19
Soko On In Asor
LEUM GOD El sap ngan yuk on soko inge. On in asor soko ke fisrak luo lun Israel.
Nina kiomtal el oana soko lion mutan na pulaik!
El tufahla lion srisrik natul wi lion mukul sulallal inge.
El tufahla soko lion srisrik natul ac lotel in suk ma nal.
Ac el etala in kang mwet.
Mwet in facl sac lohng kacl
Ac orek luf in sang sruokilya.
Elos sang ka sruokilya, ac usalla nu in acn Egypt.
Ma mutan soko ah soano nwe ke na el liye finsrak lal nukewa wanginla
Na el tufahla pac soko lion srisrik
Ac el kapak nu ke lion sulallal soko.
Ke pacl se el sun kuiyal
El wi lion uh,
Ac el lutlut pac in konauk ma nal ac in mongo mwet.
El fahsr kunaus pot uh, ac kunausla pac siti srisrik.
Mwet in facl sac elos tuninfong
Ke pacl nukewa el ngutngut.
Mutunfacl uh tukeni in mweunel;
Mwet uh tuku ke acn nukewa.
Elos laknelik nwek lalos
Ac sruokilya ke sruhf lalos.
Elos fililya in sie kalkal
Ac usalla nu yurin tokosra lun Babylonia.
Elos eisalang nu sin mwet in liyalang
In mau tia sifil lohngyuk ngutngut lal ah
Fineol in acn Israel nwe tok.
10 Nina kiomtal el oana fain in grape soko
Su yoki sisken soko infacl.
Mweyen yohk kof we,
Fain soko inge nwanala ke sra ac fahko.
11 Lah kac arulana ku
Ac kapak nu ke scepter* lun leum uh,
Fain soko ah kapak nwe ke sun pukunyeng uh;
Mwet nukewa liye lusa ke loes ac nwanala ke sra.
12 Tusruktu mwet kasrkusrak elos fusak
Ac sisya fin fohk ah,
Ac eng kutulap me akpaoyela fahko kac.
Lah kac kipatelik;
Elos paola ac isisyak.
13 Inge yoki yen mwesis
Yen pao ac wangin kof we.
14 Sropon fain soko inge sun e uh,
Na e uh esukak fahko ac lah kac.
Lah kac tia ku in sifilpa kui,
Ac tia ku in sifilpa orek scepter lun leum uh.
On in asor soko pa inge; su kalweniyukna in onkakinyuk.
* 19:11 scepter: liye ke Kalmen Kutu Kas.