7
A kum etowo una kinkinis na nolin
1 Uniri an balu a kum utna ra mot tumtumus suri torom iau: In wakak torom a musano ra ke nolin.
2 Ikut, kibino una kum pamuk na petutna ra kura, i wakak sur arara musano in nolin nam anun a ino ut, ma arara ino kai in nolin nama nun a musano ut.
3 Gong a musano i bitan a pinino tan anun a ino, ma lenkutkai ra, gong a ino i bitan a pinino tan anun a musano.
4 A ino ra i nolin, ke warkurai sur a pinino, awu. Anun a musano i warkurai suri. Ma lenkutkai ra, a musano ra i nolin, ke warkurai sur a pinino, awu. Anun a ino i warkurai suri.
5 Gong der bitan a pininder tan der etalai. Ikut, i wakak kut ra der rop der in mulaot sur der in utabu i munung a pininder gusun der etalai, sur der in wararing. Ikut, numur der in madek melet a pininder torom der etalai, sur gong o Satan i ulam tar der, ma der in puku, uni ka der warkurai kodos a nemnem ina pininder.
6 A watung a wasiso ri torom mot sur in warut mot, awu sur sur in elar nama warkurai torom mot.
7 A nemi sur a taro rop det in elar nam iau ra ka nolin. Ikut o God i pitar tar a kum etabor torom a taro rop taktakai. Ara i los ara ngas na etabor, ma ara kai i los a se etabor.
8 Ma a watungi tandet ra ka det nolin ma torom a kum ula lena, i wakak sur det in kis ut lenra, elar nam iau.
9 Ikut ra ka det pet lar pasi sur det in warkurai kodos a nemnem ina pinindet, i wakak kut sur det in nolin. Uni i wakak ra det in nolin, sur gong a nemnem ina pinindet i ukatutur a balandet.
10 Torom det kai ra det nolin, a pitar a warkurai ri. Ma awu sur iau, a Labino ut i pitari. Gong tu ino i wan pas gusun anun a musano.
11 Ikut, ra in nan pas gusuni, gong i nolin melet. Ma ra i nemi sur in nolin melet, in milet melet torom anun a musano ma der in ukodos anunder a kinkinis na nolin. Ma gong kai tu musano i lu ru anun a ino.
12 A watungi torom a ramano taro kai. Awu sur a Labino i watungi, iau ut a watungi lenri: Ra tu tisindat una nurnur, anun a ino awu sur a tene nurnur, ma a ino ra i nemi sur der in kis tomo, gong a tisindat ra i lu ru i.
13 Ra tu ino, a tene nurnur, ra anun a musano awu sur a tene nurnur, ma a musano ra i nemi sur der in kis tomo, gong a ino ra i wan pas gusuni.
14 Uni a musano ra awu sur a tene nurnur, i anun o God, kibino una nun a ino ra i nurnur, ma a ino ra awu sur a tene nurnur, i anun o God, kibino una nun a musano ra i nurnur. Ra awu, a kum nutnutu mot, det in dur. Ikut, det sa talapor, det a taro anun o God.
15 Ikut, ra aru suano ra tu pasander ra ke nurnur i nem na wan gusun ara pasander, madek ru i in nan. Ra in nan, anun a musano o anun a ino, ra i tene nurnur, in langolango gusun anunder a kinkinis na nolin. Uni o God i sa kabo pas dat sur dat in kis na malmal.
16 Ui a ino, ko tasmani ra un warut anum a musano sur in tene nurnur o awu. Ma ui kai a musano, ko tasmani ra un warut anum a ino sur in tene nurnur o awu.
Dat in laun elar nama ngas na kinkinis ra kuri tandat
17 Arara in laun ut elar nama nilaun ra a Labino i pitar tari tano, ma elar nama ngas na kinkinis ra kura tano, ra o God i kabo pasi. A pitar a warkurai ri torom a taro na lotu una kum tamon rop.
18 Ra o God i sa kabo pas taio ra di sa tok talilis tar a pinino, madek ru i, in lenra. Ma ra o God i sa kabo pas taio ra ka di tok talilis a pinino, gong mo di tok talilisi.
19 A petutna ra di tok talilis a pinin taio, o ka di tok talilis a pinino, i a utna oros kut. Ikut a petutna ra taio in mur a kum warkurai anun o God, i ra i labo sakit.
