62
Nga fah kaskas na in akkeye Jerusalem;
Nga fah tia misla nwe ke na moliyukla el,
Ac kutangla lal saromrom oana kalem lun sie e ke fong.
Jerusalem, mutunfacl puspis fah liye lah kom kutangla!
Tokosra lalos nukewa fah liye wolana lom.
Ac fah pangonyuk kom ke sie ine sasu
Su LEUM GOD sifacna El ac sot nu sum.
Kom ac fah oana sie tefuro kato nu sin LEUM GOD.
Ac fah tia sifil pangpang kom “Sisla,”
Ku facl sum ac tia pangpang “Sikiyukla.”
Ine sasu lom uh pa “God El Insewowo Kacl.”*
Facl sum fah pangpang “Sie Payuk Engan,”
Mweyen LEUM GOD El insewowo sum,
Ac El ac fah oana sie mukul tuma nu ke facl sum.
Oana ke sie mukul fusr el eis sie mutan virgin in marut sel,
El su lumwekomla fah payuk sum.
Oana ke sie mukul el engankin mutan ma el tufacna marut sel,
Ouinge God lom El fah engan sum.
 
Jerusalem, nga oakiya mwet san fin pot lom.
Elos fah tia misla ke len ac fong.
Elos mwet akesmakye LEUM GOD
Tuh Elan tia mulkunla wuleang lal.
Elos in tia lela Elan mongla nwe ke El sifil tulokunak Jerusalem
Ac oru tuh in sie siti ma faclu nufon kaksakin.
 
LEUM GOD El orala sie wuleang ku,
Ac ke po ku lal El fah akpwayei:
“Mwet lokoalok lom ac fah tia sifil kang wheat nom,
Ac mwetsac ac fah tia sifil nim wain nimom.
A kowos su yukwiya ac kosrani wheat uh
Fah mongo bread kac ac kaksakin LEUM GOD.
Kowos su karingin ac orani grape uh
Fah nim wain kac ke inkul in Tempul sik.”
 
10 Mwet Jerusalem, kowos in illa liki siti uh
Ac musai soko inkanek nu sin mwet lom su ac foloko!
Akoo soko inkanek lulap; sisla eot kac uh!
Tulokunak sie akul tuh mutunfacl puspis fah ku in etu
11 Lah LEUM GOD El sulkakin kas inge nu sin faclu nufon:
“Fahk nu sin mwet Jerusalem
Lah LEUM GOD El tuku in molikowosla,
Ac El use mwet su El molela welul.”+
12 Kowos ac fah pangpang “Mutanfahl Mutal lun God,”
“Mwet Moliyukla sin LEUM GOD.”
Ac fah pangpang Jerusalem “Siti se ma Lungkinyuk,”
“Siti se ma Tia Sisila.”
* 62:4 God El Insewowo Kacl: pa inge kalmen ine Hebrew se Hephzibah. 62:4 Sie Payuk Engan: pa inge kalmen ine Hebrew se Beulah. + 62:11 Isa 40:10; Fwack 22:12