7
1 Wen nutik, esam kas luk nu sum, ac nimet mulkunla ma nga fahk kom in oru.
2 Oru ma nga fahk nu sum ac kom fah moul. Kom in karinganang mwe luti luk oana ma se ma saok oemeet sum.
3 Sruokya mwe luti luk in wi kom pacl nukewa. Simusla insiom.
4 Oru lalmwetmet uh in oana sie tamtael lom, ac etauk in oana mwet kawuk fototo lom.
5 Ma inge ac sruokkomi liki mutan payuk kien mukul saya, ac kas in akmunas lalos.
Sie Mutan Elah Koluk
6 Sie pacl ah ke nga tuh ngetla ke winto in lohm sik ah,
7 nga liye kutu mukul fusr su soenna oasr etauk la, na nga akilen sie selos su lalfon lumahl.
8 El fahsr inkanek ah, apkuranyang nu ke lohm sin sie mutan.
9 Ke ekela tukun lohsrani acn uh,
10 mutan sac osun nu sel. El nuknuk oana sie mutan kosro su eis molin kosro lal, ac oasr nunak koluk se sel.
11 El sie mutan ku nunak lal ac sumwekin, su lungsena forfor inkanek uh pacl nukewa,
12 ku muta soano mwet ke sruwasrik inkanek uh. Kutu pacl uh el ac tu inkanek uh, ac kutu pacl ke nien kuka.
13 El kaokma mukul fusr sac ac ngok mutal. El ngetang suilya ac fahk,
14 “Nga oru tari mwe kisa luk misenge, ac ikwa kac uh oasr yuruk.
15 Na nga tuku suk kom mweyen nga ke osun nu sum, na pa nga sun kom.
16 Nga lohala tari mwe oan kiuk ke kaot linen tuhntun Egypt me.
17 Nga fwela ke ono keng ma orekla ke myrrh, aloes, ac cinnamon.
18 Fahsru nga kom in oru lungse lasr fong nufon se. Kut in asruhila ac arulana pwar sie sin sie.
19 Mukul tumuk uh wangin lohm ah — el som nu yen loessula.
20 El us mani na yohk welul ac el ac tia folok nwe ke wik luo.”
21 Na el srifella ke kas emwem lal, ac mwet fusr sac welulla.
22 El sa na in fahsr tokol oana soko ox kokola nu ke anwuki, ku oana soko deer ma sroang nu in kwasrip
23 ac osra in pisr uh ac fakisya insial. El oana sie won su fahsryang nu in sie nwek ac tia etu lah moul lal oan in fosrnga.
24 Ke ma inge, wen nutik, porongeyu, ac lohang nu ke ma nga fahk.
25 Nik kom lela sie mutan ouinge in eisla insiom. Nimet kuhfla nu yorol.
26 El kunausla mukul puspis tari, ac pus na selos misa.
27 Kom fin som nu lohm sel ah, kom alfokfokla nu ke facl lun misa — soko inkanek ma oatui suwoswosyang nu ke acn lun misa.