7
1 Ani kema hulokiya vaino hulateneafe nahau nayamopafi nenahaiya nenafu-gatama taugafaene tagu tameꞋene ali haviya hisia kavala neꞋataleteta Anumaya Kotifema koli hisuna tagesa havita fatago kavakeꞋya huge huge nehuta alu aotage veaꞋne maisune.
Kolini veaꞋmoꞋya amakuꞋa aiyahae haya yafe PoloꞋa muse humaine.
2 Tagaifena tamaipa haviya ohutama tamakuꞋa lamiho. NagoꞋa veala ali haviya hu noꞋamatone. NagoꞋa veala havi katela amavaleta noꞋamatone. NagoꞋa veala ayemavataga huta moneꞋamia noꞋalune.
3 NoꞋalunagi kelamama-kisuafene huꞋna mani kea nohugi “Nahau nayamopafi nenahaiye.” huꞋna ago tamahapai-mainoe. AfaꞋa maisunano falisunano tamakaiꞋene ailokaeta maigahune.
4 Tamakaya fatago hutama maigahae huꞋna nametitia nehuꞋna tamakia alisaga nehue. MukiꞋa kana yana nagaipima falote higeꞋna ani yapima mauvanagi tamakaifena naipa haviꞋna tusiꞋa muse nehue.
5 Masetonia kotega uvaꞋyi hunanagi alu kumate kumatela kana yamoꞋa falote higeꞋya nagoꞋa veaꞋmoꞋya tagaiꞋene ke vaiꞋya tu hulatageno taguꞋamoꞋa koli hia kava higeta maifalua ohunone.
6 Ohunonagi Anumaya KotiꞋa kana yama aliya veala amakuꞋa alino kanale huneꞋamatea kano maineanagino Taitasina hutegeno eaꞋamo taguꞋa melino falu hulatene.
7 TaitasiꞋma ea yafekela musena nohunagi Taitasina hutageno mage huno me lahapaiye “Amakaya Kolini kumate mainaya veaꞋmoꞋya kanale yama hunataya yafena naguꞋa alino kanale humaine.” huno huteno “Kagesaya yafena hamaigeꞋya kagayama hamapai-mainana kefo yaꞋamihena amakuꞋa aiyahae hayanagi neꞋataleꞋya ‘NagoꞋa vayaꞋmoꞋya kagai kagia ali haviya hugahe hayanagita tagaya kaya hugahune.’ huꞋya hae.” huno hia yafena naipamoꞋa kanale higeꞋna tusiꞋa muse nehue.
8 Nehugi avoma kaeꞋna lamamuana tamaipamoꞋa haviya hie huꞋna nagesa havuanagi “Haviya huꞋna avona kaeꞋna amaminoe.” huꞋna hu-mainoanagi menia osi kanafina tamaipamoꞋa kana higetama etetama tamakuꞋa aiyahae haya yafena muse nehuꞋna “KanaleꞋya huꞋna avona kaeꞋna amaminoe.” huꞋna nagesa havimainoe.
9 HaviteꞋna menia muse nehue. Tamaipa kanama haya yafena musena nohugi tamaipa kana hutetama etetama tamaipama aiyahae haya yafena muse nehue. Anumaya KotiꞋa aniꞋa huno tamaipa kana hutetama etetama lamaipama aiyahae hutama agaitegama aya yafena muse nehigi tamaminoa avomoꞋa tamakaila alino haviyana ohunegi kanaleꞋya hulamatene huꞋna nehue.
10 TaguꞋa aiyahae hisunafe Anumaya KotiꞋa kana yana taguꞋafina nelamie. Tamisigeta aliteta taguꞋa aiyahae hisunageno tagu tamena aligatisiafene huno nelamie. Ani yafe Anumaya KotiꞋma tamia kana yafena “Otahaiye.” huta nohunagi ma mopafi yafema amakesa havi havi nehaya veaꞋmoꞋya kana yama falote hinageꞋya amakuꞋama aiyahae ohisagenoꞋa Anumaya KotiꞋa amaya ohinageꞋya faliteꞋya hani yapi ugahae.
11 Tamakaipima mainea kanomoꞋa kefo yama higeꞋna osi avona kaeꞋna tamamugetama agetageno tamaipamoꞋa kana higeno Anumaya KotiꞋma tamaminea kana yana tusiꞋa kanaleꞋya hulamatenegi haviho. Ani kefo yafena “Tagaye nehinagetama aupaꞋa alitalegahune.” hutama tamakuꞋa aiyahae humainagi koli hutama ani kefo yama humainea kanomofena tamaipamoꞋa kana higetama anonaꞋa aminayafe nagaiꞋma nagesaya yafena nelamahaiye. Anima mukiꞋa yama humainaya yafena tamakaya ani kefo yama ohunaya yana ago naveli-mainae.
12 Mani avoma kaovana ani kefo yama nehia kanomofeꞋene kefo yama hutaya veaꞋnenefe huꞋna okaenogi tamakaife huꞋna kae-malogetama tamakaya hapalitama Anumaya Koti aufina ani avopiti kea akave maletama “Polofe lahaigeta agai veaꞋne mainone.” hutama hisayafene huꞋna mani avona kaeꞋna tamaminoe.
13 Tamaminogi nagai kema haviya yafena naipamoꞋa kanaleꞋya nehie.
NaꞋafenomagi aniꞋa hutama Taitasi aipama alitama kanale haya yafena nagoꞋene naipamoꞋa kanaleꞋya nehie.
14 Tamakaifena muse huꞋna tamakima alisaga huꞋna Taitasina hapaugetama kanale kavaꞋma hutaya yafena nagayea nohie. Tamakaila kelamagema tamahapai-mainoa avamete huꞋna Taitasina tamakaifema hapauva kea havigea huꞋna haꞋopainogi tamakaya hapauva avamete hutama kanaleꞋya humainae.
15 Tamakaya koli hutama atali hutetama agai kema haviya yafena TaitasiꞋa agesa havi havi huno tamakaifena aipamoꞋa aluya huno musena humaine.
16 Ani yafe tamakaya kefo yana ohiho. Fatago hutama maigahae huꞋna nametitia nehuꞋna tusiꞋa muse nehue.