NEHEMIAH
Di Beebaa Nehemiah
Di haga modongoohia:
Di Beebaa Nehemiah guu wwae haa:
1) Di hanimoi labelaa Nehemiah gi Jerusalem, di gowaa dela ne hagau ginai a mee go di king aamua o Persia belee dagi digau Judah.
2) Di hau hoou di abaaba Jerusalem.
3) Di dau o Nnaganoho a God go Ezra, gei nia daangada ga haagi nadau ihala.
4) Nnagadilinga mee ala ne hai go Nehemiah i di madagoaa nogo dagi iei mee.
Di mee hagalabagau i lodo di beebaa deenei la di hagadagadagagee a Nehemiah ang gi God mo dono hai dalodalo ang gi Mee.
Di hagahonu o di beebaa deenei
Nehemiah gu hanimoi labelaa gi Jerusalem (1.1—2.20)
Di haga duu aga hoou di abaaba Jerusalem (3.1—7.73)
Di dau o Nnaganoho, mo di haga duu aga hoou o di hagababa (8.1—10.39)
Nia mee ala i golo ala ne hai go Nehemiah (11.1—13.31)
1
Aanei nnelekai Nehemiah go di tama Hacaliah ne helekai ai.
Di manawa gee Nehemiah gi Jerusalem
I lodo di malama go Kislev,* i di madalua ngadau a Artaxerxes nogo hai di king aamua o Persia, gei au go Nehemiah nogo noho i Susa, go di waahale e dagi tenua deelaa. Malaa, Hanani, tangada i ogu duaahina daane, gaa dau i golo mai i Judah mo nia daane ala i golo, gei au ga heeu gi digaula di hai o digau o Jew ala ne hula gi muli gi nadau gowaa donu, mo di hai o Jerusalem. Digaula ga helekai mai gi di au bolo digau ala ne dubu ala guu noho i lodo nadau henua donu, la guu tale ginai di haingadaa mai baahi digau mai i daha ala e haganiga digaula, gu haihai digaula hagahuaidu. Digaula ga helekai mai labelaa bolo di abaaba Jerusalem gu meheu gi lala, gei di ngudu di abaaba o di waahale digi hauhia haga hoou, daamada mai di madagoaa dela ne dudu go di ahi. Dogu longono e au nia mee aanei, gei au gaa noho gi lala, gaa dangi.
Au ga dangidangi i nia laangi e logo, digi miami, gaa hai dagu dalodalo gi God, ga helekai, “Meenei Dimaadua, go di God di langi, Kooe dela e aamua ge hagamadagudia huoloo! Kooe dela e manawa dahi huoloo ge e daudali dau hagababa dela ne hai gi digau ala e aloho i di Goe ge e haga kila aga au helekai. Goe hila mai gi di au, hagalongo gi agu dalodalo ala e dangidangi iei au i di aa mo di boo, bolo Goe gii hila ang gi au hege, digau Israel. Au e haagi bolo gimaadou, go digau Israel la digau gu ihala. Madau maadua mmaadua mo au, gimaadou gu haihai madau huaidu. Gimaadou gu hai baahi adu gi di Goe, ge digi hagakila au mee ala ne hai mai gi gimaadou bolo gi heia. Gimaadou gu dagadagahi au haganoho ala ne hagi anga Kooe gi Moses, bolo gi hagia mai gi gimaadou. Goe gi langahia dau helekai ne hai gi Moses dela e hai boloo:
‘Maa goodou digau Israel hagalee daudali
mo di modudahi mai gi di Au,
gei Au ga haga maaheu goodou dagidahi
laa lodo nia guongo ala i golo.*
Gei maa goodou ga huli mai gi di Au,
ga haga kila aga agu mee ala ne haga noho adu
gi goodou bolo gi heia,
gei Au ga laha mai labelaa goodou
gi dagu gowaa dela ne hilihili
belee hai di gowaa e hagalaamua ai dogu ingoo,
ma e aha maa goodou e noho i nia mada o henuailala.’*
10 “Meenei Tagi, gimaadou go au hege, go au daangada. Kooe dela ne haga dagaloaha gimaadou mai o mogobuna mo mai oo mahi aamua. 11 Goe hagalongo gi dagu dangidangi mo nia dangidangi o au hege huogodoo ala i golo, ala e hagalaamua Goe. Goe hila mai gi di au dangi nei, gii mee au di gida dogu dumaalia mai baahi di king.”
I nia laangi aalaa, gei au nogo hai tangada madamada humalia nia waini di king.
* 1:1 Di malama go Kislev la di hiwa malama digau o Jew * 1:8 Leviticus 26.33 * 1:9 Deuteronomy 30.1-5