2
O Karisito anundat a tene warut
+A kum nutnutung liklik, a tumus a kum utna ri torom mot sur gong mot pam a sakino. Ikut ra taio in pam a sakino, anundat a tene warut, o Iesu Karisito a Tene Tokodos, in wasiso anun o naro ra, torom o Tamano. +I ut i mat sur in kul langolango pas dat gusun anundat a kum sakino petutna, ma in urop ru a kankan anun o God gusun dat. Ma ke mat sur dat kut, i mat sur a taro rop una rakrakon bual.
Ra dat mur anun a kum warkurai, dat talapor lena dat tasmani ut o God. Ra taio i watungi lena, “A sa tasman o God,” ikut, ke mur anun a kum warkurai, i a tene torotoro, ma a lingmulusino ke kis uni. +Ra taio i mur a wasiso anun o God, a marmaris anun o God in kis mulus uni. A ukinalong ra dat tasmani lena dat anun o God i lenri: Osi ra i watungi uni lena, i anun o God, in laun elar nama nilaun anun o Iesu.
A matok na warkurai
+A kum wakak na paspasang, awu sur a matok na warkurai ri a tumusi torom mot, a turaino, a warkurai kut ra mot sa longoro tari tagun numugu utmakai. +Ikut a warkurai ra, tuk uniri i matok utmakai. A lingmulus ina warkurai ri, di tama i un o Karisito, ma di tama i kai un mot, uni a dumirum i rop nanan, ma a talapor mulus i sa wanpat.
+Osi ra i watungi lena i kis una talapor, ikut i nget o tisino, i kis utmakai una dumirum. 10  +Ikut osi ra i nem o tisino, i kis una talapor, ma katu utna una nun a nilaun in ban lingi sur in puku. 11  +Ikut osi ra i nget o tisino, i kis utmakai una dumirum, ma i wanan utmakai una dumirum, ma ke tasmani lena i wanan urai, uni a dumirum i sa upulu pas in matano.
12 A tumtumus torom mot a kum nutnutung liklik, uni di sa unus ru anumot a kum sakino petutna una minatin o Karisito.
13 A tumtumus torom mot a kum lamlabino, uni mot sa tasman o naro ra i laun tagun numnumugu utmakai.
A tumtumus torom mot a kum barman, uni mot sa winim pas o Satan.
A tumtumus torom mot a kum nutnutung liklik, uni mot sa tasman a Tamandat.
14 A tumtumus torom mot a kum lamlabino, uni mot sa tasman o naro ra i laun tagun numnumugu utmakai.
A tumtumus torom mot a kum barman, uni mot sa dekdek, ma a wasiso anun o God i sa kis una balamot, ma mot sa winim pas o Satan.
15  +Gong mot nem a rakrakon bual, ma a kum ututna kai ra det kis uni. Ra taio i nem a rakrakon bual, ke nem a Tamandat. 16  +A kum utna ra kuri una rakrakon bual i lenri: a kum laulau na nemnem tagun a balandat, a kum laulau na nemnem tagun a matandat, ma a umuman labino nama kum utna anundat ma a kum pinapam ra dat pami. A kum utna ri awu sur tagisapat tan a Tamandat, taginin ut una rakrakon bual. 17  +A rakrakon bual ma a kum laulau na nemnem ra det wanpat taguni, det in rop kut, ikut osi ra i mur a nemnem anun o God, in laun tukum.
A kum ebar anun o Karisito
18  +A kum nutnutung, uniri dat kis una kum ururop na bung. Mot sa longoro tari lena a ebar anun o Karisito in nanpat, ma uniri a susut na ebar ra, det sa wanpat. Iri dat sa tasmani lena a ururop na bung i sa milau. 19  +A kum ebar anun o Karisito, numugu det kis tomo nam dat, ikut det sa pirso pas gusun dat, uni awu sur det mulus tagun dat. Ra gunuk det mulus ut tagun dat, det in kis tukum nisan dat. Ikut, ra det sa wan gusun dat, i ese i lena, awu sur det tagun dat.
20  +Ikut mot, o Karisito i pitar tar a Tokodos na Nion torom mot. Ma mot rop, mot sa tasman a lingmulusino, uni a Tokodos na Nion i sa towo tar mot nami. 21 Awu sur a tumtumus torom mot uni ka mot tasman a lingmulusino, awu. A tumtumus torom mot uni mot sa tasman a lingmulusino, ma katu torotoro i ser wanpat taguni. 22  +Osi ra a tene torotoro? O naro ra i ipul kut lena, o Iesu awu sur a Karisito. O naro ra i watungi lenri, i a ebar anun o Karisito, uni i ipul ru o Tamano ma o Nutunu kai. 23  +Osi ra i ipul ru a Nutun o God, o Tamano kai ke kis tomo nami. Ma osi ra i mulaot pas o Nutunu, o Tamano kai i kis tomo nami.
24 I wakak ra a kum etowo rop ra mot sa longoro tari numugu in laun un mot. Ra in laun un mot, mot kai mot in laun un o Nutunu ma o Tamano. 25 Ma asau ra i uliliman tari sur in pitari tandat, i a nilaun tukum.
26 A tumus tar a kum utna ri torom mot, sur an utumarong mot un det ra det nem na ben raro mot. 27  +A Tokodos na Nion, ra o Karisito i pitar tari torom mot, kura ut un mot, ra ka mot sibo sur taio in ususer mot. Uni a Tokodos na Nion i ususer mot una kum utna rop. Ma a utna ra i ususer mot uni i lingmulus, ma awu sur a torotoro. Mot in nuk ukai a etowo ri, sur mot in kis tukum un o Karisito.
A kum nutnutun o God
28 A kum nutnutung liklik, mot in kis tukum un o Karisito, sur gong dat ngara ma gong dat maimai una nun a bung na inawan pat. 29  +Mot tasmani lena, o God a tene tokodos, ma mot tasmani kai lena, det rop ra det pam a tokodos na petutna, det a kum nutnutun o God.
+ 2:1 Ibr 9:24 + 2:2 Jn 1:29; Kol 1:20; 1 Jon 4:10 + 2:5 Jn 14:21, 23 + 2:7 Jn 13:34; 2 Jon 1:5-6 + 2:8 Rom 13:12; Jn 1:9 + 2:9 1 Jon 4:20 + 2:10 Rom 14:13 + 2:11 Jn 12:35 + 2:15 Rom 8:7 + 2:16 Rom 13:14 + 2:17 Mt 7:21 + 2:18 Mt 24:5, 24; 2 Jon 1:7 + 2:19 Ap 20:30 + 2:20 1 Kor 2:15 + 2:22 1 Jon 4:3; 2 Jon 1:7 + 2:23 Jn 5:23; 1 Jon 4:15; 5:1 + 2:27 Jn 16:13 + 2:29 1 Jon 3:10