a ne kpam u tsu yan ta̱ tsilala.
Atokulalu a vuma, a'a̱ ta̱ a kuwa ku te.
7 Shegai mpa, ma zuwa ta̱ a'eshi
a asu u Magono ma Zuba u ɓa̱nga̱ mu,
ma vana ta̱ Kashila̱ ka iwauwi ka va̱;
Kashila̱ ka va̱ wa pana̱ka mu ta̱.
8 Atokulalu a va̱, kotsu i yain maza̱nga̱ a kaci ka va̱ wa!
Ko n rukpa̱i baci, ma 'ya̱nga̱ ta̱.
Ko n dusuku baci a karimbi,
Magono ma Zuba ma woko ta̱ katyashi ka va̱.
9 N yan ta̱ unyushi u cingi a asu u Magono ma Zuba
adama a nala ma kawunku ta̱ adama upan u ne,
shegai a makorishi wa shamkpa mu ta̱,
kpaci u pana ta̱ usapula u va̱, u yanka mu afada ɗa a'a̱ri dere.
Wa tuko mu ta̱ a asu u katyashi,
n wene ukuna u maci u ne.
10 Pini nala ɗa atokulalu a va̱ a ka wene,
aku uwono u kimba̱ aza ɗa a tonuko mu,
<<Nte Magono ma Zuba Kashila̱ ka vunu?>>
A'eshi a va̱ a ka wene ta̱ urukpa̱ u le,
gogo-na a ka kpatsa le ta̱ yavu cin a ure.
11 Kain ka a ka lapula a mai asaga a ɗe ka tuwa̱ ta̱,
kain ka a ka doku upeti u karen u ɗe.
12 A kain ka nala ki, ama ushani a ka tuwa̱ ta̱ a asu u ɗe,
a wuta̱ a Asiriya n ilyuci i Masar,
hal gba̱m ili i'ya bidyai a Masar hal Aga̱ta̱ a Yufiriti,
n mala ubana a mala
n masasa ubana a masasa.
13 Likimba wa woko ta̱ akpongo
adama tsicingi tsa aza a ɗa dusuki pini a yansai.
Kavasu ka Mika ubana ara Magono ma Zuba
14 Magono ma Zuba, kirana n ama a vunu
tyoku ɗa kaliniki ka tsu yan n kalangu ka ne,
ushiga u nlala u agadu u vunu,
u ɗa wa̱ri ndishi utyoku u ne
a kutsu ka ka̱ri n asu u kalina u tsishinda̱.
A̱sa̱ka̱ a wuta̱ a lina a kaɓon ka Bashan n kaɓon ka Giliyadu
yavu a'ayin a cau.
15 Magono ma Zuba ma danai,
<<Ma yanka ɗa̱ ta̱ manyan ma ikunesavu
tyoku ɗa n yain an n wutukpa̱ ɗa̱ a asu u tsugbashi a Masar.>>
16 Kakuma̱ ka ama a ka wene ta̱ kpam a pana uwono
ko an u wokoi a'a̱ri n ucira.
A ka kimba̱ ta̱ una̱ u le a paɗa bini
a woko kpam yavu agulani.
17 A ka woko ta̱ yavu ili i'ya ya ka̱bura̱ a iyamba,
a ka lya ta̱ kabuta̱ yavu a'ali.
A ka wuta̱ ta̱ n a jeki ikyamba,
a asu u ukpawunsa u le.
A ka giruwa̱ ta̱ a kapala ka vunu
Magono ma Zuba Kashila̱ ka tsunu;
a ka pana vu ta̱ uwonvo.
Vuma wa̱ la tyoku u Kashila̱ wa
18 Kashila̱ ka roku ka̱ la tyoku u vunu wa,
uza ɗa u tsu cimbusa̱ unyushi u cingi n unyushi u ama a ne
a ɗa a buwai a aza a agadu a vunu.
Vu tsu ka̱na̱ upan u vunu hal ubana wa,
kpaci vu tsu pana ta̱ kayanyan ka uwenike
uciga u vunu u ɗa bawu wa savaɗa.
19 Va doku ta̱ va wenike tsu asuvayali a vunu.
Va lya ta̱ kaci ka unyushi u tsunu
vu vuta̱la̱ kpam unyushi u cingi u tsunu a mala ma ma̱ri lyungu-lyungu.
20 Va wenike ta̱ ukuna u mayun u vunu
n uciga u vunu u ɗa bawu wa savaɗa,
a asu u mmuku n tsikaya ma Ibirahi n Yakubu
tyoku ɗa vu yain kazuwamgbani n ikaya i tsunu a'ayin a cau.