20 Arara in laun ut elar nama ngas na kinkinis ra kura tano, ra o God i kabo pasi.
21 Ra ui a tene ititula, ra o God i kabo pas ui, gong u nuknuk una num a kinkinis na tene ititula. Ikut, ra tu kisapi sur un langolango uni, i wakak un muri.
22 Uni i ra a tene ititula ra a Labino i sa kabo pasi, i a langolango na musano mo anun a Labino. Lenkutkai ra, i ra awu sur a tene ititula ra a Labino i sa kabo pasi, i a tene ititula mo anun o Karisito.
23 O God i sa kul pas mot nama ikul ra i labo sakit. Gong mot pitar tar mot sur mot a kum tene ititula anun a taro.
24 A kum tistising, a ngas na kinkinis ra mot laun uni, ra o God i kabo pas mot taktakai, i wakak sur mot in laun lenutra tomo nam o God.
A kum etowo torom det ra ka det nolin
25 A Labino ke pitar tu warkurai torom iau un det ra ka det nolin. Ikut an inanos mot una nuknuking. Iau a ngas na musano ra a taro det nurnur un iau, uni a Labino i maris doko iau.
26 A nuki lena i wakak ra osi ra ke nolin, gong i nolin, uni a kum maut uniri i wanpat.
27 Pepetlai, u sa nolin? Gong u lu ru anum a ino. Pepetlai, ko nolin? Gong u sisio sur tu ino.
28 Ikut, ra un nolin, awu sur u pam a sakino petutna. Ma ra tu toraro in nolin, awu sur i pam a sakino petutna. Ikut, det ra det nolin det in taramo a susut na mamaut una nundet a nilaun, ra ka nemi sur mot in etorom a kum mamaut ri.
29 A kum tistising, a watungi lenri, a du bung i sa milau. Turpasi uniri, a kum musano ra det nolin, det in laun lari ra ka det nolin.
30 Ma det ra det tangis, det in laun lari ra ka det tangis. Ma det ra det gas, det in laun lari ra ka det gas. Ma det ra det kukul, det in laun lari ra kalako utna anundet.
31 Ma det ra det papam nama kum utna ra kuri upiso, det in laun lari ra ka det nuknuk bing una kum utna ra. Uni a rakrakon bual ri dat laun uni, i sa rorom nanan.
32 A nemi sur mot in langolango gusun a kum nginara taginin upiso. A musano ra ke nolin, i balon una pinapam anun a Labino sur in ugasgas a Labino.
33 Ikut a musano ra i sa nolin, i balon una pinapam taginin una rakrakon bual, sur in ugasgas anun a ino.
34 A nuknukino ke takai, uni i nemi sur in ugasgas anun a ino ma a Labino kai. A ino ra ke nolin o a toraro, i balon una pinapam anun a Labino. Anun a nemnem sur in pitar rop tar a pinino ma a niono torom a Labino. Ikut, a ino ra i sa nolin, i balon una pinapam taginin una rakrakon bual, sur in ugasgas anun a musano.
35 A watung a kum utna ri sur in uwakak anumot a kinkinis, awu sur a turbat mot. A nemi sur mot in mur a tokodos na petutna, ma mot in pitar rop tar anumot a nilaun torom a Labino, ma gong a nuknuki mot i wan gisen.
36 Ra tu musano i nuki lena ke tokodos anun a petutna torom a ino ra di sa ubek bat tari toromi, ma ra a kum kilalo anun a ino i sa wan tito, ma a musano ra i nemi sur der in nolin, i wakak in nolin kut nami. Ke pam a sakino petutna. Der in nolin kut.
37 Ikut, ra tu musano i tur dekdek una nuknukino sur gong i nolin, ma katu utna i ungongos tari sur in nolin, ma i ut i tamtamabat anun a nemnem, i kai i pam a wakakino.
38 I mo ra a musano ra i nolin i pam a wakakino, ikut i ra ke nolin, i pam a wakak na petutna sakit tander.
39 A ino ra i sa nolin, a warkurai i kis toromi ra i ker tomo der nam anun a musano, ra anun a musano i laun utmakai. Ikut, ra anun a musano in mat, a ino ra in langolango sur in nolin melet nam taio ra i nemi, ikut in nolin ut nam taio ra anun a Labino.
40 Ikut a ino ra, in gas doko ra in kis kut lenra, ma ken nolin melet. Iri a nuknuking, ma a nuki lena a Nion o God i kis un iau kai.