13
A marmaris i lenri
1 Ra an wasiso nama wur ngas na wasiso anun a taro ma anun a kum ensel kai, ikut ra ka lason una marmaris, a elar kut nama garamut o a kudu ra i tangtangis oros kut.
2 Ra an utur ukai a etabor sur an wasiso na poropet, ma ra an tasman a kum utna na pidik rop ma a kum mananos rop, ma ra an utur ukai a nurnur sur an ukarai a kum tangai nami, ikut ra ka lason una marmaris, iau a utna oros kut.
3 Ra an pitar ru anung a kum utna rop torom a kum sibo na taro, ma an pitar iau kai sur din tun iau, ikut ra ka lason una marmaris, ken warut iau.
4 Osi ra i lason una marmaris a pinino ke ser ngoro lakit torom taio, ma i ser pam a wakakino torom a taro. Ke ser nuknuk laulau sur a utna anun taio, ke ser warango pasi, ma ke ser dat walos in lorino.
5 Ke laulau a magirano, ke nuk pasi ut, ke ser kankan lakit, ke ser nuk ukai a sakino ra di pami uni.
6 Ke gas un tu petutna ra ke tokodos, i gas kut una lingmulusino.
7 Osi ra i lason una marmaris i ser los a kum mamaut anun a taro, i ser nurnur, ma i kis langlang nama nurnur sur a kum utna rop ra o God in pami, ma i ser tur dekdek ra a kum mamaut i wanpat.
8 A marmaris ken rop lar pas. Ikut a kum wasiso na poropet det in rop kut, a wur ngas na wasiso det in rop kut, ma a mananos kai in rop kut.
9 Uni anundat a mananos ke kudulano, ma anundat a wasiso na poropet kai ke kudulano.
10 Ikut numur, ra a kum utna ra i kudulano in nanpat, a kum utna ra ke kudulano in rop.
11 Ra a natlik utmakai, a wasiso elar nama natlik, a nuknuk elar nama natlik, ma a mananos kai elar nama natlik. Ra a sa labo, a umana ru a magiran a natlik.
12 Uniri anundat a tamtama un o God ke talapor, i elar nami ra dat tama a niondat una galas, ra i gawul kut. Ikut numur, dat in tama o God nama matmatan dat. Uniri anung a mananos ke kudul, ikut numur anung a mananos in kudulano, elar nam o God i tasman rop iau.
13 A tulu utna ri detul kis tukum: a nurnur, a kinkinis langlang nama nurnur sur asau ra o God in pami, ma a marmaris. Ikut a marmaris i labo sakit tandetul.