10
O Iesu i tulu ru a wonom mawit na noino ma aru musano
1 Numur a Labino i pilok pasi bulung a wonom mawit na noino ma aru musano kai, ma i tulu ru det aruru sur det in mugu tano una kum labino tamon, ma una kum tamon liklik, ra numur in nan iai.
2 Ra i watungi tandet lena, “A kinobot i sa makus, ma i sa labo doko, ikut kalako susut na tene pasong. I mo ra mot in saring a Labino, i ra a taman a kinobot, sur in tulu ru a kum tene pasong sur ana kinobot.
3 Mot in nan! A tulu ru mot elar nama kum sipsip epotor tan a kum ngalngalia na pap.
4 Gong mot los tu paus na umubek mani, gong tu rat, ma gong tu su. Gong kai mot wasiso taio ra mot etoromi una kisapi.
5 “Ra mot in nanpat tiro un tu rumu, mot in inanos mugu det lena, ‘A malmal torom mot.’
6 Ra tu tene malmal in kis tiro iai, anumot a malmal in kis uni. Ra awu, anumot a malmal in milet melet torom mot.
7 Mot in kis ut tiro iai una rumu ra, mot in nangon ma mot in inum una utna ra di tabor mot nami, uni i tokodos sur din tabor a tene pinapam. Gong mot inep karkarai.
8 “Ra mot in nanpat un tu tamon, ma din ben ruk mot, mot in nan a utna ra di tabor mot nami.
9 Mot in ulangolango a kum misait tiro iai, ma mot in inanos tar a taro lena, ‘A matanitu anun o God i sa milau nisamot!’
10 Ra mot in nanpat un tu tamon, ra ka di ben ruk mot, mot in tur kut una kisapi ma mot in watungi lena,
11 ‘A kubus tagun anumot a tamon, ra kuri una kum kikimet, met tang melet ru i sur a utumarong torom mot. Ikut mot in tasmani lena, a matanitu anun o God i sa milau.’
12 A watungi tamot, una bung na warkurai, a warkurai torom a tamon ra, in laulau doko taun a warkurai torom a taro Sodom.
A warkurai na minabalu torom det ra ka det nukpukus
(Mt 11:20-24)
13 “In laulau torom mot a taro Korasin, ma in laulau kai torom mot a taro Betsaida. Ra gunuk di sa pam tar a kum utna na ukisin ri torom a taro Tair ma o Saidon, elar nami ra a sa pam tari torom mot, kanapi det in nukpukus lakit ma det in tobo, det in emar nama kum malu na tupunuk ma det in talus a pinindet nama kubus na sungun. Ikut mot, ka mot nukpukus.
14 A warkurai torom mot a taro Korasin ma o Betsaida, in laulau doko taun a warkurai torom a taro Tair ma o Saidon.
15 Ma mot kai a taro Kapernaum, pepetlai, mot nuki lena din ulabo pas mot usapat netes? Awu, din woro pirso ru mot kut una labino sungun.
16 “Osi ra in longoro mot, i longoro iau ut. Ma osi ra in rosumur gusun mot, i rosumur gusun iau utkai. Ma osi ra i rosumur gusun iau, i rosumur utkai gusun o naro ra i tulu ru iau urin.”
A wonom mawit na noino ma aru det milet melet
17 A wonom mawit na noino ma aru det milet melet nama gasgas ma det watungi lena, “Labino, ra met lakro ru a kum laulau na nion nama risam, det pirso kut.”
18 O Iesu i watungi tandet lena, “A tama o Satan i puku tagisapat una langit elar namin nememe.
19 Tama i, a sa pitar tar a dekdek tamot sur mot in pas watwat a kum sui ma a kum bukalo kai, ma sur mot in winim pas a dekdekin a ebar, ma katu utna in ban laulau mot.
20 Ikut, gong mot gas, uni a kum laulau na nion det mur anumot a wasiso. Mot in gas, uni di sa tumus tar a risamot sapat una langit.”
O Iesu i gas
(Mt 11:25-27; 13:16-17)
21 Una du bung ra, o Iesu i bukus nama gasgas tan a Tokodos na Nion ma i watungi lena, “Tita, ui a Labino tagun a langit ma a rakrakon bual rop. A watung ulabo pas ui, uni u munu a kum utna ri tan a kum tene mananos ma det ra det tastasman, ma u upuaso i kut, torom det ra det elar nama kum nat liklik. A lingmulus, Tita, uni anum a nemnem i lenutra.
