15
Jesure sâcko erâ nâŋâcnere mamanac sawa mi junšepeneŋ
1 Sanaŋheczi gegec dodocne âsi qataŋ ejarenšepeneŋ, nâŋec nâŋâcnere mamanac mi junšepeneŋ.
2 Nâŋâc âgofâc-nâŋec jaŋere mamanac juhuc biaŋkeniŋte â mitio sanaŋkeniŋte bafic-jopanšepeneŋ.
3 Kristo e iŋuc jaha e jahacnere mamanac mi juwec. Dâŋqâreŋ moc šiŋuc hâcne fokac: “Go musoriŋgumbiŋ jaŋere mumusoriŋzi nore faio fekac.”
4 Mârâc jaha dâŋ mu qâreŋ embiŋ, i nâŋâc mitire fuŋne mana-hâmonaŋte embiŋ, dâŋqâreŋ izi hâcne basanaŋ-nâpohuc baafec-nâpome wiac biŋe qanarekicne irec mamanac junaŋte qâreŋkekicne.
5 Anutu e babasanaŋ â bâbaafec runezi eŋareme Jesu Kristore sâko maŋ mamanasu mocjaha erâ junšepieŋ.
6 Ehuc maŋŋeŋic â micŋeŋic tureme Wofuŋ Jesu Kristo ere Anutu â Mamac muteŋkenšepieŋ.
Maŋzi roroc erâ juzo
7 Irec hâcne Anuture eri qâreŋ fuaocte Kristozi rocŋopawec iŋuc jaha ŋoŋe maŋzi roroc efârenšepieŋ.
8 No kecšiŋucte ŋazakopac: Anutu e mimiŋnefâc-nâŋec biŋedâŋ mujâmbâŋkehuc jazawec i fârinehec eocte Kristozi mahec nâŋere kiŋaŋ qaqa ewec.
9 Erâ wâc ŋic qâpuc jaŋe Anutu buuruc-ticnere erâ muteŋkeniŋte iŋuc ewec. Dâŋqâreŋ šiŋuc hâcne fokac: “No qâpuc jaŋerao muteŋguhuc šâŋege mumbiaŋkepemu.”
10 Erâ dâŋ moc kecšiŋuc fokac: “Ŋic qâpuc ŋoŋe Anuture fuŋfuŋfâc jaŋehec mu šeri enšepieŋ.”
11 Erâ moc šiŋuc:
“Qâpuc ŋoŋe šeŋgoma Wofuŋ mucne bacnenšepieŋ,
â ŋicne ŋicne jaŋe e muac baafec ecnenšepieŋ.”
12 Erâ Jesajazi dâŋ moc šiŋuc mu qâreŋ ewec:
“Jâctuc Isai gitecne fuarâ
eki qâpuc Wofuŋ ejareocmu;
eme qâpuczi ere mamanac juniŋmu.”
13 Ʒeŋaŋ rune Anutu e mamanasiŋ-ŋeŋicte bubiaŋ â wama bâfua-ŋareme Tiri Mârore tâpirio ŋesiŋnepie sambâŋ šeŋaŋ-ŋeŋicte manariŋ qâriŋ ŋoŋerao fua ŋeiŋ ezejec.
Paulo gie-ticnere dâŋ
14 Âgofâc-nane, ŋoŋe uruc jauŋ-ŋeŋic fokac â mitire fuŋne i wâc sâcne mana-hâmoŋgopieŋ, irec ŋaŋaczia faŋ qaqac ezo murâ mi bititieniŋmu, i no fuŋne-ŋeŋic iŋuc hâcne mana sanaŋkekopac.
15 Erâ sifu no Anutuzi miti gie tahacnuwecte dâŋ gâcne i mai qanšaŋ Jaha qâreŋke-ŋarehuc mitire manasu-ŋarekopac.
16 Jesu Kristo e qâpuc ŋoŋere miti kiŋaŋŋic râecnuwecte no Anutu Biŋebiaŋ-ticnere taha bapa gie bape Tiri Mârozi maŋfuru bacŋopame Wofuŋte taha biaŋ enšepieŋ.
17 No Anuture gie baekopac i Jesu Kristore erâ manape fefene eekac.
18 Gie i nahackoaŋ wemo-nanezi bazapo, aricne, Jesu Kristozi neŋgoc ŋenareha qâpuc jaŋe miti mana rereŋ eniŋte miczi â mezi gie bapo.
19 No tâpiri â mâsihec juhuc Tiri Mâroraonec hâbi rorâ Jerusalem haeonec fuŋkerâ Kristore Biŋebiaŋ mâreŋ râreckehuc muiŋne rakupe Iliriko ŋ mâreŋko mickewec.
20 Ehuc gâcne jaŋere hâsinao bazipore Kristore šâŋe biŋe mi ra fisiwecko furunao šocne qapemurâ herâ wâwânšâŋneekopac.
21 Dâŋqâreŋ šiŋuc hâcne fokac irec sâcko eekopac:
“Dâŋ binaŋ-ticne mi ejarekicne jaŋe e honeniŋmu,
â biŋe-ticne mi manambiŋ jaŋe mamanahec eniŋmu.”
Paulo e Roma hae fotâcnerâ Sipeî mâreŋko razo muwec
22 No fuŋne iŋucte hâcne ŋoŋerao fâpemurâ dameŋ sâc quŋkeekopac.
23 Juwarepo i ŋoŋerao fâpemurâ maŋzi sawa manahuc jupo, ši ine mâreŋ gâcnao gie-nane tarakacte
24 Sipeî mâreŋko razo ehuc ŋoŋerao fisipemurâ manasukopac. Fisipe ŋoŋehec sahac hâroŋ qaqac erâ ŋoŋeraonec moc moczi qâtecnupie mâmâc Sipeî mâreŋko ranšepeneŋ.
25 Dameŋ šiŋuczia ine mitiŋic kiŋaŋ qajarehuc Jerusalem haeo razo ekopac.
26 Makedonia â Akaia kikefuŋ jaŋe Jerusalem haeonec mitiŋic hapetac dopec-jopaniŋte afeckerâ mupaŋkembiŋ.
27 Jaŋe buafec-jeŋicte iŋuc epie sâckewec. Qâpuckonec miti mamana jaŋe Jerusalem haeonec mitiŋic jaŋeraonec miti boreŋ rombiŋte tofa jaŋerao fokac. Eme tofa i hâcne bazu-jareniŋte sahackopec wiac jarepie sâckeocmu.
28 Eme mumupaŋ-jeŋicte fârine fuawec i no nahac bararâ jarepe tarame ŋoŋerao fotâcnehuc Sipeî mâreŋko rapemu.
29 Erâ no manakopac, ŋoŋerao metariŋ mi fâpemu, Kristoraonec jambuŋ kadahe bafâpemu.
Ere erâ numuniŋte qâreŋke-Jarewec
30 Âgofâc-nane, no Wofuŋ-nâŋec Jesu Kristo ere erâ â Mârore Jauŋte erâ hazec qâuŋ ŋazakopac, ŋoŋe nore erâ Anutu numucnehuc juju gie-nanere baficnunšepieŋ.
31 Baficnupie Anutuzi Judaia mâreŋko ŋic jaŋere meonec bataracnuzejec, â Jerusalem haeonec mitiŋic bubiaŋ wiac jarepe aŋac-jopazejec.
32 Izi šâhec Anutuzi manahame bubiaŋko fârâ ŋoŋerao jumanahuc âke mâteŋnuzejec.
33 Anutu wama rune eki ine ŋoŋehec jufârezejec. Jâmbomac.