3
मन्दलीलाव लोम्बार
1 आव साचो पाँ लिज़्या, जो मिँ मन्दलीलाव लोम्बा जैसिउ पैंज़्याव, होए चाव य़ेन ज़ खिम्ज़्याव।
2 खाली नो मिँ प़ाइँत ज़ ओखत माल्यो ताव परिके। नोए ओज्या ब तोबो वाज़ ओताक, स़ोनो प़ाइँल थ॰रिउ, ओतहस ओमानस ल्यो, पाहुनार समारिन्या, परमेस्वरए ओपाँ पैन्यात ओगहक ल्यो ओताक।
3 फरी नो मिँ मद छोकोरा ओन्यात माङ़मो, पैसाए लोभदा ब माबाव, इ़सिन्या रसिन्या ओयाःनी मापले·द ओमानस ल्यो ओताक।
4 उझ़िम चावस चलैधुन्या, ओज़ारालाई ब चावस ज़ दईद मुइलिउर जैधुन्या ओताक।
5 जोए उझ़िमलावरालाई चावस माराचलैधुव होए परमेस्वरए ओमन्दलीलाई झन कै जैद ओचलैधुरिज़्याव?
6 स़ोनो नो लोम्बा जैसिज़्याव मिँ भर्ज़ा परमेस्वरए ओपाँत हुव ताताक, म़ानी कैताराक स॰द सैतान उपरिउल ओल मनी परिन्या ओछ्यास लिज़्या।
7 फरी परमेस्वरए ओपाँत माहुव मिँराए याङ़ाक ब चाव उमिन ल्यो ओताक, म़ानी नोराए नोए ओपाँःच्यार हाइद याएक सैतानए ओजालल परिन्या ले।
मन्दलीलाव य़ेनत सघैज़्याव स़ेरर
8 हिताव ज़ मन्दलीलाव य़ेनत सघैज़्याव स़ेरर ब यामानस ल्योर, यापाँ ऩेपाँ माल्योर, मद छोकोरा ओन्यात माङ़मोर, पैसाए लोभदा माबाज़्यावर ओतारक।
9 बुरू यादैव युँ हुबो फैसिउ पाँलाई चावस तीद नत ज़ छैंव युँस धिद उलिरक।
10 नोरालाई ङ़ादा जाँचिद याखत माल्योर याथ॰रिकिन वाज़ मन्दलीलाव सेवात सघैन्या य़ेन ओदोरक।
11 सेवात सघैन्या मेंमार ब यासुबास ल्योर, अर्काए उछींनी मापाँन्यार, यातहस ल्योर, प़ाइँत सतस ल्योर ओतारक।
12 सेवात सघैन्या खेपार फरी याज्या तोबो वाज़ ओताक। याज़ार स़ोनो याझ़िमलावरालाई ब चावस ओराचलैरक।
13 निताव सेवात सघैन्या य़ेन दाज़्यावराए यामिन स्यासो चाव य़ेन यादोकिन नोराए यामान ब रहिन्या ले, येसु ख्रीसए ओपाँत ब यायुँर झन ज़ हुप्न्या ले।
परमेस्वरए कप्सिउ ओपाँ
14-15 ङा नल्योदा चाँदो ज़ हुन्या युँ ङादोज़्या। खाली ‘कैताराक धिलो ताए सैं’ लिद आव चिथी ङ़ादा ज़ सर्द ङापरींज़्या। आव चिथीनी ज़, ‘गे परमेस्वरए उझ़िमलावराए इतावनी दोव ताके’ लिन्या प़ाइँए ज़ सैंन्या जेले। परमेस्वरए उझ़िमलावर जींदो परमेस्वरए ओमन्दली ज़, साचो ओपाँलाई थ·रैद्याज़्याव गज तर्ताव खाँबा ज़।
16 साचो ज़ आव गेमानिज़्याव परमेस्वरए कप्सिउ ओपाँ ते बनै अचम्बलाव लिज़्या,
परमेस्वर मिँए क्याँ जैसिद सरैंःसिके।
छैंव पुरूसनी साचो ज़ थ॰रिके।
ओचाकर्याराए याङ़ाक ब सरैंःसिके।
उमिन प़ाइँ जातलावराए याखार्ल थास्के।
संसारलाव काना कुनीङ ब यायुँ हुप्के।
छींनी स्वर्गताव ओज़गैदा ज़ छींसिके।