3
Oasr Pacl Nu Ke Ma Nukewa
Ma nukewa ma sikyak fin faclu sikyak fal nu ke pacl la.
Oasr pacl in isusla, ac pacl in misa,
Oasr pacl in yukwiya, ac pacl in fusak.
Oasr pacl in uniya, ac pacl in akkeye,
Oasr pacl in kunausla, ac pacl in musaeak.
Oasr pacl in tung, ac pacl in israsr,
Oasr pacl in mwemelil, ac pacl in onsrosro.
Oasr pacl in sisalik eot uh, ac pacl in eisani eot uh,*
Oasr pacl in kafis, ac pacl in tia kafis.
Oasr pacl in suk, ac pacl in tila suk,
Oasr pacl in liyaung, ac pacl in sisla.
Oasr pacl in seya, ac pacl in twani,
Oasr pacl in kaskas, ac pacl in tia kaskas.
Oasr pacl nu ke lungse, ac pacl nu ke srunga,
Oasr pacl nu ke mweun, ac pacl nu ke misla.
Mea sie mwet el eis ke orekma nukewa lal? 10 Nga etu ke mwe utuk toasr ma God El filiya facsr. 11 El oaki pacl fal nu ke ma nukewa. El oaki nu sesr tuh kut in kena etu ke pacl fahsru, tusruktu El tia ase nu sesr in etu nufon ma El oru. 12 Ke ma inge nga akilen lah ma kut ku in oru pa in engan ac oru wo ke kuiyasr nufon ke lusen moul lasr uh. 13 Kut nukewa enenu in mongo ac nim ac engankin ma kut orekma nu kac. Ma inge mwe kite lun God.
14 Nga etu lah ma nukewa God El oru uh ac oan ma pahtpat. Kut koflana laesla kutena ma nu kac ku eisla kutena ma liki. Ac God El oru ouinge tuh mwet uh in sunakunul ac akfulatyal. 15 Kutena ma su sikyak tari, sikyak pac in pacl inge. Kutena ma su ac fah sikyak in pacl fahsru, nuna sikyak tari meet. God El oru tuh ma inge in sikyak na sikyak.
Ma Sesuwos Faclu
16 Sayen ma inge, nga liye pac mu fin facl se inge, yen ma nununku suwohs ac pwaye eneneyuk in oasr we, ma koluk ac sesuwos pa oasr we. 17 Nga fahk nu sik sifacna, “God El fah nununku mwet suwoswos ac mwet koluk oana sie, mweyen ma nukewa ac kain in mukuikui nukewa fah sikyak in pacl fal la.” 18 Nga nunku tuh God El srike kut in akkalemye nu sesr lah kut tia sie na liki ma orakrak uh. 19 Ma kalem uh pa saflaiyen mwet uh, ac ma orakrak uh, oana sie. Elos kewa ma orekla ac oasr momong la, ac kewana ac misa. Mwet uh tia fulat liki ma orakrak uh, mweyen moul uh ma lusrongten nu seltal kewa. 20 Elos kewa ac som nu ke yen sefanna — nu infohk uh. Eltal na kewa orekla ke fohk, ac eltal na kewa fah sifil ekla nu kac. 21 Su ku in etu na pwaye lah ngunin mwet uh ac sowak nu lucng, ac ngunin ma orakrak uh ac som nu ten nu infohk uh? 22 Ouinge nga akilen lah ma se wo emeet kut in oru uh pa in engankin ma kut orala. Wangin pac ma saya. Kut tia ku in etu lah mea ac fah sikyak tukun kut misa.
* 3:5 sisalik eot ... eisani eot e: Yurin mwet Jew elos orekmakin kas inge in pupulyukkin pacl in tia tukeni oan, ac pacl in tukeni oan.