15
A wasiso elelar un ara sipsip ra i raro
(Mt 18:12-14)
Ara bung a kum tene los takis ma a kum tene sakino det wan torom o Iesu sur det in longoro i. +Ikut a kum Parisi ma a kum tene ususer tagun a Warkurai det ururai un o Iesu lena, “A musano ri, i lason kut tomo nama kum tene sakino, ma i wangon tomo nam det.”
Ra o Iesu i watung a wasiso elelar tandet lena: +“Ra taio tagun mot anunu tu mar na sipsip, ma ara tagun det in raro. Pepetlai, ken nan pas gusun a lisu na noino ma lisu tiro una nubual ra det wangon iai, ma in sisio sur ara ra i raro, tuk ra in sio melet pasi? Ra i sa sio pasi, in ubek pasi unin kabarano, ra in nan nama gasgas. In milet melet nami, ra in kabo tomo pas a kum paspasano ma det ra det kis milau, ra in watungi tandet lena, ‘Dat in gas, uni a sa sio melet pas anung a sipsip ra i raro.’ A watungi tamot, i lenkutkai ra sapat una langit, a gasgas una tene sakino ra i nukpukus in labo taun a gasgas una lisu na noino ma lisu ra det sa tokodos, ma ka det in nukpukus melet.
A wasiso elelar un ara mani ra i raro
“Ra tu ino anunu tu noino mani, ra i sa ban raro ru ara. Pepetlai, ken ungangon pas a lam, ra in surupu a rumu, ma in sisio wakak ut suri, tuk ra in sio melet pasi? Ra i sa sio pasi, in kabo tomo pas a kum paspasano ma det ra det kis milau, ra in watungi tandet lena, ‘Dat in gas, uni a sa sio melet pas ara mani ra a ban raro tari.’ 10 A watungi tamot, i lenkutkai ra a gasgas epotor nisan a kum ensel anun o God un ara tene sakino ra i nukpukus.”
A wasiso elelar una musano aru nutnutunu
11 O Iesu i watungi lena, “Ara musano aru nutnutunu, aru nat musano. 12 A murmur i watungi tan o tamano lena, ‘Tita, un pitar tar anung a tinibo tagun anum a kum ululeng.’ Ra a tamander i isuaro tar anun a kum ululeng tander. 13 A iso bung bat tari kut, a murmur i ubek tomo pas anun a ululeng rop, ra i wan sur a tamon bakbak, ma i urop ru anun a ululeng una ngas na nilaun ra ke wakak. 14 Ra i sa urop ru a ututna, a labino munurak i wanpat una tamon ra, ra i murak mo. 15 Ra i wan, ma i papam torom ara musano tagun a tamon ra. Ra a musano ra i tulu tari una nun in noworo na boro sur in tamtabor det. 16 I nemi sur in nan a kum pinino bin ra a kum boro det wanani sur in masur, ikut katutaio i tabori.
17 “Ra a wakak na nuknuk i wanpat melet toromi, i watungi lena, ‘A kum tultul rop anun o tita det wangangon ma det masmasur pas kut gusun a kum utna. Ikut iau, kuri a mat nama munurak! 18  +Uniri an katutur pas ra an milet melet sur o tita. An watungi tano lena, “Tita, a sa pam tar a sakino petutna torom o God ma torom ui kai. 19 Iau ka wakak mo sur un watung iau a nutumlik. Un ubek tar iau mukut sur an elar nam ara tagun anum a kum tultul.” ’ 20 Ra i katutur pas ma i wan sur o tamano.
“Ra i bakbak utmakai, o tamano i sa tama pasi, ra in balano i tupukus nami. I kalabor toromi, i tal pasi ra i gom a wano. 21 Ra o nutunulik i watungi tano lena, ‘Tita, a sa pam tar a sakino petutna torom o God ma torom ui kai. Ka wakak mo sur un watung iau a nutumlik.’ 22 Ikut o tamano i watungi tan anun a kum tultul lena, ‘Aiapiap! Mot in los lakit tin namalu ra i wakak doko urin, ma mot in upipis tari nami. Mot in ubek tar a ring una lamano, ma mot in pas tari kai aru su un aru kikino. 23  +Mot in nan, ma mot in dat pas tu barman na bulumakau ra i butbut urin, mot in um doko pasi, sur dat in nangon ma dat in gas tomo. 24 Uni o nutunglik ri i sa mat, ma uniri i sa laun melet, i raro pas ma uniri i sa wanpat melet.’ Ra a lukaro i turpasi.
25 “Una bung ra a mugano nutunulik, i kis ut tiro una kinobot. Ra i wanpat tiro utamon milau a rumu, i longoro a tinangis na kaur ma a kelekele na nilagor, 26 ra i kabo pas ara tultul, ra i tingi una kum utna ri. 27 Ra a tultul i inanosi lena, ‘O tisimlik i sa wanpat, ra o tamam i um doko pas a barman na bulumakau ra i butbut, uni der tamtama tomo melet, nama wakak na nilaun.’ 28 Ra o tisino a mugano i kankan, i putut kut, ke nemi sur in ruk. Ra o tamano i pirso toromi, ra i umaromi. 29 Ikut i watungi tan o tamano lena, ‘Tama i! A susut na kilalo a sa papam torom ui elar nama tultul, ka rosumur una num a kum itula, ikut ko tabor tar iau mukut nam tu nat na memelik, sur met in gas tomo nama kum paspasang. 30 Ikut ra a nutumlik ri i wanpat, i ra i ban laulau ru anum a kum utna una kum pamuk na ino, u um doko pasi ut a barman na bulumakau ra i butbut suri.’ 31 Ra o Tamano i balu i lena, ‘Nutunglik, ui kuri ut u kis nisang, ma anung a kum ululeng rop, anumi ut. 32 I wakak sur dat in gas ma dat in nangon, uni o tisimlik ri i sa mat ma uniri i sa laun melet, i raro pas, ma uniri i sa wanpat melet.’ ”
+ 15:2 Lk 5:30 + 15:4 Ese 34:11, 16; Lk 19:10 + 15:18 Sng 51:4 + 15:23 Ep 2:1, 5