11
Sie Tokosrai Misla
1 Takin sou fulat lal David oana sak soko ma pakpuki nu infohk uh; na, oana ke lah sasu ac srunak ke sruen sak uh, ouinge sie tokosra sasu fah tuyak liki inmasrlon fwilin tulik natul David.
2 Ngunin LEUM GOD ac fah oan facl —
Ngunin lalmwetmet ac etauk in leumi mwet lal.
El ac fah etu ma lungse lun LEUM GOD ac arulana akfulatyal,
3 Ac El ac fah insewowo in aksol.
Nununku lal fah tia wiwimwet ku wiwikas;
4 El ac fah oru nununku suwohs nu sin mwet sukasrup
Ac loango suwohs lun mwet ma kofla sifacna.
Ke sap lal, mwet uh fah kalyeiyuk,
Ac mwet koluk fah misa.
5 El fah leumi mwet lal ke pwaye ac suwoswoslana.
6 Kosro wolf ac sheep fusr fah tukeni muta in misla,
Ac leopard sulallal fah wi na nani fusr uh oan.
Cow fusr ac lion fusr fah tukeni mongo
Ac tulik srisrik fah ku in karingnalos.
7 Cow ac bear fah tukeni mongo,
Ac cow fusr ac bear fusr natulos fah tukenina oan.
Lion ac fah mongo mah, oana cow.
8 Finne tulik fusr se, ac fah tia sensen
In srital apkuran nu yurin wet pwasin.
9 Fin acn Zion, inging mutal lun God,
Ac fah wangin mwe sensen ku ma koluk.
Acn we ac fah sessesla ke mwet su arulana etu ke LEUM GOD
Oana ke meoa uh nwanala ke kof.
Mwet Sruoh Ac Fah Foloko
10 Len se ac fah tuku ke tokosra sasu, su sie sin fwilin tulik natul David, ac fah sie mwe akul nu sin mutunfacl puspis. Elos ac toeni in siti fulat sel ac akfulatyal.
11 In len sac, Leum El ac sifilpa orekmakin ku lal in folokonma mwet lal su lula in acn Assyria ac Egypt, in acn Pathros, Ethiopia, Elam, Babylonia, Hamath, ac liki acn ma oan sisken meoa.
12 Leum El ac fah kolak sie flag tuh in sie mwe akul nu sin mutunfacl uh lah El sifilpa eisani mwet lisyukla lun Israel ac Judah, ac folokunulosme liki eng akosr lun faclu.
13 Tokosrai lun Israel fah tia sifil kwase Judah, ac Judah fah tia sifilpa mwet lokoalok lun Israel.
14 Elos ac tukeni mweuni acn Philistia layen nu roto, ac wapi mwet su muta layen nu kutulap. Elos ac kutangla mwet Edom ac mwet Moab, ac mwet Ammon fah aksolos.
15 LEUM GOD El ac akmihnyela inalok ke Meoa Srusra, ac El ac use sie eng fol in akpaoyela Infacl Euphrates, ac filiya infacl srisrik itkosr na tuh mwet uh fah ku in tupalla.
16 Ac fah oasr soko inkanek lulap tuku liki acn Assyria nu sin mwet lal mwet Israel, su srakna moul oasr we, oana ke tuh orek nu sin mwet matu lalos ke elos tuku liki facl Egypt.