22 “O Tita i sa pitar tar a kum utna rop torom iau. Katutaio i tasman o Nutunu, o Tamano kut i tasmani, ma kataio kai i tasman o Tamano, o Nutunu kut i tasmani, ma det kai ra o Nutunu i nemi sur in upuaso o Tamano torom det.”
23 Ra o Iesu ma anun a kum nat na ususer mukut det kis, i tupukus torom det ra i watungi lena, “Mot dan ra mot tama a kum ututna ri!
24 A inanos mot, numugu a susut na poropet ma a susut na king det nem doko i sur det in tama a kum utna ri a pami umatamot, ikut ka det tama i. Ma det nem doko i kai sur det in longoro a kum utna ri mot longoro i, ikut ka det longoro i.”
A wasiso elelar una wakak na te Samaria
25 Ara tene mananos tagun a Warkurai i katutur ra i lar o Iesu, ra i tingi lena, “Tene Ususer, asau ra an pami sur an rakon a nilaun tukum?”
26 Ra o Iesu i balu i lena, “Asau ra di sa tumus tari una Warkurai? Asau u nuki uni?”
27 I balu i lena, “ ‘Un nem a Labino anum a God namin balam rop, a niom rop, a dekdekim rop, ma a nuknukim rop.’ Lo 6:5
Ma ‘Un nem o pasam elar nami ra u nem ui ut.’ ” Wkp 19:18
28 O Iesu i watungi tano lena, “I tokodos ut anum a minabalu, un pami ut lenra, ra un laun.”
29 Ikut a tene ususer tagun a Warkurai i nemi sur in ukodos pasi umatan o Iesu, ra i tingi lena, “Osi ra a pasang?”
30 O Iesu i balu i lenri, “Ara musano i wan tagisapat o Jerusalem utong o Jeriko. Ra i wan nanan, a kum tene wolong det kalabor bat pasi. Det palos ru anun a kum malu, ma det um laulau tari, ra det wan pas gusuni ma milau mo sur in mat.
31 Ara tene etabor torom o God i wan una kisapi ra, i tama pas a musano ra, ra i wan lilias kut gusuni una ara papor.
32 Lenkutkai, ara musano bulung tagun a kabotaro Liwai, i wan taru una musano ra, ra i wan lilias kut gusuni una ara papor kisapi.
33 “Ikut ara te Samaria i wan nanan, i wan taru una musano ra, ra i tama i, i maris doko i.
34 I wan toromi, i lingis tar a wel ma a wain una nun a kum inangon ma i pulus bat tar det. I ukas pasi una nun a dongki, ra i usirok tari una rumu na usiro, ra i tamtamabati.
35 Una bung numur tano, i los pas aru denaria, i pitar tari torom a taman a rumu, ma i watungi tano lena, ‘Un tamtamabati. Ra an milet melet, an balu melet asau kai ra u tabor tari nami.’
36 “Osi tagun a tulu musano ri der pasano nama musano ra a kum tene wolong det um tari?”
37 Ra a tene ususer tagun a Warkurai i balu i lena, “O naro ra i marisi.” Ra o Iesu i watungi tano lena, “Un nan ma un pami lenutra.”
O Iesu i kis una rumu anun o Maria ma o Mata
38 O Iesu ma anun a kum nat na ususer det wan nanan, ra det wanpat un ara tamon, ra ara ino, a risano o Mata, i ben pas o Iesu utiro una nun a rumu.
39 Ma ara tisino kai, a ino, a risano o Maria, i kis nisan aru kikin a Labino, ma i longoro anun a wasiso.
40 Ikut o Mata i taramo i ra i dekdek toromi a kum pinapam ra i pami, i wan torom o Iesu ra i watungi tano lena, “Labino, ko nuk pas iau? Tama i, a tising a ino ke warut iau. Iau mukut a pam a kum pinapam. Tulu ru i sur in warut iau.”
41 A Labino i balu i lena, “Mata, Mata, u nuknuk doko sur a susut na utna!
42 Ara utna kut i labo sakit sur a nuknukim in kis uni. O Maria i sa pilok pasi, ma katutaio ut in los ru i gusuni.”