12
Din Pangisalakanan Diyos Sin Siyodad Ay Jerusalem
(12:1-14; 13:1)
1 Si Diyos di namarsua ed daya ya isnan daga ya nangidawat si biyag di ipogaw. Siya nay inbaga na maipanggep ed Israel:
2 “Panbalinek to ed Jerusalem si kaman bason di arak ay pan-inoman din nanasyon sin nanniliked et kaman dan nabeteng ay mandinapig. Likoben dan to abe din odom ay ili ed Juda sin panlikoban da ed Jerusalem.
3 Pantitinolongan di amin ay nasyon isnan daga ay gobaten di Jerusalem. Ngem sin domtengana di ay timpo, panbalinek ed Jerusalem si kaman madagsen ay bato et madadael di amin ay nasyon ay mamadas ay mamidking en sisya.
4 Sin doy ay timpo, kibtotek din kabayo da ya bogeek din nangabayo en daida. Godabek din kabayon di nanasyon, ngem bantayak pay din ipogaw ed Juda.
5 Et kanan din papangolo ed Juda, ‘Si Yahweh ay Kangatoan ay Turay ay Diyos tako di mangidawat si pigsan din ipogaw na ay man-ili ed Jerusalem.’
6 “Sin doy ay timpo, panbalinek din papangolo ed Juda ay kaman apoy sin kada ono sin garami ta abaken ya dadaelen da amin ay ili ay wada sin nanliniked. Ngem ed Jerusalem pay et laton ay adi maabak din omili mo adi et komakaman das di.
7 Ngem pangon-onaek ay pangabaken din sosoldadon Juda ta din polin David ya omili ed Jerusalem yan adi da it-ek din awak da.”
8 Sin doy ay timpo, salakniban Diyos din omili ed Jerusalem et olay din kakapsotan en daida yan pomigsa ay kaman si David. Din polin David et kaman si Diyos ono kaman din Anghel Diyos ay mangipangolon daida.
9 Tan inkeddeng ko ay dadaelek amin ay nasyon ay mangobat ed Jerusalem.
10 “Awni et panbalinek din polin David ya ipogaw ed Jerusalem ay managseg-ang ya managkararag. Ilaen dan to din dinoyok da et manladingit da ay kaman din nateyan di bogbogtong ono besag ay anak.
11 Sin agew ay sana, palalo di ladingit ed Jerusalem ay kaman din ladingit da paran Hadad-rimmon sin tanap ed Megiddo.
12-14 Tonggal pamilya sin intiro ay ili yan manladingit da ay ang-anggoy da. Manladingit din polin David, Levi, Natan, Simei ya din odom ay poli. Maikasin ay manladingit din lallalaki sin babbabai.”