Tagara̱da u
Rutu
Ukukpa̱ u kadyanshi
Tagara̱da u Rutu alabari a ɗa a kumaci ku Samaꞌila a aꞌayin a tagara̱da u Aza a Afada, aꞌayin a ɗa ama a Kashila̱ a kpatala̱ka yi kucina̱. Kumaci ku nala ki a tuwa̱ ta̱ a wokoi n kalen cika a asu u aza a Isaraꞌila, kpaci uza u te a asuvu a mmuku n tsikaya n Rutu aya Dawuda magono. Uza ɗa kpam u yain manyan a tagara̱da u na vi aya Naꞌomi, uza ɗa u rongoi a ilyuci i Batalami a Samaꞌila eyi n vali u ne n alobo a le a re. Shegai ili i kashina i matsa mai wa, aku a pura̱i ve ubana a uyamba u Muwabu. Vali u Naꞌomi u ba u kuwa̱i ɗe, aku alobo a ne a zuwusai aka a aza a Muwabu. Rutu wa̱ ta̱ a asuvu a aka a nala yi.
Alobo a Naꞌomi ama a re a le gba̱ dem a kuwa̱i a Muwabu vi, aku u yawunsai u gono a Batalami. Shegai Rutu wenikei Naꞌomi uciga an u ꞌyuwain ushamgba a Muwabu u zami vali u roku, u banai kaɓolo n eyi a Batalami vi. Ili iꞌya i buwai a tagara̱da vi i wenike ta̱ tyoku ɗa Rutu yain iyolo i roku i uza u ikebe, kumaci ku evu ku Naꞌomi uza kala Boza.
An u wokoi aza a Isaraꞌila aꞌa̱ ta̱ n agadu icun kau-kau, ili i roku a tagara̱da u Rutu vi i takpa ta̱ kau n agadu a tsunu. Tyoku ɗa mele ma Kashila̱ ma̱ri, a wushunku aza a Muwabu a woko aza a Isaraꞌila wa. Shegai tagara̱da u na u wenike ta̱ tyoku ɗa Rutu akaya a pige a Dawuda magono, uza u aza a Muwabu u wokoi ushaɗangi n ukuna u mayun a asu u Magono ma Zuba, u wokoi dem a asuvu a aza a Isaraꞌila. Agadu a roku a le kpam a ɗa, mele ma Kashila̱ ma dana ta̱ u ka̱na̱ ta̱ acimbi a a̱sa̱ka̱ ili i kashina i le i roku a ashina, tsa̱ra̱ aza a unambi a tuwa̱ a ꞌyara. (Aɗkp 19:9-10; 23:22; U.Ml 24:19-22.) Agadu a le a ɗa dem, vali kuwa̱ baci u a̱sa̱ka̱i uka, u ka̱na̱ ta̱ utaku ko vangu u vali vi u sotuku uka vi, tsa̱ra̱ u ka̱ngu kpam u ɓa̱nga̱ uka vi. (U.Ml 25:5-10.) Agadu a roku a le kpam a ɗa, u ka̱na̱ ta̱ kumaci ku vuma ɗa u kuwa̱i vi u kirana n aza ɗa a buwai a kumaci ki. Uza kuwa̱ baci a asuvu a kumaci kpam wa̱ri n uyamba, u ka̱na̱ ta̱ kumaci ku ne ku gono ku wusuka kumaci ku uza ɗa u kuwa̱i uyamba vi. U ka̱na̱ ta̱ dem u zuwa mara̱na̱ mi, u bidya kpam ucanga vi na̱ mmuku mi dem. Gba̱ ili i nala yi i ne iꞌya wa, shegai i kumaci ku uza ɗa u kuwa̱i vi ɗa. Agadu a roku a ɗa, nkoshi ma ilyuci alya a ka dusuku a utsutsu u ilyuci a sheshi, aku a kiɗa ugana a ukuna vi.
Ili iꞌya iꞌa̱ri pini a tagara̱da u na vi
Naꞌomi n Rutu a gonoi a Batalami (1:1-22)
Rutu yain kuꞌyaru a kashina ka Boza (2:1-23)
Rutu n Boza a dansai ukuna u iyolo (3:1-18)
Boza sotuki Rutu kpam a wokoi ikaya i Dawuda magono (4:1-22)
1
Elimele n aza a kuwa a ne a dusuki a Muwabu
1-2 Aꞌayin a ɗa aza a afada a ka lya tsugono tsu aza a Isaraꞌila, a yan ta̱ vuma roku uza u kala Elimele, kala ka uka u ne ka Naꞌomi, aꞌa̱ ta̱ kpam na̱ mmuku ma alobo n re, Malo n Kiliyo, gba̱ le a kagali ka aza a Efurata, a ilyuci i Batalami a uyamba u Yahuda. An a ka yan kambulu ka pige a uyamba vi, u ꞌya̱nga̱i ubana a uyamba u Muwabu, eyi n uka u ne na̱ mmuku n ne a ba a dusuki ve ɗe.
