44
LEUM GOD Mukena Pa God
LEUM GOD El fahk,
“Porongo inge, Israel, mwet kulansap luk —
Mwet solla luk, fwilin tulik natul Jacob.
Nga LEUM GOD su orekomla;
Nga nuna kasrekom oe ke kom isusla ah me.
Nik kom sangeng; kom mwet kulansap luk,
Mwet sulela luk su nga lungse.
 
“Nga fah sang kof nu sin acn malu
Ac oru tuh infacl in soror ke acn pao.
Nga fah okoaot ngunik ac mwe insewowo luk
Nu fin fwilin tulik nutum.
Elos ac sa in kap oana mah ma aksroksrokyeyuk wo,
Oana sak willow ma kap sisken infacl ma yohk kof soror we.
 
“Mwet uh fah kais sie fahk,
‘Nga ma lun LEUM GOD.’
Elos fah tuku in weang mwet Israel.
Kais sie fah simusla Inen LEUM GOD fin paol,
Ac sifacna fahk mu el sie sin mwet lun God.”
 
LEUM GOD, su leumi ac karingin Israel,
LEUM GOD Kulana, El fahk ouinge:
“Nga pa oemeet, ac oayapa safla, ac nga God sefanna;
Wangin sie pac god sayuk.+
Ya oasr sie sayuk su ku in oru ma nga orala tari?
Su ku in palyeak ma nukewa ma sikyak
Oe ke mutawauk ah me na nwe ke safla lun faclu?
Mwet luk, nimet sangeng!
Kowos etu lah oemeet me nu inge
Nga fahkak tari ma nukewa ma ac sikyak,
Ac kowos mwet loh luk.
Mea, oasr pac god saya?
Wangin! Wangin siefanna eot ku ma nga etu kac!”
Aksruksrukyeyuk Mwet Su Alu Nu Ke Ma Sruloala
Mwet nukewa su taflela ma sruloala uh elos mwet lusrongten, ac god ma elos akfulatye yohk uh wangin sripa. Elos su alu nu ke god inge elos mwet kun ac lalfon — ac elos ac fah akmwekinyeyuk. 10 Wanginna ma ac wo ke sie mwet el orala sie lumah ke osra, ac alu nu kac oana sie god! 11 Mwet nukewa su alu nu kac ac fah akpusiselyeyuk. Mwet na pa orala ma sruloala uh. Lela elos in tuku ac tu ye nununku — elos ac fah tuninfongla, na ac fah yokna mwekinla lalos.
12 Mwet orekma ke osra uh ac eis sie ipin osra ac esukla ke e. Ke po ku lal el sang sie hammer tuktukya osra uh nwe ke sikyak lumah se el nunku an. Ke el orekma, el ac masrinsralla, malula, ac totola.
13 Mwet sroasr se ac srikeya sie sak. El makiya lumah se ma el ke orala uh ke mwe sim, supukla ke kufwen sroasr natul, ac taflela nu ke luman sie mwet na kato, ac filiya in lohm sel. 14 El ku in pakiya sak cedar elan orekmakin, ku sulela sak oak ku sak cypress insak uh me. Ku el ku pac in yukwiya soko sak cedar ac soano af uh in akkapyauk. 15 Sie mwet ac orekmakin sie ip ke sak soko ah nu ke etong, ac orek ma sruloala ke sie ip uh. Sie ip uh el ac sang tanak sie e in akfusrfusryal sifacna ac um bread; ac ip se ngia el orala nu ke sie god ac alu nu kac. 16 El ku in sang kutu ipinsak uh, tanak sie e; manman ikwa, ac kang nwe ke el kihpi. El akfusrfusryal sifacna ac fahk, “We, fusrfusr! Ngeng in e oh!” 17 Ma lula ke sak soko ah el orala nu ke sie ma sruloala, na el pasrla nwe ten ac alu nu kac. El pre nu kac ac fahk, “Kom god luk — moliyula!”
18 Mwet ouinge arulana afon ac tia etu ma elos oru. Elos kaliya mutalos ac nunak lalos liki ma pwaye. 19 Mwet se ma orek ma sruloala uh el tia ku in nunkauk in fahk, “Kutu sak inge nga esukak. Nga um bread fin mulut uh, ac nga manman ikwa ac kangla. Ma lula ke sak soko ah nga orala nu ke ma sruloala se. Ac inge, nga pasrla nu ke sie polosak!”
20 Ke el oru ouinge uh, oana elan mongo apat. Nunak lalfon lal uh aktafongyella, oru upa in kasreyuk el. El tia ku in sifacna fahk lah ma sruloala se el sruok inpaol uh tia god se.
LEUM GOD, Su Orala Ma Nukewa Ac Langoela Mwet Uh
21  LEUM GOD El fahk,
“Israel, esam ma se inge;
Esam lah kom mwet kulansap luk.
Nga orekomla tuh in mwet kulansap luk,
Ac nga fah tiana mulkinkomla.
22 Nga pokla tari ma koluk lom, oana ke eng uh okla pukunyeng uh.
Foloko nu yuruk; nga pa molikomla uh.”
 
23 Sasa ke engan, O kowos kusrao!
Sala, kowos acn loal faclu!
Sasa ke engan, kowos eol ac sak nukewa insak uh!
LEUM GOD El fahkak fulat lal
Ke El molela Israel, mwet lal.
 
24 “Nga pa LEUM GOD, su langoekomla.
Nga pa orekomla uh,
Nga LEUM GOD, su orala ma nukewa.
Nga mukena pa asroelik kusrao.
Ke nga tuh orala faclu, wangin mwet kasreyu.
25 Nga oru mwet susfa uh in oana mwet lalfon,
Ac aklusrongtenye ma mwet tuni acn engyeng uh palye.
Nga lain kas lun mwet lalmwetmet,
Ac nga akkalemye lah lalmwetmet lalos uh ma lalfon.+
26 A ke pacl mwet kulansap luk oru palu lal,
Ac ke nga supwala sie mwet utuk kas in akkalemye lemlem luk,
Nga oru tuh lemlem ac palu ingan in akpwayeiyuk.
Nga fahk nu sin Jerusalem lah mwet ac fah sifilpa muta we,
Ac nu sin siti in acn Judah lah ac sifilpa musaiyuk.
Acn ma sikiyukla ingan, siti ac fah sifilpa tulokyak we.
27 Ke sie kas in sap ku luk, nga akpaoyela meoa.
28 Nga fahk nu sel Cyrus, ‘Kom ac fah aolyu in leumi mwet luk,
Ac kom fah oru ma nga lungse kom in oru:
Kom fah sapkin Jerusalem in sifil musaiyukla
Ac pwelung in Tempul in oakwuki.’ ”+
+ 44:6 Isa 48:12; Fwack 1:17; 2:8; 22:13 + 44:25 1 Cor 1:20 + 44:28 2 Chr 36:23; Ezr 1:2