15
Usara u shindere u makorishi
1 Aku n wenei iryoci i pige i roku a zuba iꞌya i zuwai ya dem u yain majiyan. N wenei atsumate a zuba a shindere a ka ɓa̱na̱ usara u shindere u makorishi. Kashila̱ ka kotso baci uyan ama mavura n usara u shindere u na vi, wa a̱sa̱ka̱ ta̱ upana upan.
2 N wenei ili iꞌya i rotsoi kushiva̱ ka ka laɗa yavu madubu kasatari n akina. Kpam n wene ta̱ aza ɗa a lyai kaci ka kadin ki n kameli ka ne; wata, kadin ka lamba wa̱ri kushani ku kala ka ne. Ama yi a shamgbai a ikengi i kushiva̱, ya dem wa ɓa̱na̱ molo u ɗa Kashila̱ ka na̱ka̱ yi.
3 A shipai ushipa u ɗa Musa kagbashi ka Kashila̱ u shipai n ushipa u ɗa Maku ma Kondom ma shipai, a danai,
“Avu Magono ma Zuba Kashila̱ Uza u Ucira Gba̱,
vu yan ta̱ manyan ma pige ma pige,
ma ma zuwa majiyan.
Vu lyai tsugono tsu ama gba̱.
Ili iꞌya vu yain gba̱ mayun ɗa kpam i lobono ta̱.
4 Ama gba̱ a ka na̱ka̱ vu ta̱ tsupige, Magono ma Zuba!
Ama gba̱ a ka dana ta̱, ‘Vu gbonguro ta̱ cika kpam va̱ ta̱ n ucira.
Vuma wa̱ la uwulukpi wa, she avu.
Ama a likimba gba̱ a tuwa̱ ta̱ a lyaka vu kayala.
Ya dem wene ta̱ manyan ma maci ma vu yain.’ ”
5-6 N wenei kpam pini a zuba, atsumate a zuba a shindere aza ɗa a ka ɓa̱na̱ usara u shindere vi a wuta̱i asuvu Asu u Uwulukpi† a Kuwa ku Kashila̱. Ya dem u ukai kunya ku eri ka ka laɗa, n kunya ku uwambana ku kagbodo ka a cai n zinariya uwambani a makamba ma ne.
7 Aku uza te a asuvu a ili i uma i nishi yi u na̱ka̱sa̱i atsumate a shindere yi abelu a zinariya a ɗa aꞌa̱ri ushaɗangi n mavura ma Kashila̱, uza ɗa wa̱ri n uma hal ubana bawu utyoku.
8 Aku Kuwa ku Kashila̱ ki ku shaɗangi n ka̱nga̱ ka ka wuta̱i asu u tsupige tsu Kashila̱ n ucira u ne. Uza wa̱ la wa fuɗa wa uwa pini wa, she usara u shindere u ɗa atsumate a shindere yi a tukoi u kotso.