27
Polona Lomu kumate visia tipi kalefi avaleꞋya atenae.
1 Polofe “Lomu kumate tipi kalefi ugane.” huꞋya huteꞋya avaleꞋya nagoꞋa nofipi mainaya vayaꞋene amavaleꞋya ati vayate kava kanomo ayapi amatenae. Ani ati kanomo agia YuliusiꞋe. Ani kanoa SisaꞋa, Sauve kanomo, ati kanoꞋa maineane.
2 Nagaya LukuꞋnae AlisatakusiꞋene PoloꞋene umainone. AlisatakusiꞋa Masetoniati kanoe. Osi kumaꞋamo agia Tesalonaika kanogino tagaiꞋene vigeta nago Atalamitiumu kumate tipi kalefi haisaga humaunageno tipi kalemoꞋa Esia koꞋmo haopalega haigahe higeta hai-mainone.
3 Nehaunageno kotigeta ega Saitoni kumate hai vaꞋyi hunageno YuliusiꞋa Polona ali kayone huneꞋateno “Kanalelagika vayakamogamitega visanageꞋya ali kanale hulamatesae.” huno tatalegeta umainone.
4 Umaigeta Saitoni kumala neꞋataleta yasimoꞋa tusiya huno alino halage higeta yasimoꞋa osiꞋma hisiafe nago hagelimo amuꞋnopi hanea kumaꞋmo aupate eumainone. Ani kumaꞋmo agia Saipalusie.
5 Hagelipi Silisiaene Pamafilia kumaꞋene mogaseta Maila euvaꞋyima hunana ani kumaꞋmona ala agiꞋa Lisia eumainone.
6 Maila mainonageno kava humainea ati kanomoꞋa nago Alekasatalia tipi kalea ageteno ani tipi kalemoꞋa Lomu ugahe higeno tavalegeta ani tipi kalefi haisaga humaita eumainone.
7 Tipi kalefima unana aiyayeno oꞋunegi kasagoꞋya kanagefa hako hako huno vigeno osi yasi kanoꞋa aligeta Nitusi umainone. YasimoꞋa osi higeno nagola timo amuꞋnopi hanea kotega Kaliti koꞋmo aupate unana Salamone kumala aupaꞋale hane.
8 Kaliti limo agegayalega hako hako huta unana nago kumaꞋmo agia Kanale Ti kahaepatele huꞋya nehaya ti agegayalega euvaꞋyi humainone. Ani agegayalega ala kumaꞋmo aupate Lasie huno hane.
9 Hako huta una yafe ayaꞋaya kanagefa katega neꞋunageno Yuta vayaꞋmoꞋya kave monesiya kanamoꞋa ago falote hianagi timoꞋa ayamufa aigeno PoloꞋa ani vayafe mage huno hamapaiye,
10 “Nagaya nagesa havuana tipi kalefina kasageke huta neꞋvisunageno afenoꞋyatiene tipi kalene tagaitiene tusiya huno alihaviya tahaugahie.” huno hamapaiye.
11 Hamapaiyanagi ati vayate kava kanomoꞋa ani kea havino agupina omaleanagi tipi kalemo kaꞋyomaꞋaleꞋma neꞋalia kanomo kene tipi kalemo nefa kene havino akave malenegi PoloꞋma hia kea havino akave omalene.
12 Akave omalegeꞋya ani kumala tusiꞋa yasima alia kanafinagiꞋya kanale huꞋya maisaya kumala omalegeꞋya tipi kalema neꞋaliya vayaꞋmoꞋya ke huge havige huteꞋya “Ani kumala neꞋataleta Finikisia, Kaliti kumaꞋmo haupalega nagola tipi kalema malesuna kumafe avame huta visune. Ani kumatela yasima alisia kanalela mo maigahune.” huꞋya humainae.
TusiꞋa yasimo hage lina ali haviya humaine.
13 Amuko yasimoꞋa ako huno aligeꞋya “Kanalelagita ugahunagi afaꞋa vigetao.” nehuꞋya tipi kalema atafa hulino nemaiya yana alisaga huteꞋya ani lipi kalea Kaliti limo agegayalega eumainae.
