11
Lungse Lun God Nu Selos Su Lainul
1 LEUM GOD El fahk,
“Pacl ses Israel el sie tulik, nga lungse el,
Ac pangnolma liki Egypt oana ke el wen nutik.
2 Ke pus na pacl nga pang nu sel,
Puseni pac pacl el forla likiyu.
Mwet luk uh orek kisa nu sel Baal;
Elos esukak mwe keng nu ke ma sruloala.
3 Tusruktu, nga pa luti Israel in etu fahsr.
Nga kafisak mwet luk in pouk,
A elos tiana akilen lah nga karinganulos.
4 Nga amakunulosme nu yuruk ke pakomuta ac lungse yohk luk.
Nga sraklalosyak ac kaosulosme nu likintupuk.
Nga kui nu ten ac kitalos.
5 “Elos srunga foloko nu yuruk, na pa elos enenu in folokla nu Egypt, ac Assyria fah leum faclos.
6 Mweun ac fah pokla siti selos ac kunausla mutunpot we. Mweun ac fah sukela mwet luk mweyen elos oru na lungse lalos sifacna.
7 Elos sruasrala in forla likiyu. Elos ac wowoyak ke sripen srenenu ma oan faclos, tuh wangin sie fah srukak lukelos.
8 “Israel, nga ac filikomla fuka?
Nga ac siskomla fuka?
Ya nga ku in kunauskomla, oana nga tuh oru nu sel Admah,
Ku orekom oana ke nga oru nu sel Zeboim?
Insiuk ac tiana lela ngan oru ouinge,
Lungse luk nu sum arulana ku na pwaye.
9 Nga fah tia kai kom in kasrkusrak luk.
Nga fah tia sifil kunausla Israel.
Mweyen nga God, ac nga tia mwet.
Nga pa El Su Mutal, su wi kom na.
Nga fah tia tuku nu yurum in kasrkusrak.
10 “Mwet luk fah fahsr tukuk pacl nga ngutngut oana soko lion nu sin mwet lokoalok lalos. Elos fah sulaklak nu yuruk roto me.
11 Elos ac tuku Egypt me, mui oana won yen engyeng uh, ac liki acn Assyria me oana wuleoa uh. Nga fah sifilpa usalosme nu in lohm selos. Nga, LEUM GOD, pa fahk ouinge.”
Israel Ac Judah Kaiyuk
12 LEUM GOD El fahk, “Mwet Israel elos apinyula ke kikiap ac kutasrik, a mwet Judah elos srakna oaru in fahsr tukun God mutal.