3 An a yain aꞌayin, vali u Naꞌomi vi u tuwa̱i u kuwa̱i, u a̱sa̱ka̱ yi na̱ alobo a re yi.
4 Alobo yi ama a re a le gba̱ a zuwai nkere ma uyamba u Muwabu. Uza u te zuwai uka uza u kala Orfa, uza u ire kpam u zuwai uza u kala Rutu. Shegai ubana ayen kupa ele pini a uyamba vi,
5 aku Malo n Kiliyo a kuwa̱i. Pini nala, Naꞌomi wokoi utyoku u ne, vali wa̱ la wa kpam dem mmuku ma̱ la wa.
Naꞌomi n Rutu a gonoi a Batalami
6 Aꞌari pini, Naꞌomi tuwa̱i u panai a da Magono ma Zuba ma ɓa̱nga̱ ɗe ama a ne aza a Isaraꞌila u na̱ka̱ le ilikulya. Adama a nala, u foɓusoi n ajene a ne a a̱sa̱ka̱ Muwabu a gono a kuwa.
7 Eyi n ajene a ne yi a a̱sa̱ka̱i asu u ɗa aꞌa̱ri ndishi vi, a ka̱na̱i ure ugono a Yahuda.
8 Ele pini a nwalu, aku Naꞌomi tonukoi ajene yi, <<Walai i gono aꞌuwa a isheku i ɗe. Magono ma Zuba ma wenike ɗa̱ uciga tyoku ɗa i wenikei aꞌali a ɗe na̱ mpa.
9 Magono ma Zuba kpam ma zuwa i tsa̱ra̱ aꞌali, i tsa̱ra̱ kpam uwunvuga a aꞌuwa a ɗe.>>
Aku u woɓo le, u tonuko le, <<U yan tsu ben.>>
A gita̱i kushen cika,
10 a tonuko yi, <<Aꞌa! Tsa bana ta̱ dem a asu u ama a vunu.>>
11 Shegai Naꞌomi danai, <<Mmuku n va̱, gonoi a aꞌuwa a ɗe. Ndya i zuwai ya ciga i bana kaɓolo na̱ mpa? Mpa n buwa kpam ilimaci hal ma fuɗa ma matsa̱ka ɗa̱ aꞌali a ɗa a ka sotuku ɗa̱ wa.
12 Mmuku n va̱, walai i gono, mpa n yan ɗe mamici, n buwa kpam uyan iyolo wa. Ko ma̱ baci gba̱m n maluwa ma iyolo i roku, a dana gba̱m ma tsa̱ra̱ vali n kayin ka na ki, hal n matsa mmuku ma aꞌali,
13 ya fuɗa ya vana hal a gbonguro? Ya ꞌyuwan uyan iyolo adama a le? Nala wa yan wa, mmuku n va̱, unamgbukatsuma̱ u va̱ u la ta̱ u ɗe cika, kpaci Magono ma Zuba ma ma ronuko mu upana u ikyamba u na vi.>>
14 Aku a doki a gita̱i kushen cika. Pini nala, Orfa woɓoi anuku a ne, u tonuko yi u yan tsu ben, aku u lazai ugono a kuwa. Shegai Rutu gbagbalai Naꞌomi vi u ma̱tsa̱i she u bana kaɓolo n eyi.
15 Aku Naꞌomi tonuko yi, <<Wundya na, utoku u vunu ɗa wa laza ɗe ugono a asu u ama a ne n a asu u ameli a ne. Wala vu tono yi.>>
16 Shegai Rutu danai, <<Kotsu vu folo mu n gono ko n a̱sa̱ka̱ vu utono wa. A asu u ɗa baci dem vu banai, ma bana ta̱. A asu u ɗa baci dem vu dusuki, nte dem ma dusuku pini. Ama a vunu a ka woko ta̱ ama a va̱, Kashila̱ ka vunu kpam ka woko ta̱ Kashila̱ ka va̱.
17 A asu u ɗa baci vu kuwa̱i, nte ma kuwa̱ pini, kpam nte dem a ka ciɗa̱ngu mu pini. Ili i roku i pece mu n avu, bamu n ukpa̱, n folo ta̱ Magono ma Zuba ma yan mu mavura cika.>>
18 An Naꞌomi wenei Rutu zuwa ta̱ uma u ne u toni yi, aku u a̱sa̱ka̱ yi utonusuko u gono.
19 Aku a lyai kapala na̱ nwalu, hal a rawai a ilyuci i Batalami. An a uwai, aku gba̱ ama yi a yain maza̱nga̱ cika adama a le. Aka a ilyuci yi a danai, <<Naꞌomi ɗa gba̱m naha vi?>>
20 U wushunku le, <<Kotsu i doku i isa̱ mu Naꞌomi wa, shegai Mara, kpaci Kashila̱ Uza u Ucira Gba̱ u na̱ka̱ mu ta̱ unamgbukatsuma̱ cika.
21 An n lazai, ma̱ ta̱ gba̱ n ili iꞌya ma ciga, shegai gogo-na Magono ma Zuba ma gonuko mu ɗe a kuwa akere a de. Niɗa ya isa̱ mu Naꞌomi cina Magono ma Zuba ma kpatala̱ka mu ɗe kucina̱, kpam Uza u Ucira Gba̱ u sukunku mu mada̱ka̱?>>
22 Tyoku ɗa a yain Naꞌomi gonoi a uyamba u ne ɗa la vi, kaɓolo n kajene ka ne Rutu uza u Muwabu. An a rawai a Batalami, cina a gita̱ ɗe manyan ma ilya i bale.