14-15 EneꞋvageno Kaliti kumateti tusiꞋa yasimoꞋa alino egeta “Eteta ani kumate ugahune.” huta hunanagi ani yasimoꞋa tipi kalea melino haviya huno aiyahae huno atalegeno ani yasimoꞋa ayetufegeta emainone.
16-17 Onana nagola hage limo amuꞋnopi hanea kumala osi kumaꞋmo avate eumainone. Ani kumaꞋmo agia Kautae. NeꞋonageno yasimoꞋa osiꞋa alino laga higeta tusi aliꞋya aliyaꞋamoꞋya hevayu huꞋya osi tipi kalea alisaga huꞋya ala tipi kalefi maleneꞋya ani ala tipi kalemoꞋma kofa-nafa ohiseafene huꞋya nomo aiyafi nofila kitafa humalenae. “YasimoꞋa ayetufesigeta Afelika koꞋmo ti kahaepatega mo haviya hugahune.” huteꞋya anale asai-malenaya kena yasimoꞋma ayetu-nefea kena kalu heꞋya afepi maletageno yasimoꞋa ayetu-fegeta emainone.
18 NeꞋeta mo faonageno koꞋma neliana timoꞋa ayamufaꞋage higeꞋya ani lipi kalefima hanea afenoꞋyaꞋyaga aliꞋya kalemoꞋa yoꞋyo huno visiafene huꞋya hage lipi hagaꞋyu hagaꞋyu hu-talenae.
19 Tagufa (3) kanale tipi kalemo aliꞋya yamaꞋa amakaiꞋami amayapiti aliꞋya tipi hagaꞋyu hagaꞋyu hutalenae.
20 KasagoꞋya kanagefa yagene kaꞋnefiꞋenena oꞋagogeno limoꞋa tusiya huno ayamufa aigeta taugafa aligatisia yafema tametiti nehuna yana ago ataleta “Ani lipi fanane hugahune.” huta maita humainone.
21 NehuꞋya vayaꞋyaga ayaꞋaya kanagefa kavela oneꞋya maigeno PoloꞋa amuꞋnoꞋamifi hetino mage huno hie “NafuꞋnaganagatama tamakaya havi kava hutama hagoteꞋnama tamahapauva kea ‘Kaliti kumala oꞋatalesune.’ huꞋna hua kea ohavinae. Tamakayama havileꞋasina ma ma ali haviyama hulatea yana falote ohigeno afenoꞋyatienena oꞋvaꞋyagileꞋasine.
22 Nagi menia tamahanepauve kolia ohutama tokiya vaitama maiho. Tagaipitila nago kanoa ofaligahigi tipi kaleꞋage haviyana hugahie.
23 Nagaya Anumaya Koti nafaꞋne mainoanagiꞋna mukiꞋa kanafina agia alisaga hume hume neꞋogeno meni kegela agaiꞋa ensole kanomoꞋa navate me heti-maine.
24 Heti-maineno mage huno nahapaiye ‘Pologae kolia ohuo. Kagaya Sisa aulela mo hetigananagino Anumaya KotiꞋa mukiꞋa mani lipi kalefi kagaiꞋenema neꞋvaya vayaꞋmogamina amaugafa aligatigahie.’ huno nahapaiye.
25 Nahapaiyafe tamakaya mukiꞋamogatama kolia ohiho. Anumaya KotiꞋa nahapaiya avamete huno ani kate hugahie huꞋna nagupi maleꞋna nametiti nehue.
26 Nehuanagi yasimoꞋa ali haviya hisigeta nagola ti amuꞋnopi hanea kumate vailagailita ugahune.” huno humaine.
27 Ani tipi kalefina tole sota onageno timoꞋa ayamufaꞋage higeta Metiteleniani hage li amuꞋnopi onageno kege amuꞋno higeꞋya tipi kalefi aliꞋya vayaꞋmoꞋya “Kumate uvaꞋyi hugahe aupa nehune.” huꞋya humainae.
28 HuteꞋya augelifipi amegafi huꞋya nofiꞋmo atupale tumo tumo yana kanaꞋage ya ayeteꞋya atalageno tipinaga lavitegeꞋya alisaga huꞋya agayana augelimoꞋa ayaꞋayaꞋamoꞋa fotiꞋa (40) mita humaine. NagoꞋene osiꞋa utonageꞋya aniꞋa huꞋya tipinaga ani nofila ataleteꞋya agayana ti augelimoꞋa tetiꞋa (30) mita humaine.
