4
Adina gua nida—biyaguna nigo amiye mida keikari, bi moimai rei tavoi redo amiye kana dada, idu beika baika tau gade bi ini. Idu bi nari rededi vene ma ourefeidena vene di vava gabireri amego bogo baba sena niyo meda okigo mamo. Una makai dudu, kakua kana ka amegasa mina kono tora noibanu di ofa sei ma bodaka gabireri moimai rei tavoi regamafa. Idu ini meda rama okiyori, Sei yaku ini Mida nifeideyo, kaere bi rema di rivori vata niyo; mina rema bi ago gira gabireri amegamo. Ye ago gira gabireri ameyadi vene erufugi, una vadema aego ma ini mida mida nigifa dada.
Adina ya bi ini mida mida dada, Sei yaku ini Mida di Vima uni ukari nifeideyo ma raka nido, “Baba, nai Madini.” Kamini gua ya yokoi yokoi bi moimai rei tavoi redo amiye de, idu bi mida; ye kamini mida niyo, Sei dudu bi* biyaguna niyo amiye.
Paul di mokena Galatia vene rofu
Idu senagi ya bi Sei toto, ye ofa sei rofu moimai rei tavoi regamadi. Idu gua bi Sei diba niyadi—o yomakai nigida, Sei bi ya diba niyo—ye gokai resi ofa sei ma yeiva de vima ma irava vegu rofu dairisi dudusa ini moimai rei tavoi rena vene ura reyadi? 10 Ya bi Sei uka moi ada regi meda be, eyo be, ari be ma lagani be moi akeke ridedi. 11 Na ori reida ida yokoiri ya rofu moimai rei tavoi reyaka baeko.
12 Nai usika ourena, ya niguba reida na kana nifa, adina na ka ya kana niyaka. Na rofu no yokoi de reyadi. 13 Ye ya ya diba na yaku ago buni siko ya rofu niokuyaka, na gauka reyaka dada. 14 Nai gauka bi ya rofu toe niyo, idu na rofu gubuyo de resi gedu mana de reyadi, idu Sei di naivo naivo vima o Iesu Keriso iniye kana na moiyadi. 15 Ye ya bi ada reyadi, idu gua bi gokai? Adina ya vene rofu niokuda ya reyagadu vonisi, bi ya kaya di nemoko moi yakusi na maragadu. 16 Ye ya rofu ago rama ninari, gua yi tuma amiye niyaka ba?
17 Mirona vene nidedi bi ini ura tora gade ya rofu rededi, idu ini mokena bi buni de. Ini mokena bi ya vene na rofu egaima rigedi, ye ya yaku ina rofu ura iniye regedi. 18 Idu toga mina ura rena bi buni, ini ida buni nufa, ma na yi nemokori ameibobinari maka de. 19 Nai mida mida, na bi mida odigi gera rena kana, ya rofu dudusa esika amuteida bogo Keriso yi ideri amedo, mina vegida mamo. 20 Gua ura reida bi yasa amesi nai mokena bouna riyagadu, ya fafau uka vorivori reida dada!
Hagar ma Sarah di oteimana sina
21 Na nifa, ya Moses di ago gira gabireri ura rededi vene, ago gira de neidededi ba? 22 Adina bura reyo bi Abraham ini mida remanu nufa, yokoi bi ini moimai rei tavoi reyo rema rofu, ma yokoi bi erufuyo rema rofu. 23 Ye naivo rema rofu mida bi roaita di vegu dudu vata niyo, ma erufuyo rema di mida bi Sei di nitore rena ago dudu vata niyo. 24 Mina bi oteimana ago: adina mina Sei di uka ago yokoi maka ni remanu rena bi mina rema remanu kana. Yokoi bi Sinai omuna ika gutuna deyo, moimai rei tavoi rena veguri mida odiyo; mina bi Hagar. 25 Hagar bi mina Sinai omuna ika, Arabia gaganiri are redo; ma bi gua Jerusalem taoni vene kana, adina bi ago gira gabireri, ini midasa moimai rei tavoi rena kana. 26 Idu Jerusalem odorori, bi moimai rei tavoi redo rema kana de; mina bi uni nono. 27 Adina bura reyo:
“Ada re, ya natu rema, kaere mida de odiyo!
Imuna nisi ada re, ya kaere mida odina di esika be de amuteyo!
Adina ferena rema bi mida tau gade moigo,
idu ini maruka nufa rema bi mida tau de.”
28 Ye ya usika ourena bi Sei di nitore rena ago di mida mida, Isaac kana. 29 Idu mina ituari, roaita di vegu dudu odiyo mida yaku vima dudu odiyo mida esika esika maro, ye gua bi makai. 30 Ye Sei di ago di bura bi beika nido? Nido bi, “Naivo rema ini midasa meki re, ini adina, erufuyo rema di midasa baba yaku beika baika fereyo, mina de rau rego.” 31 Mina dada usika ourena, una bi naivo rema di mida mida de, idu bi erufuyo rema di.
4:5 Rom 8.15–17 * 4:7 Sei dudu bi; bura bedakai Keriso dudu Sei di nufa. 4:22 erufuyo rema: Bi naivo rema de; bi Abraham di rema iniye. 4:22 Gen 16.15; 21.2 4:27 Is 54.1 4:29 Gen 21.9 4:30 Gen 21.10