4
Aruruma Ke Sukan Lam
Lipufan se ma sramsram nu sik ah sifilpa tuku ac okasyuyak, oana in mu nga motul. Ac el siyuk, “Oasr ma kom liye?”
Ac nga fahk, “Nga liye soko sukan lam orekla ke gold, ac pol in neinyuk oil se oan oelucng. Oasr lam itkosr oan fin sukan lam soko ah, kais sie oasr acn sin wik itkosr kac. Oasr sak olive lukwa sisken sukan lam sac, soko oan lac ac soko oan layen ngia.”+ Na nga siyuk sin lipufan sac, “Leum luk, mea kalmen ma inge?”
Na el siyuk sik, “Mea, kom nikin?”
Ac nga fahk, “Nga nikinna.”*
Wulela Lun God Nu Sel Zerubbabel
Lipufan sac fahk nu sik nga in sang nu sel Zerubbabel kas sin LEUM GOD inge: “Ma nukewa kom oru ac fah fahla wo, tia ke ku lun mwet mweun ku ke ku lom sifacna, a ke ku lun ngunik.+ Mwe kutong na yohk ac fulat oana fineol, fah wanginla ye motom. Kom ac fah sifil musaela Tempul uh, ac ke kom ac oakiya eot se ma safla uh, mwet uh fah sala ac fahk, “Arulana wo! Arulana wo!”
Sie pac kas sin LEUM GOD tuku nu sik. El fahk, “Zerubbabel el oakiya tari pwelung lun Tempul, ac el ac aksafyela musa kac uh. Pacl se ma inge ac orekla uh, na mwet luk uh ac fah etu lah nga pa supwekom nu selos uh. 10 Elos ac toasrla mweyen tia yohk ma orekla uh. Tusruktu ke elos ac liyal Zerubbabel lah el srakna musai Tempul, na elos ac fah engan.”
Na lipufan sac fahk nu sik, “Lam itkosr inge pa muta itkosr lun LEUM GOD, su liye faclu nufon.”+
11 Na nga siyuk sel, “Mea kalmen sak olive lukwa ma oan lac lac ke sukan lam uh?+ 12 Ac mea kalmen lesak olive luo sisken paip gold lukwa ma oil in olive uh soror kac uh?”
13 Ac el siyuk sik, “Mea, kom nikin?”
Ac nga fahk, “Leum luk, nga tiana etu.”
14 Na el fahk, “Mwet luo inge pa God El sulela ac mosrwela in kulansupu Leum God lun faclu nufon.”
+ 4:3 Fwack 11:4 * 4:5 Mwet luti puspis lulalfongi mu verse 10 nu ke 14 pa fal in fahsr tukun verse 5; na verse 6 nu ke 9 fahsr tukun verse 14. + 4:6 Ezr 5:2 + 4:10 Fwack 5:6 + 4:11 Fwack 11:4