50
LEUM GOD El fahk,
“Ya kowos nunku mu nga supwala mwet luk in som likiyu
Oana sie mukul su sisla mutan kial?
Na, pia pwepu in fahsrelik an?
Ya kowos nunku mu nga tuh kukakin kowos in akfalye soemoul luk,
Oana sie mwet su kukakin tulik natul tuh elos in mwet kohs?
Mo, kowos tuh som nu in sruoh ke sripen ma koluk lowos;
Nga supwekowosla ke sripen orekma koluk lowos.
 
“Efu ku mwet luk uh tia porongeyu
Ke nga som nu yorolos in molelos?
Efu elos ku tia topuk pacl se nga pang?
Mea, nga arulana munas in molelosla?
Nga ku in akpaoyela meoa ke sap na luk,
Ac oru tuh infacl uh in ekla nu ke acn mwesis,
Na ik loac fah misa mweyen lisr kof.
Nga ku in oru yen engyeng uh in lohsrla,
In oana elan asor ke sie mwet misa.”
Akosten Lun Mwet Kulansap Lun LEUM GOD
LEUM GOD Fulatlana El lutiyu ma nga in fahk,
Tuh nga in ku in akkeye mwet munas.
Lotutang nukewa El oru nga in kena
Tari lohng ma El ac lutiyu kac.
LEUM GOD El ase etauk nu sik,
Ac nga tiana lainul
Ku forla lukel.
Nga fuhlelana elos in sringil fintukuk.
Nga tia kutongolos ke elos fahk kas in akkolukyeyu
Ac fis unen alut luk
Ac ani nu in mutuk.+
 
Tusruktu kas in akkoluk lalos koflana akmunasyeyu
Mweyen LEUM GOD Fulatlana El kasreyu.
Nga sikulyuwi na ku, tuh nga in muteng ma elos oru.
Nga etu lah nga ac tia akmwekinyeyuk,
Mweyen God El apkuran nu sik,
Ac El fah akpwayei lah wangin ma koluk luk.
Ya oasr mwet ac pulaik in orek tukak keik?
Lela nga el in tukeni som nu ke nununku!
Lela elan fahk tukak lal an we!+
LEUM GOD Fulatlana El ac loangeyu,
Na su ku in akpwayei lah oasr ma koluk luk?
Mwet nukewa ma orek tukak keik ac wanginla,
Elos ac wanginla oana sie ipin nuknuk ma watilla uh.
 
10 Kowos nukewa su akfulatye LEUM GOD
Ac akos kas lun mwet kulansap lal,
Sahp ac ku in lohsr inkanek ma kowos fahsr kac,
Tusruktu lulalfongina in LEUM GOD, ac fungyang nu sel.
11 Kowos nukewa su oru pwapa koluk in kunausla mwet saya
Ac fah kunausyukla ke pwapa koluk lowos.
LEUM GOD El ac fah oru tuh in ouinge.
Ke saflaiya uh kowos ac fah keok ke mwe ongoiya na koluk.
+ 50:6 Mt 26:67; Mk 14:65 + 50:8 Rom 8:33–34