29 HigeꞋya “Havigu yafa agupifi visunageno yafamoꞋa tahaiyafene.” huꞋya koli huteꞋya foꞋa (4) tipi kalema atafa hulino maisia yana tipi kalemo aiꞋa kapiti tipi atalageno lavi-mainegeno yagemoꞋa aupaꞋa evaꞋyi hisiafene huꞋya nunamuna humainae.
30 NehuꞋya tipi kalefi aliꞋya vayaꞋmoꞋya koli huꞋya “Faleta ugahune.” nehuꞋya osi tipi kalea ali-talageno lipi lavigeꞋya mage huꞋya vayala ayemavataga hae “Tagaya kalema atafa hulino maisia yana agosisinapalega atalenone.” huꞋya ayemavataga humainae.
31 Hageno PoloꞋa ati vayafeꞋene amakaiꞋami kava kanomofeꞋene mage huno hamapaiye “Mani vayaꞋyagama ala tipi kalefima omaisayana tamakaila tamaugosamoꞋa fanane hugahie.” huno humaine.
32 Nage higeꞋya ati vayaꞋmoꞋya osi tipi kalema atafa hulinea nofila taga hutalageno osi tipi kalea tipina umaine.
33 YagemoꞋa evaꞋyi hugahe aupa higeno PoloꞋa mukiꞋa vayaꞋmogamife mage huno hie “Tole sotana koli hutama kavela mositama onenagi menia kavela neho.
34 LokiyaꞋage ke nagaya tamahanepauve ‘Kavela neho.’ huꞋna nehue. Kavela netetama tokiya aligahae. Tamage lamahanepauve mukiꞋamogatama kanale hutama uvaꞋyi hugahae. Nagoke kanoa fanane ohugahae.” huno humaine.
35 Mani kea nehuno maya alino amaulagale Anumayamotega muse nunamu huno havigeteno kolino nemaine.
36 NegeꞋya ageteꞋya amaipamoꞋa kanale higeꞋya amakaiꞋenena aniꞋa huꞋya kavela ne-mainae.
37 Tagaya lipi kalefima mainona vayala tu hataleti seveti sikisiꞋa (276) vaya mainone.
38 Kavela nemamu huteꞋya tipi kalemoꞋa kanaꞋagela ohisie huꞋya viti avinayaga tipi aliꞋya atalenae.
Tipi kalea ago alino haviya humaine.
39 Yagema vaꞋyi higeꞋya agayana noꞋagaya kotega uvaꞋyi huteꞋya agayana nagola timoꞋa moyetagena humainea yatela kanale ti kahaepa hanegeꞋya ageteꞋya “Lipi kalemoꞋa anile aupaꞋa visie.” huꞋya humainae.
40 HuteꞋya tipi kalema atafa hulino nemaiya nofila hekaꞋno hutaleteꞋya aliꞋya moli kagi meli kagi nehaya kaꞋyote kimalaya nofila aliꞋya kaleꞋyo humaleteꞋya yasi alisia kena anale maleꞋya atafa humalageno tipi kalemoꞋa aiyayeno ti agegayalega ugahe nehie.
41 Vianagi tipina kahaepamoꞋa agoꞋyagefa hai-mainea kahaepate haino anifi mo vailino agoꞋyamona atafa huno tokiyaꞋage huligeno kanagela ohuno hanegeno timoꞋa tokiyaꞋage huno aiꞋa katega aino kofanafa humaine.
42-43 Kofanafa higeꞋya ati vayaꞋmoꞋya nofiꞋma humatenaya vayafena “HamaesunageꞋya falisae. Havigu nago kanomoꞋa tipiti faleno visigi.” huꞋya hayanagi ati vayate kava kanomoꞋa PoloꞋa ofalisia agesa nehavino “NaꞋa ohiho.” huno huneꞋama-teno mukiꞋa tipi nagosa neꞋaiya vayafe “Nagosa aitama ti agegayalega viho.” huno humaine.
44 Higeta mukiꞋamogata tipi kalemoꞋma haviya hia yosamo ayamufa alita agupile maiteta ayetufeta ti agegayalega umainone.